پرەزيدەنت قاسىم-جومارت توقاەۆ قىتايمەن شەكاراداعى كەدەندە بولىپ جاتقان «بىلىقتى» شەشۋدى تاپسىردى.

«بيۋدجەت كىرىسىن ارتتىرۋدىڭ ماڭىزدى الەۋەتى كەدەندە ءتارتىپ ورناتۋدا جاتىر. اسىرەسە قىتايمەن شەكارادا. ول جەردە بولىپ جاتقان ناعىز «بىلىقتىڭ» بارىنە بەلگىلى ەكەنى راس. كولىكتەر تەكسەرىلىپ جاتقان جوق، سالىقتار مەن باجدار تولەنبەيدى. اينا ستاتيستيكاسىنداعى قىتاي كەدەن ورگاندارىمەن ايىرماشىلىقتار ميللياردتاعان دوللارعا جەتتى. مارتەبەسى قورعالعان كەيبىر ۋاكىلەتتى وپەراتورلار بار. ەلىمىز ونداعان ميلليارد تەڭگە سالىق تولەۋدە. بۇلاي بولمايدى، - دەدى توقاەۆ ءماجىلىس وتىرىسىندا.

پرەزيدەنت قارجى مينيسترلىگىمەن، قارجى مونيتورينگى اگەنتتىگىمەن جانە باسقا دا مۇددەلى ورگاندارمەن بىرلەسىپ، كەشەندى تەكسەرۋ جۇرگىزىپ، كەدەندىك شەكارادا ءتارتىپتى قامتاماسىز ەتۋدى باس پروكۋراتۋراعا تاپسىردى.

ەستەرىڭىزگە سالا كەتەيىك، رەسمي ساۋدا اينالىمداعى ايىرماشىلىق ماسەلەسى بۇرىننان ايتىلىپ كەلەدى. بۇل ماسەلە 2017 جىلعى ماۋسىمدا قحر توراعاسى سي تسزينپينمەن ەكىجاقتى كەزدەسۋدە دە قاراستىرىلعان بولاتىن.

«قىتاي شەكارا دەرەكتەرى بويىنشا تاۋار اينالىمى 46 پايىزعا، ءبىزدىڭ دەرەكتەر بويىنشا 30 پايىزعا ءوستى. ايىرماشىلىق نەدە ەكەنىن بىلمەيمىن؟ ءار ءتۇرلى ەسەپتەۋ ادىسىنەن بە؟»- دەگەن بولاتىن قازاقستان پرەزيدەنتى سي تسزينپينگە.

Abai.kz