كەشە تىركەلمەگەن دەموكراتيالىق پارتيانىڭ جەتەكشىسى جانبولات ماماي بىرىككەن وپپوزيتسيا قۇرىلعانىن ءوزىنىڭ Facebook پاراقشاسىندا جاريالادى. ول ەل پاتريوتتارىن وداققا قوسىلۋعا شاقىردى.

«ءبىز، قازاقستاننىڭ دەموكراتيالىق كۇشتەرى، حالىق مۇددەسىن قورعاۋ ءۇشىن باس بىرىكتىرىپ، بىرلەسىپ ارەكەت ەتۋگە شەشىم قابىلدادىق.

قاڭتار قىرعىنى تۇسىندا جۇزدەگەن ادام ەشبىر تەرگەۋ مەن سوتسىز اتىلدى، تۇرمەگە قامالدى جانە ادام ايتقىسىز ازاپتاۋعا ۇشىرادى. جىل باسىندا ونداعان مىڭ ادام بەيبىت تۇردە الاڭدارعا شىققان تۇستا، نازارباەۆ — توقاەۆ رەجيمى نارازىلىقتى اسقان قاتىگەزدىكپەن باسىپ، ادام قۇقىعى مەن بوستاندىعىن اياققا تاپتادى، ديكتاتورلىق رەجيم بەيبىت حالىقتى قانعا بوكتىرىپ، بەيبىت ميتينگىلەردى جاۋىزدىقپەن تاراتتى.

وكىنىشكە قاراي، ءدال سول كەزدە نارازىلىقتى باسقارا الاتىن حالىقتىڭ وكىلەتتى ورگانى جانە رەجيم وپپونەنتتەرىن بىرىكتىرە الاتىن ۇيىمى بولعان جوق. ناقتى تالاپتاردى قوياتىن جانە حالىقتى ەرتە الاتىن ۇيلەستىرۋ ورتالىعى نەمەسە وپپوزيتسيالىق كۇشتەردىڭ بىرىككەن كەڭەسى بولمادى.

وپووزيتسيالىق كۇشتەر باس بىرىكتىرۋى ءتيىس دەگەندى حالىق كوپتەن ايتىپ ءجۇر. دەموكراتيالىق كۇشتەردىڭ بىرىككەن ورتالىعىنىڭ قاجەتتىلىگى دە ءسوزسىز. قاڭتاردىڭ باسىنان ءبىز، قازاقستان دەموكراتيالىق وپپوزيتسياسىنىڭ وكىلدەرى، ءوزارا كەلىسسوزدەر جۇرگىزىپ، ءبىراز اقىلداستىق. كوپ ماسەلەنى تالقىلادىق. قوعامدى جىك-جىككە ءبولۋ ءۇشىن بيلىك وسى ارالىقتا وزدەرىن «وپپوزيتسيا» قاتارىنا جاتقىزعىسى كەلەتىن ءتۇرلى سايقىمازاقتاردى شىعارىپ، بىرنەشە ۇيىمدى قۇرىپ ۇلگەردى. ەندى ءبىز باس بىرىكتىرىپ، بەلسەندى ارەكەتكە كوشپەسەك، بۇل ۇلتتىق مۇددەگە قارسى ارەكەت بولا ما دەپ قاۋىپتەنەمىز.

سوندىقتان، ءبىز، قازاقستاننىڭ دەموكراتيالىق وپپوزيتسياسىنىڭ وكىلدەرى، بىرىگۋدىڭ باستالعانىن مالىمدەيمىز. بۇدان بىلاي ءبىز ءبىر تۋدىڭ استىنا جينالىپ، «بىرىككەن قازاق وپپوزيتسياسىنىڭ» اتىنان ارەكەت ەتەمىز”، - دەپ جازدى ول. ماماي بىرىككەن وپپوزيتسيانىڭ نەگىزگى ماقساتى – «قازاقستاندا پارلامەنتتىك باسقارۋ جۇيەسىن ەنگىزۋ» دەپ حابارلادى.

Abai.kz