ەلىمىزدەگى ەلدى مەكەندەردىڭ، ءبىلىم مەن مادەنيت وشاقتارىنىڭ، كوشەلەردىڭ اتاۋلارىن قازاقىلاندىرۋدىڭ ءمانى نەدە، وسى؟ بۇل ارزان پاتريوتيزم، ساسىق نامىستىڭ جەتەگىندەگى پوپۋليستىك شارالار ەمەس پە؟ ۇلتارالىق تاتۋلىققا كەرى اسەرىن تيگىزىپ جۇرمەي مە؟ جوق! ءدال وسى ماسەلەگە كەلگەندە تاباندىلىق قاجەت. نەگە؟

بىرىنشىدەن - بۇل تاريحي ادىلەت. ەشكىم تاريحي فاكتىلەرگە قارسى ءۋاج ايتا الماسى حاق. باسقاشا ايتار بولسا - بۇل يدەولوگيالىق ماقساتتا تاريحتى بۇرمالاۋ دەگەن ءسوز.

ەكىنشىدەن - بۇل بيلىكتىڭ مىسى مەن قاۋقارىنىڭ كورسەتكىشى. ەرتەڭ بۇدان دا ماڭىزدى شەشىمدەر قابىلداۋ كەرەك بولعاندا حالىقتىڭ قولداۋىنا شىن يە بولۋ ءۇشىن - ءدال وسىنداي كەزدە ءوز قاۋقارىن كورسەتە ءبىلۋى ءتيىس. ونىڭ ۇستىنە، ساياسي تۇرعىدان تالدار بولساق - قاي جاعىنان الىپ قاراساق تا بۇل اينالىپ وتۋگە بولمايتىن قادام. اسىرەسە، شەكارالىق ايماقتاعى ەلدى مەكەندەرگە قاتىستى ماسەلە ءتىپتى دە وزەكتى.

ۇشىنشىدەن - بۇل بىرلىكتىڭ كەپىلى. ۇلتارالىق كيكىلجىڭدەرگە سەبەپ بولار ەموتسيالىق فاكتورلارلدىڭ الدىن الۋ. مۇنىڭ كورىنىسىن ءبىر ەمەس، بىرنەشە وقيعالاردان كورىپ تە ۇلگەردىك، وسى وتىز جىل ىشىندە.

تورتىنشىدەن - بۇل رۋحاني امانات. قازاقتىڭ بايتاق دالاسى ءۇشىن مالىن دا، جانىن دا قيعان باتىرلاردىڭ، اۋزى دۋالى ابىزدار مەن بيلەردىڭ، ارۋاقتى اۋليەلەردىڭ اماناتى. ونداي كىسىلەردىڭ اماناتىنا قيانات جاساۋ - كىم ءۇشىن بولسا دا جەڭىل تيە قويماسى انىق.

بۇل ايتىلعاندار قازاقستاننىڭ ءار بۇرىشىنداعى وزگە تىلدە، وزگە ۇلتتاردىڭ اتىنداعى ەلدى مەكەندەر مەن مەكەمەلەرگە قاتىسى بار. سونىڭ ىشىندە، الماتى وبلىسىنداعى قارادالا وڭىرىنە قاتىسى ەرەكشە. اۋدان تۇرعىندارىنىڭ باستاماسى بولسا، وعان اۋداننىڭ اتى بەرىلگەن ۇلت وكىلدەرى دە قارسىلىق تانىتپاسى بەلگىلى بولسا (قارسىلىق تانىتۋعا ەش رەتى دە جوق قوي، ءاسىلى), ەلىمىزدىڭ تۇكپىر-تۇكپىرىندەگى زيالى قاۋىم مەن قوعام بەلسەندىلەرى قولداپ پىكىرلەر جازىپ جاتسا، جوعارىدا اتاپ وتكەن سەبەپتەردىڭ ءبارى دالمە ءدال كەلىپ تۇراتىن بولسا - بۇل شەشىمدى سوزبالاقتاۋدىڭ نەسى قاجەت؟

ءدال قازىر وسى پىكىر - ەل جاقتاعى اقىل توقتاتقان سانالى جاستاردان باستاپ، ءسوز ۇستاعان اقساقالدارعا دەيىنگى حالىقتىڭ بارىنە ورتاق پىكىر. سانالى جاستار دەپ وتىرعانىم - ايعاي مەن ۇرانعا سالىپ ەمەس، مادەنيەت پەن ساۋاتتىلىقتى تۋ ەتىپ ۇستاپ، ەلىدك ماسەلەگە ارالاسىپ جۇرگەن جاس بۋىن، ادۋىندى بۋىن. سوندىقتان، ەلدىڭ پىكىرىمەن ساناسىپ، تاريحي ادىلەتكە جۇگىنىپ، ساۋاتتى ءھام سالاۋاتتى شەشىم قابىلدار كەز كەلدى!

ەدىگە قوجاحمەت

Abai.kz