ارون اتابەك 24 قاراشا كۇنى كەشكى ساعات 20:45-تە ومىردەن ءوتتى. 1 قازان كۇنى ارون اتابەك 15 جىل اباقتىدا وتىرىپ، دەنساۋلىعىنا بايلانىستى بوساتىلعان ەدى. الايدا ديسسيدەنت اباقتىدان ايىقپاس دەرتكە شالدىعىپ شىقتى. 

20 قازاننان باستاپ ارون اتابەك اۋرۋحاناعا جاتقىزىلدى. ونىڭ دەنساۋلىعى ناشارلاپ، كوروناۆيرۋس انىقتالدى. ارتىنشا اقىننىڭ دەنساۋلىعى اۋرۋحانادا كۇرت ناشارلاپ، كوماعا ءتۇستى. «قازاقتىڭ سوڭعى سامۋرايى» اتانعان اروننىڭ دەنساۋلىعىنا قاتىستى ەڭ سوڭعى اقپارات 11 قاراشادا شىقتى. وندا اقىننىڭ قارىنداسى اروننىڭ دەنساۋلىعى تىم ناشار ەكەنىن، بۇلشىقەتى جوقتىعىن، تاماقتى وزدىگىنەن ىشە الماي، توسەككە تانىلعانىن ايتتى.

بەلسەندى ساحيب جاڭاباەۆا بولسا ارون اتابەكتى زامانبەك پەن التىنبەكتىڭ جانىنا جەرلەۋ كەرەك دەگەن ويدا. «حالىق بۇعان نەمقۇرايلى قاراماق ەمەس، حالىققا شىندىق كەرەك. اروندى الماتىدا، كەڭساي-2 زيراتىندا، بولات اتاباەۆ سوڭعى پانا تاپقان بولىگىندە جەرلەمەكپىز. وپپوزيتسيالىق ساياساتكەر بولات اتاباەۆ ۇلتتىڭ ار-وجدانى بولدى جانە اروندى جوعارى باعالادى، ءوزىنىڭ دەموكراتيالىق مۇراتتارعا ادالدىقتىڭ جەكە ۇلگىسىن حالىق ءۇشىن جانقيارلىقتىڭ ۇلگىسى رەتىندە كورسەتتى. حالىق ازاتتىعى جولىندا ەرلىكپەن قازا تاپقان التىنبەك سارسەنباەۆ پەن زامانبەك نۇرقادىلوۆ تە وسى ماڭدا جەرلەنگەن. وسى جولعا مەزگىلسىز ات باسىن تىرەگەن تاعى ءبىر تانىمال وپپوزيتسيالىق ساياساتكەر نۇربولات ماسانوۆ تا سوندا جاتىر»، - دەيدى ول.

ال اروننىڭ قىزى ايدانا ايدارحان اكەسىنىڭ قازاسىنا قاتىستى ينستاگرامعا بىلاي دەپ جازدى: «مەن اكەمدى وسىدان 10 كۇن بۇرىن، ياعني، 13 قاراشادا كوردىم. «سۇڭقار» كلينيكاسىنا مەنى ءبىر-اق رەت كىرگىزدى. سول كەزدە ساۋالدارىما تولىق جاۋاپ الا المادىم. مىنە، بىرنەشە ساعات بۇرىن اكەم دۇنيەدەن ءوتتى. ءبىز ونى باسقا ۇيدە جانە كلينيكادا قانداي دەرتتەن «ەمدەگەنىن» دە بىلمەيمىز. ەندىگى ءۇمىت ونىڭ دەنەسىن اشىپ تەكسەرۋ بولماق. سول كەزدە عانا ءبىز ساۋالدارىمىزعا جاۋاپ الىپ، كۇدىگىمىز سەيىلەر دەپ ويلايمىز. زاڭ تۇرعىسىنان بارلىق شارالار ورىندالادى دەپ سەنەمىز. 

«سۇڭقار» كلينيكاسىندا ونىڭ بىزبەن تىلدەسۋىنە مۇمكىندىك بەرىلمەدى: تاماعىندا تەسىك بولىپ، وعان دەمالۋ ءۇشىن ترۋبكا سالىپ قويدى. بۇدان بۇرىن اكەمنىڭ قولىن الدى، جازا الماۋ ءۇشىن، اياعىن الدى حالقىنا بارا الماۋ ءۇشىن. ونىڭ ولەڭدەرى وزىنە قويىلعان ماڭگى ەسكەرتكىش بولىپ قالادى».

اقىننىڭ قازاسىنا قاتىستى قوعام بەلسەندىسى مۇحتار تايجان كۇيىنە بىلاي دەپتى: «اروننىڭ قايتىس بولعانىنا جۇرت جاپپاي كوڭىل ايتۋدا، دۇرىس قوي. بىراق كوپىشىلىك سول ارون 15 جىل تۇرمەدە وتىرعان كەزدە وزىنە نەمەسە وتباسىنا ناقتى كومەك كورسەتتى مە؟ قۇر سوزبەن ەمەس, ناقتى كومەكتى ايتىپ وتىرمىن. ءيا، ءبىراز قۇقىق قورعاۋشىلار جانە قوعام بەلسەندىلەر، ونىڭ ىشىندە ءوزىم دە بارمىن، وسى جىلدارى ءبىراز كومەك كورسەتىپ جۇردىك.

ال كوپشىلىك شە؟ قازىر ارون قايتىس بولعان سوڭ جاپپاي كوڭىل ايتۋدىڭ نە پايدا؟ كومەكتى ۋاقىتىندا كورسەتۋ كەرەك ەدى قوي. كەيدە ويلايمىن، اناۋ شاڭىراقتىڭ تۇرعىندارى وسى 15 جىل قايدا بولدى، ناقتى ولار ءۇشىن وتىردى عوي.

قازىر سول شاڭىراققا بارساڭ بالالارى ارون دەگەن كىسى كىم بولعان بىلە مە ءوزى؟ ال اتا-انالار شە؟ بىلسە بالالارىنا ايتىپ ءجۇر مە؟ تولعاندىراتىن سۇراقتار».

اقىننىڭ قازاسىنا اقىندار دا ءۇن قوسۋدا. اقىن ەرشات قايبولدين «سوڭعى باتىر» اتتى ولەڭىن ارنادى.

ءبىر باسىندا بار ەدى قىرىق اقىل،
ءتىرى باتىر ءولدى مە بۇگىن اقىر؟!
قۇبىلا تۇر، دۇنيە، قۇبىلا تۇر،
باتىر ءالى ولگەن جوق، ءتىرى جاتىر.

ۇرىپ-سوعىپ، اس-سۋسىز ارام قاتىر،
ەي، دۇنيە، اجالدان امان باتىر!
ءيا، تابىتتا تالىپ ءبىر ادام جاتىر،
بىراق، رۋحى قاسقايىپ الاڭدا تۇر.

تۇلپارىم-اي، جولىنا ەسەك تۇرعان،
ۇلتانىم-اي، تابىتتى توسەك قىلعان.
بورداي توزدى-اۋ اقىرى كەسەك تۇلعاڭ،
كەشەسىڭ بە، بىزدەردى وسەك قۋعان؟!

شارشاعان-اۋ شىنىمەن ءبىزدىڭ باتىر،
ءولىپ قالعان ادامداي مىزعىپ جاتىر.
كۇزەتىڭدەر، كوپشىگىن تۇزەتىڭدەر،
كوزىن ويىپ كەتپەسىن قۇزعىن-كاپىر!

دەم الماستان دەمالسىن سوڭعى باتىر،
سوڭعى باتىر شارشادى، بولدى، جاتىر!
ءاي، باۋىرىم، باتىردى مازالاما،
ءداتىڭ بولسا سەن سونىڭ ورنىنا تۇر!

قازاقستان بيلىگى ارون اتابەكتىڭ قازاسىنا قاتىستى ءالى مالىمدەمە جاساپ، كوڭىل ايتپادى. بىراق اقىننىڭ قازاسىنا قاتىستى حالىقارالىق قۇقىق قورعاۋ ۇيىمدارى الاڭداۋشىلىق ءبىلدىرىپ، بيلىكتەن تۇسىنىك تالاپ ەتۋدە.

نورۆەگيالىق حەلسينكي كوميتەتى Twitter جەلىسىندە ديسسيدەنتتىڭ جاقىندارىنا كوڭىل ايتىپ، ونىڭ ولىمىنە قازاقستان بيلىگى تۇسىنىكتەمە بەرۋى ءتيىس دەپ جازدى.

اسحات قاسەنعالي

Abai.kz