گرۋزيا ەۋرووداققا قوسىلۋعا ءوتىنىشتى 3 ناۋرىزدا تاپسىرۋدى جوسپارلاپ وتىر. رەسەي باسقىنشىلىعىنا ۇشىراعان ۋكراينا وسى اپتادا ەۋرووداققا قوسىلۋعا ءوتىنىش ءبىلدىرىپ، ەۋروپارلامەنت ۋكرايناعا ۇمىتكەر مەملەكەت دەگەن مارتەبە بەرۋ جونىندەگى رەزوليۋتسيانى قولداعان.

باسقارۋشى "گرۋزين ارمانى" پارتياسىنىڭ توراعاسى يراكلي كوباحيدزە 2 ناۋرىز كۇنگى ءباسپاسوز ءماسليحاتى كەزىندە پارتيانىڭ "گرۋزيا ەۋرووداققا قوسىلۋعا ءوتىنىشتى دەرەۋ تاپسىرۋ قاجەت" دەگەن ۇيعارىمعا كەلگەنىن ايتتى.

باستاپقىدا گرۋزيا ءوتىنىشتى 2024 جىلى تاپسىرۋدى جوسپارلاعان، بىراق سوڭعى جاعدايعا بايلانىستى ءوتىنىش تاپسىرۋ كەزەڭىن جەدەلدەتۋدى ۇيعارعان.

مولدوۆا پرەزيدەنتى مايا ساندۋ دا ەۋرووداققا مۇشە بولۋعا ءوتىنىش بەرۋ كۇتتىرمەيتىن كۇن تارتىبىندە تۇر دەپ مالىمدەدى.

2 ناۋرىزدا ۋكراينا پرەزيدەنتى ۆلاديمير زەلەنسكي ەۋروپا كەڭەسىنىڭ جەتەكشىسى شارل ميشەلمەن تەلەفون ارقىلى سويلەسىپ، ۋكرايناداعى احۋال مەن ديپلوماتيالىق ءىس-قيمىلداردى تالقىلاعانىن مالىمدەگەن. كيەۆ "ۋكراينانى ەو-عا مۇشەلىككە قابىلداۋ ماسەلەسىندە جاقسى جاڭالىق كۇتىپ وتىر" دەدى زەلەنسكي.

ۋكراينا سىرتقى ىستەر ءمينيسترى دميتري كۋلەبانىڭ ايتۋىنشا، كيەۆ وداققا قوسىلۋ بويىنشا قۇجاتتاردى نەعۇرلىم تەزىرەك اياقتاۋعا كۇش سالعانمەن بارلىعى ەۋرووداقتىڭ ساياسي شەشىمىنە تاۋەلدى.

وداققا قوسىلۋ پروتسەسى ادەتتە جىلدارعا سوزىلادى جانە ول ءۇشىن بىرقاتار قاتاڭ شارتتاردى ورىنداۋ قاجەت. قۇرامىنا 27 مەملەكەت كىرەتىن وداققا جاڭا مۇشە قابىلداۋ بويىنشا داۋىس بەرۋ قۇپيا وتەدى.

يراكلي كوباحيدزە سارسەنبى كۇنى ەۋرووداقتى گرۋزيانىڭ ءوتىنىشىن جىلدام قاراۋعا شاقىردى.

Abai.kz