پاندەميا سالاسى تۋريزم سالاسىنا ۇلكەن سوققى جاسادى. بۇۇ مالىمەتى بويىنشا الەم ەلدەرىنىڭ تۋريزمىنە كەمى 2 ترلن دوللار شىعىن كەلگەن. ەكونوميكاسى تۋريزمگە باعىتتالعان مەملەكەتتەر كوپ زارداپ شەكتى، ولاردىڭ قاتارىندا مىسىر، تۇركيا، گرەكيا سىندى ەلدەر دە بار. الايدا ءبىر قيىندىق ەكىنشى سالانىڭ تىنىسىن اشۋى مۇمكىن. قازاقستان ءۇشىن ول سولاي بولدى دەۋگە نەگىز بار.

پاندەميا تۋريستەردى سىرتقا ەمەس، ىشكى ءتۋريزمدى دامىتۋعا يتەرمەلەپ وتىر. وعان الەمدىك شەكتەۋلەر مەن اي سايىن شىعاتىن كوروناۆيرۋس شتاممدارى دا تىكەلەي اسەر ەتۋدە. سىرتقا شىعۋ قىمبات، ءتۇرلى تەست تاپسىرۋ ارقىلى اۋرەسى كوپ، ال ەڭ باستىسى قاۋىپتى بولعان ساتتە، ىشكى ءتۋريزمدى دامىتۋعا مۇمكىندىك اشىلدى.

ءار مەملەكەت ىشكى تۋريزم سالاسىن دامىتۋعا بارىن سالىپ جاتىر. جارنامانى ىشكى نارىققا ارناپ جاساۋدا. ويتكەنى قازىرگى پاندەميالىق جاعدايدا سىرتتان تۋريست كەلۋى ەكىتالاي، سوندىقتان سىرتقا ەمەس، كۇشتى ىشكە سالۋ الدەقايدا اقتالاتىن ارەكەت. وسىنداي ساتتە الماتى قالاسى ءتۋريزمدى دامىتۋ ءۇشىن جوبالاردى ىسكە اسىرۋدا، ءبىر قىزىعى شەتەلدىك تانىمال بلوگەرلەردى شاقىرتىپ، سىرتتان تۋريستەر اعىمىن ارتتىرۋعا باسىمدىق قويىپتى. پاندەميادا.

بۇل ماقساتتا الماتى بيۋدجەتىنەن 28,5 ملن تەڭگە قارجى بولىنگەن، وعان شەتەلدەن 40 بلوگەر شاقىرتىلعان. الماتى قالاسىنىڭ تۋريزم باسقارماسى بلوگەرلەردى قالاي تاڭداعانىن ايتىپ بەردى. ولار شەتەلدىك بلوگەرلەردى الەۋمەتتىك جەلىدەگى پاراقشالارىنا قاراپ تاڭداعان ەكەن. تالاپ كەلەسىدەي، بلوگەردىڭ 300 مىڭ وقىرمانى، ساپالى كونتەنتى بولۋى مىندەتتى. شەتەلدىك بلوگەرلەرمەن قاتار باق وكىلدەرى، تراۆەلل جۋرناليستەر دە شاقىرتىلعان.

«20 بلوگەر الماتى قالاسىندا بەس كۇن بولعان. ولار الماتى قالاسى مەن قالا ماڭىنداعى تانىمال تۋريستىك ورتالىقتاردى ارالادى. شىمبۇلاق، مەدەۋ، كوكتوبە، ىلە الاتااۋى جانە قالا ىشىندەگى بارلىق تانىمال ورىندارعا باردى», – دەيدى تۋريزم باسقارماسىنىڭ باسشىسى سابينا امانگەلدى.

بارلىعى 20 بلوگەر كەلگەن، ال قالعانى جىل سوڭىنا دەيىن كەلمەك. تۇركيا، رۋمىنيا، كاتار، وڭتۇستىك كورەيادان دا كەلگەن بلوگەرلەر بار. اكىمدىك بلوگەرلەردىڭ جاريالىمدارى مەن پوستتارىنان ولاردىڭ اۋديتوريانى قىزىقتىرۋ دەڭگەيىن دە قاراپ، مونيتورينگ جاساپ وتىرعانىن ايتادى.

جالپى بلوگەرلەرگە تولەنەتىن قارجى 28,5 ملن تەڭگە، ققس (ندس) ەسەپتەيتىن بولسا، ول  25,5 ملن تەڭگە دەگەن ءسوز. ياعني ءار بلوگەرگە 712,5 مىڭ تەڭگەدەن كەلەدى. بۇل قارجىعا گونورار كىرمەيدى، تۇرۋ، تاماقتانۋ جانە اۋە بيلەتتەرى كىرگەن. جالپى مۇنداي شىعىن ارقىلى جارناما جاساۋ قانشالىقتى اقتالاتىنى بەلگىسىز. الماتى قالاسىنىڭ اكىم ورىنباسارى ماقسات كيكيموۆ زابيب نۇرماعامەدوۆتىڭ الماتىعا كەلگەنى 900 مىڭ ءلۇپىل جيناعانان ايتتى. ارينە، بۇل ناتيجەنى ەسەپتەۋ كورسەتكىشى بولا المايدى.

تۋريست شاقىرماي تۇرىپ، ىشكى تۋريزمنىڭ ءۇيىلىپ جاتقان ماسەلەسىن شەشۋ كەرەك ەمەس پە؟ قىزمەت كورسەتۋ سالاسىنا مادەنيەت ەنگىزىپ، ەلدىڭ «ۆيزيت كارتوچكاسىنا» اينالاتىن دارەتحانا ماسەلەسىن شەشىپ، تابيعي ايماقتارعا تاقتايداي جول سالىپ، ءححى عاسىردىڭ تۋريزمىنە ساي ينتەرنەت جۇيەسىن جاساسا، سىرتتان تۋريست وزدىگىنەن اعىلارى ءسوزسىز.

كا مىرزا 

Abai.kz