جاڭا جىلعا دايىندىق جەلتوقساننىڭ باسىنان باستالىپ كەتتى

پرەزيدەنتىمىزدىڭ ءوزى باس بولىپ، كوڭىل ءبولىپ جاتقان كومىرلى قالا – ەكىباستۇزدىڭ مەكەمەلەرى مەن ساۋدا ورىندارىندا تاۋەلسىزدىكتىڭ 30 جىلدىق مەرەيتويىنىڭ ءيسى سەزىلمەيدى. بارلىق ساۋدا ورىندارى جەلتوقساننىڭ باسىنان جاڭا جىل مەرەكەسىنە دايىندالىپ كەتكەن.

بۇل نەنىڭ بەلگىسى؟ بۇل جەرگىلىكتى بيلىك وكىلدەرىنىڭ (كاسىپكەرلىك سالاسىنا جاۋاپتى تۇلعالاردىڭ دا!) جانە ەڭ باستىسى، قالا اكىمدىگىنىڭ ىشكى ساياسات ءبولىمىنىڭ تاۋەلسىزدىكتى ناسيحاتتاۋعا دەگەن نەمقۇرايدىلىعى مەن سالعىرتتىعىن بىلدىرەدى. بىزدىڭشە، جەرگىلىكتى بيلىك كاسىپكەرلىك نىساندارىنىڭ باسشىلارىن جيىپ الىپ، قاراشا ايىنان-اق، تاۋەلسىزدىكتىڭ 30 جىلدىق مەرەيتويى كەلە جاتقانىن، ونى قالاي ناسيحاتتاۋعا بولاتىنىن، مەملەكەتتىك مەرەكە ءوتىپ كەتپەيىنشە جاڭا جىلدى ناسيحاتتاماي قويا تۇرۋدى ءتۇسىندىرۋى كەرەك ەدى. ويتەيىن دەسە، قالا اكىمىنىڭ كاسىپكەرلىككە جەتەكشىلىك ەتەتىن ورىنباسارى گۇلجان قادىرباەۆانىڭ قولاستىنداعى مامانداردى ءبىر شىبىقپەن تىرقىراتىپ قۋدالاۋدان قولى تيمەي ءجۇر. بۇگىندە سونىڭ سالدارىنان اكىمدىكتەگى ماماندار بىرىنەن سوڭ ءبىرى جۇمىستان كەتىپ جاتىر. تاياۋدا وسى قۋدالاۋعا شىداماعان كاسىپكەرلىك باسشىسى (قالاداعى ەڭ قازاقتىلدى باسشى!) ەركەبۇلان الدابەرگەنۇلى قىزمەتتەن كەتتى.

الەۋمەتتىك جەلىلەردە جاريالانعان تاۋەلسىزدىككە ارنالعان باعدارلاماعا جەرگىلىكتى بيلىك ادەتتەگى جاتتاندى شارالاردى بەلگىلەپتى. سونىڭ ىشىندە جاس وتباسىلارعا نەكە كۋالىكتەرىن سالتاناتتى تاپسىرۋ سياقتى شارالار بار. بىرەۋدىڭ نەكە قيۋ ءراسىمى جەكە ءبىر وتباسىنىڭ شارۋاسى ەمەس پە؟ جاستار كەلەشەكتە تۇرىپ كەتە الا ما، جوق پا – ونى بيلىك يىسكەپ بىلگەن بە؟

ءبىرلى-جارىم مەكتەپتەر مەن بالاباقشالاردا بولماسا، تاۋەلسىزدىك مەرەيتويىنىڭ نىشانى ەشبىر بايقالمايدى. تاۋەلسىزدىك مەرەيتويى كەلە جاتقانىن نۇر-سۇلتانعا بارىپ كەلگەن تۇرعىندار عانا سەزىنۋدە، سەبەبى استانانىڭ ءىرى ساۋدا ۇيلەرىندە ەلىمىزدىڭ تۋى ءىلىنىپ، باسقا دا قادامدار جاسالىپتى. بۇل جاعىنان ورىستانىپ تۇرعان كەنشىلەر قالاسىنداعى بيلىكتىڭ حابارسىز بولعانى وتە وكىنىشتى!

ەسكەرتۋ! Abai.kz ەركىن اقپارات الاڭى. مۇندا وي جارىستىرىپ، پىكىر الماستىرۋعا قازاقستاننىڭ كەز كەلگەن ازاماتى قۇقىلى. ماتەريالدا ەسىمى اتالاتىن جەكەلەگەن تۇلعالار رەداكتسياعا جاۋاپ بەرۋگە قۇلىقتى بولسا، الداعى ۋاقىتتا ولاردىڭ دا پىكىرىن جاريالاۋعا ءازىرمىز. 

بەكنياز سابىروۆ،

پاۆلودار وبلىسى

Abai.kz