پرەزيدەنت قاسىم-جومارت توقاەۆ الماتى وبلىسىندا توتەنشە جاعداي ەنگىزۋ تۋرالى جارلىققا قول قويدى.

مەملەكەت باسشىسىنىڭ قاۋلىسى:

1. ازاماتتاردىڭ ماڭىزدى جانە تىكەلەي قاۋىپسىزدىگىنە بايلانىستى قوعامدىق قاۋىپسىزدىكتى قامتاماسىز ەتۋ، زاڭدىلىق پەن قۇقىقتىق ءتارتىپتى قالپىنا كەلتىرۋ، ازاماتتاردىڭ قۇقىقتارى مەن بوستاندىقتارىن قورعاۋ ماقساتىندا 2022 جىلعى 5 قاڭتارداعى 12 ساعات 30 مينۋت پەن 2022 جىلعى 19 قاڭتارداعى 00 ساعات 00 مينۋت مەرزىمى كەزەڭىندە الماتى وبلىسىنىڭ شەكارالارىندا توتەنشە جاعداي ەنگىزىلسىن.

2. الماتى وبلىسىندا توتەنشە جاعدايدىڭ كۇشىندە بولۋى كەزەڭىندە 23 ساعات 00 مينۋتتان 7 ساعات 00 مينۋتقا دەيىن كومەندانتتىق ساعات ەنگىزىلسىن.

3. توتەنشە جاعدايدىڭ كەزەڭىندە الماتى وبلىسىنىڭ كومەنداتۋراسى قۇرىلىپ، وعان «توتەنشە جاعداي تۋرالى» قازاقستان رەسپۋبليكاسىنىڭ زاڭىمەن كوزدەلگەن وكىلەتتىكتەر بەرىلسىن.

الماتى وبلىسىنىڭ كومەندانتى بولىپ الماتى وبلىسى پوليتسيا دەپارتامەنتىنىڭ باستىعى سەرىك مىرزاقۇلۇلى كۇدەباەۆ تاعايىندالسىن.

4. توتەنشە جاعدايدىڭ كۇشىندە بولۋى كەزەڭىندە مىناداي شارالار مەن ۋاقىتشا شەكتەۋلەر ەنگىزىلسىن:

1) قوعامدىق ءتارتىپتىڭ ساقتالۋى، اسا ماڭىزدى مەملەكەتتىك جانە ستراتەگيالىق وبەكتىلەردىڭ، سونداي-اق حالىقتىڭ تىنىس-تىرشىلىگىن جانە كولىك قىزمەتىنىڭ جۇمىس ىستەۋىن قامتاماسىز ەتەتىن وبەكتىلەردىڭ كۇزەتىلۋى كۇشەيتىلسىن;

2) الماتى وبلىسىندا ءجۇرىپ-تۇرۋ، ونىڭ ىشىندە كولىك قۇرالدارى قوزعالىسىنىڭ ەركىندىگىنە شەكتەۋلەر بەلگىلەنسىن;

3) جەكە تۇلعالاردىڭ جەكە باسىن كۋالاندىراتىن قۇجاتتاردى تەكسەرۋ، ولاردى جەكە تەكسەرۋ، ولاردىڭ زاتتارىن، كولىك قۇرالدارىن تەكسەرۋ قامتاماسىز ەتىلسىن;

4) الماتى وبلىسىنا كىرۋ، سونداي-اق ودان شىعۋ شەكتەلسىن;

5) بەيبىت جينالىستاردى، ويىن-ساۋىق، سپورتتىق جانە باسقا دا بۇقارالىق ءىس-شارالاردى ۇيىمداستىرۋعا جانە وتكىزۋگە تىيىم سالىنسىن;

6) ەرەۋىلدەرگە جانە زاڭدى تۇلعالاردىڭ قىزمەتىن توقتاتا تۇرۋدىڭ نەمەسە توقتاتۋدىڭ وزگە دە ادىستەرىنە تىيىم سالىنسىن;

7) قارۋ، وق-ءدارى، جارىلعىش زاتتار، ارناۋلى قۇرالدار، ۋلى زاتتار ساتۋعا تىيىم سالىنسىن، ءدارى-دارمەكتىڭ، ەسىرتكى زاتتاردىڭ، پسيحوتروپتىق زاتتاردىڭ، پرەكۋرسورلاردىڭ، سونداي-اق ەتيل ءسپيرتىنىڭ، الكوگول ونىمدەرىنىڭ اينالىمىنا ەرەكشە رەجيمى بەلگىلەنسىن;

8) جەكە تۇلعالاردان قارۋ مەن وق-ءدارىنى، ۋلى زاتتاردى ۋاقىتشا الىپ قويۋ، ال زاڭدى تۇلعالاردان قارۋعا، وق-دارىگە جانە ۋلى زاتتارعا قوسا اسكەري جانە جاۋىنگەرلىك وقۋ تەحنيكاسىن، جارىلعىش جانە راديواكتيۆتى زاتتاردى ۋاقىتشا الىپ قويۋ قامتاماسىز ەتىلسىن.

5. توتەنشە جاعداي رەجيمى كەزىندە قولدانىلاتىن شارالاردىڭ ىسكە اسىرىلۋىنا جاۋاپتى بولىپ الماتى وبلىسىنىڭ كومەنداتۋراسى، قازاقستان رەسپۋبليكاسىنىڭ ىشكى ىستەر مينيسترلىگى، قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى، قازاقستان رەسپۋبليكاسىنىڭ قورعانىس مينيسترلىگى، قازاقستان رەسپۋبليكاسىنىڭ توتەنشە جاعدايلار مينيسترلىگى بەلگىلەنسىن.

6. قازاقستان رەسپۋبليكاسىنىڭ باس پروكۋرورى وسى جارلىقتا بەلگىلەنگەن شارالار مەن ۋاقىتشا شەكتەۋلەردى ىسكە اسىرۋ كەزىندە زاڭدىلىقتىڭ ساقتالۋىن قامتاماسىز ەتسىن.

7. قازاقستان رەسپۋبليكاسىنىڭ ۇكىمەتى توتەنشە جاعداي رەجيمىن قامتاماسىز ەتۋ ءۇشىن قازاقستان رەسپۋبليكاسى ۇكىمەتىنىڭ رەزەرۆىنەن قاجەتتى قاراجاتتى ءبولسىن.

وسى جارلىق قول قويىلعان كۇنىنەن باستاپ قولدانىسقا ەنگىزىلەدى.

Abai.kz