باس پروكۋراتۋرانىڭ ءبىرىنشى قىزمەت باستىعىنىڭ ورىنباسارى ەلدوس قيلىمجانوۆتىڭ ايتۋىنشا، ونىڭ ىشىندە 44 ءىس – تەرروريزم بويىنشا، 36 ءىس – جاپپاي تارتىپسىزدىك، 15 - ادام ءولتىرۋ بابى بويىنشا اشىلعان. ودان بولەك، ۇرلىق، توناۋ، قارۋدى جىمقىرۋ، بيلىك وكىلىنە كۇش قولدانۋ جانە تاعى باسقا قىلمىستار بويىنشا ىستەر تىركەلگەن.
– وسى ىستەر بويىنشا 970 كۇدىكتى قاماۋعا الىنعان. ونىڭ ىشىندە 782-ءسى سوت سانكتسياسىمەن قامالعان. 29-ىنا ۇيقاماق تۇرىندەگى بۇلتارتپاس جازاسى قولدانىلعان. 464 ادام – تەرروريزم جانە جاپپاي تارتىپسىزدىك ىستەرى بويىنشا ۇستالعان. 226 ادام – ۇرلىق، 60 ادام - قارۋدى زاڭسىز ساقتاۋ، 39 ادام - قارۋدى جىمقىرۋ، 25 ادام - بۇزاقىلىق، 21 ادام توناۋ دەرەكتەرىمەن قاماۋعا الىنعان، – دەدى ەلدوس قيلىمجانوۆ.
بريفينگتە ايتىلعان نەگىزگى مالىمەتتەر:
- پروكۋرورلار الماتىداعى ۋاقىتشا قاماۋ يزولياتورىن تەكسەرگەن كەزدە دەنە جاراقاتى بار 73 ادامدى انىقتاعان. ۇشەۋى بوساتىلعان. وق جاراقاتى بار 29 ادام قالالىق اۋرۋحاناعا جاتقىزىلعان. 41 ادام تەرگەۋ يزولياتورىندا مەديتسينالىق كومەك العان.
- قۇقىق قورعاۋشىلار مەن ادام قۇقىقتارى جونىندەگى ۋاكىلگە ۇستالعاندار مەن قامالعاندارعا كىرۋ مۇمكىندىگى بەرىلگەن.
- پروكۋراتۋراعا ازاپتاۋ مەن ازاماتتاردىڭ قۇقىقتارىن بۇزۋ بويىنشا 91 شاعىم تۇسكەن. 19 شاعىمداعى مالىمەت راستالماعان، 56-سى تەرگەلىپ جاتىر.
- ۇستالعانداردى ازاپتاۋ، ءولتىرۋ جانە ولارعا قاتىستى بيلىك وكىلەتىن اسىرا پايدالانۋ باپتارى بويىنشا 16 قىلمىستىق ءىس اشىلعان.
- ادۆوكاتتارعا قورعاۋىنداعى ازاماتتارمەن كەزدەسۋ مۇمكىندىگى بەرىلگەن، سالەم-ساۋقاتتار ادەتتەگىدەي قابىلدانىپ جاتىر.
- اتىراۋ مەن قىزىلوردا قالالارىندا تەرگەۋ يزولياتورىنا قامالعان ەكى ادام مەديتسينالىق كومەككە ءزارۋ بولعاندىقتان اۋرۋحاناعا جاتقىزىلعان.
قازاقستاندا قاڭتار وقيعاسى بويىنشا ۇستالعانداردى ازاپتاۋ مەن قىسىم كورسەتۋگە قاتىستى شاعىمدار كوبەيگەن تۇستا باس پروكۋراتۋرا مەن قىلمىستىق-اتقارۋ جۇيەسى كوميتەتى وكىلدەرى وسىنداي مالىمدەمە جاساپ وتىر. قۇقىق قورعاۋشىلاردىڭ ايتۋىنشا، قازا بولعاندار، جارالانعاندار جانە ۇستالعاندار اراسىندا بەيبىت تۇرعىندار بار.
جۇزدەگەن بەلسەندى "بەيبىت ميتينگ زاڭىن بۇزدى", "جاپپاي تارتىپسىزدىك ۇيىمداستىردى" دەگەن ايىپپەن جازالانعان.
جەرگىلىكتى جانە حالىقارالىق قۇقىق قورعاۋشىلار بيلىكتى بەيبىت شەرۋگە قاتىسقان، پىكىرىن ايتۋ قۇقىعىن جۇزەگە اسىرعىسى كەلگەن ازاماتتاردى قۋدالاماۋعا، ولاردى دەرەۋ بوساتۋعا شاقىرعان.
حالىقارالىق ۇيىمدار قازاقستان بيلىگىنىڭ حالىققا كۇش قولدانۋىن ايىپتاپ, ەۋروپارلامەنت قازاقستان شەنەۋنىكتەرىنە سانكتسيا سالۋ ماسەلەسىن قاراستىرىپ جاتىر.
Abai.kz
