«شامامەن تاڭعى بەستە ۋكراينانىڭ رەسەي مەن بەلارۋس ايماعىنداعى مەملەكەتتىك شەكاراسىنا بەلارۋستىڭ قولداۋىمەن رەسەي اسكەرلەرى شابۋىل جاسادى. شەكارا بولىمشەلەرىنە، شەكارا قۇرال-جابدىقتارىنا جانە باقىلاۋ-وتكىزۋ پۋنكتتەرىنە شابۋىل جاساپ،  ارتيللەريا، اۋىر تەحنيكا جانە اتىس قارۋى قولدانىلۋدا. بۇل لۋگانسك، سۋم، حاركوۆ، چەرنيگوۆ جانە جيتومير وبلىستارىنىڭ اۋماعىندا بولىپ جاتىر»، - دەلىنگەن ۋكراينانىڭ شەكارا قىزمەتىنىڭ بۇگىنگى حابارلاماسىندا.

سونىمەن قاتار، ۋكراينا اسكەري كۇشتەرىنىڭ مالىمەتىنشە، شابۋىل قىرىم اۋماعىنان بولىپ جاتىر.

«سونداي-اق، جاۋدىڭ ديۆەرسيالىق-بارلاۋ توپتارىنىڭ جۇمىسى انىقتالعان. شەكارا ماڭىنداعى ۋچاسكەلەردەگى جاعدايعا بايلانىستى شەكاراشىلار ۋكراينانىڭ قارۋلى كۇشتەرى جانە ۋكراينانىڭ ۇلتتىق ۇلانىمەن بىرگە جاۋعا وق جاۋدىرۋدا. شەكاراشىلار اراسىنداعى جاراقات تۋرالى ازىرگە ناقتى اقپارات جوق»، - دەيدى شەكارا قىزمەتى.

بۇعان دەيىن رەسەي پرەزيدەنتى ۆلاديمير پۋتين ۋكراينادا ارنايى اسكەري وپەراتسيا جاساۋ تۋرالى شەشىم قابىلداعانىن مالىمدەپ، وعان قارسى سوعىس جاريالادى. ۋكرايناعا باسىپ كىرۋ ونىڭ رەسەيلىك تەلەديدار ەفيرىندەگى قويىلىمى اياقتالعانشا باستالىپ كەتتى. شابۋىل تەڭىزدەن، قۇرلىقتان جانە اۋادان جۇزەگە اسىرىلىپ جاتىر. ۋكراينادا اسكەري جاعداي ەنگىزىلدى. قازاقستاندا ۋكرايناداعى سوعىسقا بايلانىستى اۆياجولاۋشىلار ءۇشىن جەدەل جەلى ىسكە قوسىلدى. سونىمەن قاتار، قازاقستاندىق اۆياكومپانيالارعا ۋكراينا ۇستىنەن ۇشۋعا تىيىم سالىندى. رەسەي قارۋلى قاقتىعىستار ايماعىندا ۋكراينامەن شەكتەسەتىن بارلىق ەلدەرگە اۋە كەڭىستىگىن جابۋدى ۇسىندى.

Abai.kz