بۇكىلرەسەيلىك وفيتسەرلەر جيىنى ءپۋتيندى «سوعىس ءورتىن تۇتاندىردى»، دەپ كىنالاپ،  ۋكرايناعا سوعىس اشۋعا قارسى شىقتى.

«بۇكىلرەسەيلىك وفيتسەرلەر جيىنىنىڭ» توراعاسى، وتستاۆكاداعى گەنەرال-پولكوۆنيك لەونيد يۆاشوۆ ۋكراينامەن سوعىسۋعا قارسى شىعىپ، ۆلاديمير پۋتين مەن رەسەيلىك ازاماتتارعا ارناپ ۇندەۋ جاريالادى. ۇندەۋ-حات 31 قاڭتار كۇنى «بۇكىلرەسەيلىك وفيتسەرلەر جيىنى» سايتىندا جارىق كورگەن.

حاتتا: «سوعىس دەگەنىمىز - «ۇلكەن قاسىرەت» ءارى «اۋىر قىلمىس»، دەلىنگەن. يۆاشوۆ: «بۇرىن رەسەي مەن كسرو باسقا امالى قالماعان سوڭ، سوعىسقا قاتىسۋعا ءماجبۇر بولعان»، - دەيدى.

«بۇگىندە رەسەيگە قاۋىپ ءتونىپ تۇر ما؟ بولسا قانداي قاۋىپ؟ شىندىعىندا قاۋىپ-قاتەر كورەر كوزگە ايقىن. ول – ەلدىڭ ءوز تاريحىن اياقتاۋعا شاق قالدى. بارلىق ماڭىزدى سالالار، سونىڭ ىشىندە دەموگرافيا تۇراقتى تۇردە تومەندەپ بارادى، ال حالىقتىڭ جويىلۋ قارقىنى الەمدىك رەكوردقا جاقىندادى. رەسەيگە باستى قاۋىپ: مەملەكەت مەن بيلىكتىڭ باسقارۋ مودەلىنەن تۋىنداعان «جۇيەلىك دەگراداتسيا» دەپ اتالادى»، - دەيدى گەنەرال-پولكوۆنيك.

يۆاشوۆ قاۋىپ-قاتەرلەر بار بولعانىمەن، ولار قازىرگى جاعدايدا ماڭىزدى ەمەس. «ستراتەگيالىق تۇراقتىلىق ساقتالۋدا، يادرولىق قارۋ سەنىمدى باقىلاۋدا، ناتو كۇشتەرىنىڭ توپتارى قۇرىلىپ، قاۋىپ ءتوندىرىپ جاتقان جوق».

وتستاۆكاداعى اسكەريدىڭ ايتۋىنشا، ۋكراينا ماسەلەسىنىڭ شيەلەنىسۋى ىشكى كۇشتەردىڭ «جاساندى» جانە «اشكوز» پەيىلدەرىن كورسەتەدى، ال، بولۋى مۇمكىن سوعىس «رەسەيدىڭ مەملەكەت رەتىندە ءومىر ءسۇرۋىن» بەلگىسىز جاعدايعا قالدىرۋى مۇمكىن جانە رەسەيلىكتەر مەن ۋكراينالىقتاردى ماڭگى «بىتىسپەس جاۋعا» اينالدىرادى ءارى كوپتەگەن ادام قۇربان بولادى.

«ءبىزدىڭ ويىمىزشا، ۇكىمەت ەلدى جۇيەلى داعدارىستان شىعارى المايتىنىن ءبىلىپ... رەسەي مەملەكەتتىلىگىن تۇپكىلىكتى جويۋ جانە ەلدىڭ بايىرعى حالقىن جويۋ ءۇشىن ساياسي باعىتتى جانداندىرۋدى شەشتى»، - دەپ جازىلعان حاتتا. يۆاشوۆ سوعىس بيلىكتى ساقتاپ قالۋ ءۇشىن پايدالانىلاۋى مۇمكىن دەپ ەسەپتەيدى.

قوزعالىس وكىلدەرى ۆلاديمير پۋتيننەن «سوعىس ءورتىن تۇتاندىرۋ قىلمىستىق ساياساتىنان باس تارتىپ» وتستاۆكاعا كەتۋىن سۇرايدى. سونىمەن بىرگە، رەسەي ازاماتتارىنان، اسكەريلەر مەن وتستاۆكاداعى اسكەريلەردەن  «سوعىستى ناسيحاتتاۋعا جانە باستاۋعا بەلسەندى تۇردە قارسى تۇرۋدى» وتىنەدى.

يۆاشوۆ 1996-2001 جىلدارى رەسەي قورعانىس مينيسترلىگىنىڭ حالىقارالىق اسكەري ىنتىماقتاستىق باس باسقارماسىنىڭ باستىعى بولدى. وتستاۆكاداعى گەنەرال باتىستى ۇنەمى سىنعا الىپ، ناتو-نىڭ شىعىسقا قاراي كەڭەيۋىنە قارسى بولدى. يۆاشوۆ باسقارعان «بۇكىلرەسەيلىك وفيتسەرلەر جيىنى» - كونسەرۆاتيۆتى كوزقاراستارداعى وفيتسەرلەر قاۋىمداستىعى.

باتىس ەلدەرىنىڭ مالىمەتتەرى بويىنشا، رەسەي ۋكراينامەن شەكاراسىندا شامامەن 130 مىڭ اسكەرىن ۇستاپ تۇر. كرەمل سوعىس باستاۋ تۋرالى جوسپارلارىنىڭ  جوق ەكەنىن ايتۋدا.

Abai.kz