بۇگىن ءماجىلىس توراعاسى ەرلان قوشانوۆ پەن قازاقستانعا رەسمي ساپارمەن كەلگەن وزبەكستاننىڭ ولي ماجليس زاڭ شىعارۋ پالاتاسىنىڭ سپيكەرى نۋردينجون يسمويلوۆ پارلامەنتارالىق ىنتىماقتاستىق كەڭەسىن قۇرۋ تۋرالى كەلىسىمگە قول قويدى.     

كەزدەسۋ بارىسىندا ەرلان قوشانوۆ قازاقستان مەن وزبەكستان پرەزيدەنتتەرى قاسىم-جومارت توقاەۆ پەن  شاۆكات ميرومونوۆيچ ميرزيوەۆتىڭ كورەگەن، ساليقالى ساياساتىنىڭ، سونىمەن بىرگە، دوستىق پەيىلدەرىنىڭ ارقاسىندا بۇگىندە ەكى ەل اراسىنداعى ىنتىماقتاستىق وتە جوعارى دەڭگەيگە كوتەرىلگەنىن، سونىڭ ناتيجەسىندە زاڭ شىعارۋ ورگاندارى اراسىنداعى ارىپتەستىك تە جىل سايىن نىعايىپ كەلە جاتقانىن اتاپ ءوتتى.

وعان دالەل رەتىندە ءماجىلىس توراعاسى جاقىندا وزبەكستان پرەزيدەنتىنىڭ ءبىزدىڭ ەلىمىزگە ساپارى بارىسىندا قوس ەل پرەزيدەنتتەرىنىڭ پارلامەنتارالىق ىنتىماقتاستىق تۋرالى كەڭەستى قۇرۋ كەلىسىمىنە قول جەتكىزگەنىن، ونىڭ تاريحي ماڭىزىن  العا تارتا كەلىپ،  ءبىزدىڭ ەلدەرىمىز تاۋەلسىزدىك العان كۇننەن باستاپ، ءبىر-بىرىنە قولداۋ كورسەتىپ، قوس مەملەكەتتىڭ وركەنيەتى جولىندا بەرىك، ۇيلەسىمدى، سىندارلى قارىم-قاتىناس ورناعانىن ايتتى. جاڭا قۇرىلعان كەڭەس ءبىزدىڭ مەملەكەتتەرىمىزدىڭ ىقپالداستىعىنا تىڭ سەرپىن بەرەتىنىن، قول جەتكەن تابىستارىمىزدى ودان ارى تەرەڭدەتىپ، پرەزيدەنتتەرىمىزدىڭ بارلىق سالا بويىنشا كەلىسىمدەرىن ءتيىمدى جۇزەگە اسىرۋعا، زاڭنامالىق ىنتىماقتاستىقتى كۇشەيتۋگە جاڭا جول اشاتىنىن اتاپ ءوتتى.

ءوز كەزەگىندە مارتەبەلى مەيمان بۇل كەلىسىم ارقىلى ەكى ەلدىڭ، سونىڭ ىشىندە، پارلامەنتتار اراسىنداعى ىنتىماقتاستىقتى دامىتۋدىڭ جاڭا كەزەڭى باستالعانىن، زاڭ شىعارۋشى ورگاندار مەملەكەت باسشىلارىنىڭ كەلىسىمدەرىن جۇزەگە اسىرۋ ءۇشىن بار كۇش-جىگەرلەرىن ارنايتىنىن جەتكىزدى.

بيىل قوس مەملەكەت اراسىندا ديپلوماتيالىق قاتىناستىڭ ورناعانىنا تۋرا 30 جىل تولادى. بۇگىندە وزبەكستان قازاقستاننىڭ ءىرى ەكونوميكالىق ارىپتەسى سانالادى. قازاقستاندا وزبەك كاپيتالىنىڭ قاتىسۋىمەن مىڭنان استام بىرلەسكەن كاسىپورىن جۇمىس ىستەيدى.

سونداي-اق، كولىك-لوگيستيكا، قۇرىلىس، ترانزيت جانە تۋريزم باسقا دا سالالاردا ارىپتەستىك الەۋەتى جوعارى.

كەزدەسۋ بارىسىندا ەرلان قوشانوۆ قازاقستان پرەزيدەنتىنىڭ اتىنان نۋردينجون يسمويلوۆقا  باۋىرلاس حالىقتار اراسىنداعى ىنتىماقتاستىق پەن دوستىقتى نىعايتۋعا قوسقان زور ۇلەسى ءۇشىن II «دوستىق» وردەنىن تابىس ەتتى.

Abai.kz