ءال-فارابي اتىنداعى قازاق ۇلتتىق ۋنيۆەرسيتەتىندە عالىم، جۋرناليست، فيلولوگيا عىلىمدارىنىڭ دوكتورى، پروفەسسور تاۋمان اماندوسوۆتىڭ تۋعانىنا 100 جىل تولۋىنا ارنالعان ««جۋرناليستيكا، باسپا ءىسى، مەدياديزاين: بۇگىنگى ترەند جانە دامۋ تەندەنتسياسى» اتتى حالىقارالىق عىلىمي-تاجىريبەلىك ونلاين جانە وفلاين فورماتتى قامتىعان كونفەرەنتسيا ءوتتى.

عىلىمي جيىنعا وتاندىق جانە شەتەلدىك عالىمدار مەن ەلىمىزدىڭ بەدەلدى اقىن-جازۋشىلارى، جۋرناليستەرى قاتىستى. ءىس-شارانىڭ شىمىلدىعىن اشقان ۇلتتىق ۋنيۆەرسيتەت رەكتورى جانسەيت تۇيمەباەۆ جينالعان قاۋىمدى قازاق جۋرناليستيكاسىنىڭ نەگىزىن سالۋشىلاردىڭ ءبىرى – تاۋمان اماندوسوۆتىڭ 100 جىلدىق مەرەيتويىمەن قۇتتىقتاپ، عالىمنان ستۋدەنت كەزىندە ءبىلىم الۋ باقىتىنا يە بولعانىن ەرەكشە ىقىلاسپەن جەتكىزدى.

«ول 70 جىل بۇرىن ۋنيۆەرسيتەتتى ءبىتىرىپ، سودان تابجىلماي ۋنيۆەرسيتەتتە ساباق بەرىپ، ۇستاز دەگەن ۇلى اتقا يە بولىپ، كوپتەگەن شاكىرتتەر تاربيەلەپ، قازاق جۋرناليستيكاسىنا ولشەۋسىز ەڭبەك ءسىڭىردى. ۋاقىت وتكەن سايىن ۇلكەن تۇلعالاردىڭ ەڭبەگى تەرەڭدەي بەرەدى، تۇلعالارى بيىكتەي بەرەدى. وسىنداي اعالارىمىزعا دەگەن قۇرمەت – عىلىمعا دەگەن قۇرمەتتى بىلدىرەدى», - دەدى رەكتور.

كونفەرەنتسيانىڭ مودەراتورى، جۋرناليستيكا فاكۋلتەتىنىڭ دەكانى سانسىزباي ماديەۆ تاۋمان اماندوسوۆتىڭ مەرەيتويىنا ارنايى جىبەرگەن قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ پەن اقپارات جانە كوعامدىق دامۋ ءمينيسترى ايدا بالاەۆادان كەلگەن قۇتتىقتاۋ حاتتارىن  وقىپ بەردى.

ەلىمىزدىڭ بەلگىلى تۇلعالارى قاتىسقان عىلىمي ءىس-شارادا اقىن، ف.ع.د.، پروفەسسور باۋىرجان جاقىپ مازمۇندى بايانداما جاساپ، جازۋشى، كينودراماتۋرگ، پروفەسسور سماعۇل ەلۋباەۆ، فيلولوگيا عىلىمدارىنىڭ دوكتورى، پروفەسسور نامازالى وماشەۆ، فيلولوگيا عىلىمدارىنىڭ دوكتورى، پروفەسسور دانداي ىسقاقۇلى; «الماتى» تەلەارناسىنىڭ باسشىسى، جۋرناليست نۇرجان مۇحامەدجانوۆا، جۋرناليست قاينار ولجاي ءسوز سويلەپ، ەستەلىكتەرىمەن ءبولىستى.

عالىمنىڭ ۇلى اماندوسوۆ ازامات تاۋمانۇلى سالتاناتتى جيىننىڭ قۇرمەتتى قوناعى بولدى.

كونفەرەنتسياعا ونلاين قاتىسقان  ف.ع.د.، پروفەسسور، قر پارلامەنتى ءماجىلىسىنىڭ دەپۋتاتى ساۋىتبەك  ءابدىراحمانوۆ عىلىمي كونفەرەنتسيانىڭ سالتاناتتى اشىلۋىمەن قۇتتىقتاپ، جۇرەكجاردى تىلەگىن ارنادى.

تاۋمان اماندوسوۆتىڭ تۋعان جەرىنەن ارنايى كەلگەن قوناق ەگەمبەرديەۆ ىسقاق دۇيسەمبايۇلى اتىراۋ وبلىسىنىڭ اكىمى ماحامبەت دوسمۇحامبەتوۆتىڭ قۇتتىقتاۋ ءسوزىن جەتكىزدى.

كونفەرەنتسيا كولەمىندە «قازىعۇرت» باسپاسىنىڭ ديرەكتورى تەمىرعالي كوپباەۆ، الماتى قالاسىنىڭ مادەنيەت باسقارماسى جانە اتىراۋ اكىمدىگىنىڭ دەمەۋشىلىگىمەن ستۋدەنتتەر اراسىندا «اماندوسوۆ بايقاۋى» ۇيىمداستىرىلعان.

رەسپۋبليكامىزدىڭ ءار وبلىسىنان باق سىناعان جاس بىلىمگەرلەر «ۇزدىك عىلىمي جۇمىس»، «ۇزدىك ءباسپاسوز ماتەريالى»، «ۇزدىك مۋلتيمەديالىق جوبا»، «ۇزدىك عالامتور جاريالانىمى»، «ديزاين ونەرىنىڭ ۇزدىك تۋىندىسى»  نوميناتسيالارى بويىنشا جۇلدەلى ورىندارعا يە بولىپ، ءبىر مارتە بەرىلەتىن شاكىرتاقىمەن ماراپاتتالدى.

«ۇزدىك عىلىمي جۇمىس» نوميناتسياسى بويىنشا ءبىرىنشى ورىن يەگەرى المابەك يبرايىموۆ:

«بۇگىنگى تاۋمان سالىقبايۇلى اماندوسوۆتىڭ تۋعانىنا 100 جىل تولۋىنا ارنالعان «جۋرناليستيكا، باسپا ءىسى، مەدياديزاين: بۇگىنگى ترەند جانە دامۋ تەندەنتسياسى» اتتى حالىقارالىق عىلىمي-تاجىريبەلىك كونفەرەنتسياسىنا قاتىسقانىما وتە قاتتى قۋانىشتىمىن.

وسى رەتتە قازاق ءباسپاسوزىنىڭ تەوريالىق تۇجىرىمدارىن بايىپتاعان، اسىرەسە ونىڭ جانرلىق تابيعاتىن تەرەڭ ءۇڭىلىپ، ونىڭ ءىس جۇزىندە ىلگەرى باسۋىنا بارىنشا كۇش سالعان پروفەسسور تاۋمان سالىقبايۇلى اماندوسوۆتىڭ ەسىمىن جۋرناليستيكا فاكۋلتەتىنىڭ تۇلەكتەرى تاعى ءبىر مارتە ەسكە الىپ، ونىڭ ونەگەلى ومىرىنە توقتالىپ ءوتتى. «اماندوسوۆ وقۋلارى» اياسىندا ۇيىمداستىرىلعان بايقاۋدا شاكىرتاقىنى يەلەگەنىمە وتە قۋانىشتىمىن. بۇل ءوز كەزەگىندە قازاق جۋرناليستيكاسىنىڭ دامۋىنا كۇش سالاتىن كەلەسى تولقىننىڭ ءبىرى رەتىندە ايقىندالا تۇسەرى حاق…», - دەيدى.

«ديزاين ونەرىنىڭ ۇزدىك تۋىندىسى» نوميناتسياسىن جەڭىپ العان عاليا تورەمۇراتوۆا ءال-فارابي اتىنداعى قازۇۋ، باسپاگەرلىك-رەداكتورلىق جانە ديزاينەرلىك ونەر كافەدراسىنىڭ 2-كۋرس ماگيسترانتى. ول بايقاۋعا قاتىسۋ ءۇشىن عالامتوردان تاۋمان اماندوسوۆ تۋرالى كوپتەگەن دەرەكتەر ىزدەگەن. الايدا، جۋرناليست عالىمنىڭ ءبىر-ەكى سۋرەتىن عانا تاپقان. سوندىقتان ماگيسترانت زاماناۋي پوپ-ارت ستيلىندە تۋىندى جاساپ شىعارعىسى كەلگەن ەكەن.

«سالعان سۋرەتىم قىزىقتى ءارى جاڭا زامانعا ساي بولۋى ءۇشىن مەن «qr» كود قولداندىم. ياعني، مەنىڭ سالعان تۋىندىم كورمەدە ءىلىنىپ تۇرسا، ءسىز سۋرەتتەگى «qr» كودتى باسىپ الىپ قارايسىز. كود سىزگە تەلەفونىڭىزداعى «بۇلت» سەرۆەرىندە تاۋمان اماندوسوۆ تۋرالى قىسقاشا اقپاراتتى شىعارىپ بەرەدى. بۇل ويدى ىسكە اسىرۋداعى سەبەبىم: كوز الدىڭىزداعى تۇلعانىڭ سۋرەتى ارقىلى اقپاراتتى وڭاي تاۋىپ الاسىز»، - دەيدى عاليا. ول ءجۋرناليستىڭ ۇلى ازامات تاۋمانوۆقا جۇمىسىنىڭ قاتتى ۇناعانىن جەتكىزدى.

ەر ەسىمىن ەل ەسىندە قالدىرۋ ءۇشىن ۇرپاققا ونەگە بولار مۇنداي ءىس-شارالاردىڭ ماڭىزى ەرەكشە.

سونىمەن بىرگە،«باسپاگەرلىك، رەداكتورلىق جانە ديزاينەرلىك ونەر» كافەدراسىنىڭ مەڭگەرۋشىسى، فيلولوگيا عىلىمدارىنىڭ دوكتورى، دوتسەنت ايگۇل رامازان جانە كافەدرا مەڭگەرۋشىسىنىڭ عىلىمي-يننوۆاتسيالىق جۇمىس جانە حالىقارالىق بايلانىستار جونىندەگى ورىنباسارى اينۇر  سلامعاجى ت.ب.، جۋرناليستيكا فاكۋلتەتى ۇستازدارىنىڭ حالىقارالىق عىلىمي جيىن ۇيىمداستىرۋدا اتقارعان ەڭبەگى زور ەكەنىن ايتۋ پارىز.

Abai.kz