ناتو تاياۋ 5-10 جىل ىشىندە ۋكراينانى ءوز قاتارىنا قوسىپ الۋ ماسەلەسىن تالقىلاۋعا دايىن ەمەس. كيەۆ بولسا اسكەري اليانسقا "كىرۋ ءۇشىن كۇرەسپەيدى".

بۇل تۋرالى راداداعى "حالىق قىزمەتشىسى" فراكتسياسىنىڭ ليدەرى، ورىس-ۋكراين كەلىسسوزىندە ۋكراينا دەلەگاتسياسىنىڭ قۇرامىندا بولعان داۆيد اراحاميا مالىمدەدى.

"ورىس تاراپپەن كەلىسپەي تۇرعان ءبىر عانا ماسەلە — بۇل قىرىمدى رەسەيدىكى دەپ تانۋ جانە "دونەتسك حالىقتىق رەسپۋبليكاسى" (دحر) مەن "لۋگانسك حالىقتىق رەسپۋبليكاسى" (لحر) دەپ اتالعان جىكشىل ايماقتاردىڭ ەگەمەندىگىن تانۋ",- دەدى اراحاميا.

ول بۇدان بولەك ۋكراينا باسشىلىعىنىڭ شەتەلگە شىعىپ كەتكەنى جايىنداعى اڭگىمەلەرگە پىكىر ءبىلدىردى.

ء"بىز بىرنەشە كۇن بۇرىن سويلەسىپ، سوڭعى مينوتتەرگە دەيىن ۋكراينادا قالۋ جونىندە شەشىم قابىلداعانبىز. ءبىز قۇربان بولساق تا، سيمۆول بولىپ قالامىز، ۋكراين حالقى قاسىق قانى قالعانشا، كۇرەسەدى", - دەدى اراحاميا.

ءوز كەزەگىندە رەسەي پرەزيدەنتى ۆلاديمير پۋتين جەكسەنبى كۇنى فرانتسيا ليدەرى ەممانۋەل ماكرونمەن جانە تۇركيا پرەزيدەنتى رەجەپ تايىپ ەردوعانمەن تەلەفون ارقىلى سويلەستى. وندا پۋتين كەزەكتى رەت "اسكەري وپەراتسيانى" توقتاتۋ ءۇشىن كيەۆ رەسەيدىڭ بارلىق تالاپتارىن ورىنداپ، ورىس اسكەرلەرىنە قارسى سوعىس ارەكەتتەرىن توقتاتۋ كەرەك ەكەنىن، بولماسا وپەراتسيا سوڭىنا دەيىن جالعاسادى دەگەن.

رەسەي اسكەرى ءپۋتيننىڭ بۇيرىعىمەن ۋكرايناعا 24 اقپاندا باسىپ كىردى.

رەسەي ۋكراينادان ناتو-عا كىرۋدەن باس تارتۋ، قىرىمدى رەسەيدىڭ ءبىر بولىگى دەپ تانۋ، سونىمەن بىرگە "دحر" جانە "لحر" ايماقتارىنىڭ ەگەمەندىگىن تانۋدان بولەك، "دەناتسيفيكاتسيا" مەن "دەميليتاريزاتسيانى" دا تالاپ ەتىپ جاتىر.

Abai.kz