بەلارۋستە رەسەي مەن ۋكراينا اراسىندا كەلىسسوزدىڭ ەكىنشى راۋندى اياقتالدى. ۋكراينا پرەزيدەنتى كەڭسەسىنىڭ وكىلى ميحايل پودولياك "بىزگە كەرەك ناتيجەگە قول جەتكىزە المادىق" دەدى.

ول رەسەيمەن گۋمانيتارلىق كوريدور ۇيىمداستىرۋ ءۇشىن ۋاقىتشا اتىستى توقتاتۋ تۋرالى عانا كەلىسىمگە كەلگەندەرىن مالىمدەدى.

"بەيبىت تۇرعىنداردى ەۆاكۋاتسيالاۋ ءۇشىن جانە اتىس بولىپ جاتقان جەرلەرگە ءدارى-دارمەن پەن ازىق-تۇلىك جەتكىزۋ ءۇشىن ۋاقىتشا اتىستى توقتاتۋعا كەلىستى" دەدى پودولياك.

ۋكراينا تارابى كەلىسسوزدىڭ ءۇشىنشى راۋندى قاشان بولاتىنى بەلگىسىز دەيدى.

وسىنىڭ الدىندا رەسەي پرەزيدەنتى ۆلاديمير پۋتين مەن فرانتسيا پرەزيدەنتى تەلەفونمەن سويلەسكەن. ماكروننىڭ رەسمي وكىلى بۇل كەزدەسۋ جايلى بىلاي دەيدى:

"فرانتسيا پرەزيدەنتى قيىندىقتىڭ ءبارى الدا دەپ كۇتەدى. سەبەبى ءپۋتيننىڭ ايتقاندارىنان جىلىمىق كورمەگەن. ول العان بەتىنەن تايماي وتىر. پۋتين الەم ونىڭ شارتىن قابىلدايدى دەپ كۇتەدى. ەگەر ونىڭ شارتىن قابىلداماسا ول ۋكراينانى تولىق باسىپ العانشا شابۋىلدى جالعاستىرا بەرمەك".

ال كرەملدىڭ حابارلاۋىنشا، پۋتين ماكرونمەن تەلەفون ارقىلى سويلەسكەندە ماسكەۋ ماقساتىنا جەتەتىنىنە "سەنىم بىلدىرگەن". بۇعان دەيىن پۋتين ۋكراينا "قارۋسىزدانىپ", بەيتاراپ ستاتۋسقا يە بولۋى كەرەك دەگەن تالاپ قويعان ەدى.

رەسەيدىڭ ۋكرايناداعى باسقىنشىلىق سوعىسى جالعاسىپ جاتىر. بەيسەنبى، 3 ناۋرىزعا قاراعان ءتۇنى ۋكراينانىڭ ونداعان ايماعىندا اۋە دابىلى قاعىلدى. كيەۆ، حاركوۆ سەكىلدى بىرقاتار قالاعا شابۋىل جاسالدى. بەيبىت تۇرعىندار اراسىندا قازا تاپقاندار كوبەيگەنى حابارلانىپ جاتىر.

Abai.kz