ماسكەۋدە قاسىم-جومارت توقاەۆ پەن ۆلاديمير پۋتين ۇزاق كەلىسسوزدەر جۇرگىزىپ، ونىڭ قورىتىندىسى بويىنشا بىرلەسكەن مالىمدەمە جاسادى. قازاقستان پرەزيدەنتى ەلىمىزدە ەڭ تاڭداۋلى دەگەن رەسەيلىك جوعارى وقۋ ورىندارىنىڭ فيليالدارى اشىلاتىنىن ايتتى. 

مەملەكەت باسشىسى قازاقستاندا ينجەنەرلىك-تەحنيكالىق كادرلارعا دەگەن سۇرانىستى ەسكەرىپ، ءبىلىم بەرۋ سالاسىنداعى ىنتىماقتاستىققا ەرەكشە نازار اۋدارىلعانىن اتاپ ءوتتى.

"كەلىسسوزدەر بارىسىندا ۆلاديمير ۆلاديميروۆيچكە رەسەي فەدەراتسياسىنىڭ ەڭ تانىمال ۋنيۆەرسيتەتتەرىنىڭ، اسىرەسە تەحنيكالىق ۋنيۆەرسيتەتتەرىنىڭ فيليالدارىن قازاقستاندا اشۋعا كەلىسىم بەرگەنى ءۇشىن العىسىمدى ءبىلدىردىم. ولار قازاقستانداعى ءبىلىم بەرۋ سالاسىنا ۇلكەن ۇلەس قوسادى دەپ ويلايمىن.

قازاقستاندا بارشانىڭ اۋزىندا جۇرگەن جوعارى وقۋ ورىندارىنىڭ فيليالدارى اشىلادى. بۇل - ماسكەۋ ينجەنەرلىك-فيزيكالىق ينستيتۋتى، ي.م. گۋبكين اتىنداعى رەسەي مەملەكەتتىك مۇناي جانە گاز ۋنيۆەرسيتەتى، ن.ە. باۋمان اتىنداعى ماسكەۋ مەملەكەتتىك تەحنيكالىق ۋنيۆەرسيتەتى. بۇل ءبىلىم سالاسىنداعى ءوزارا قولداۋدىڭ وتە سالماقتى ىلگەرىلەۋى دەپ ەسەپتەيمىن", - دەدى قازاقستان پرەزيدەنتى.

Abai.kz