قازاقستان قور بيرجاسىندا (KASE) جۇما كۇنى اقش دوللارىنىڭ ورتاشا كۋرسى 504 تەڭگەگە جاقىن بولسا، مەيرامنان كەيىنگى العاشقى ساۋدادا 510 تەڭگەگە جەتتى.

مۇنىڭ الدىندا قازاقستان ۇلتتىق بانكى قور بيرجاسىمەن بىرلەسىپ، تەڭگە-دوللار ۆاليۋتا جۇبى ساۋداسىنىڭ رەگلامەنتىن وزگەرتكەنىن حابارلاعان. "تەڭگە – اقش دوللارى ۆاليۋتا جۇبى ساۋداسى 9 ناۋرىزدا نۇر-سۇلتان ۋاقىتىمەن 15-تە اشىلادى جانە ول فرانكفۋرت اۋكتسيونى فورماتىندا وتەدى. قۇبىلمالىق پەن سىرتقى فاكتورلاردىڭ قىسىمى جاعدايىندا ۆاليۋتا نارىعىندا تۇراقسىزدىق بولدىماۋ ءۇشىن وسىنداي شەشىم قابىلداندى" دەپ مالىمدەدى قازاقستان ۇلتتىق بانكى.

سونىمەن بىرگە 9 ناۋرىزدا ۇلتتىق بانك نەگىزگى ستاۆكانى جىلدىق 13,5 پايىز دەڭگەيىندە قالدىراتىنىن حابارلادى. ءباسپاسوز حابارلاماسىندا ستاۆكانىڭ بۇل دەڭگەيى "ۇلتتىق بانكتىڭ گەوساياسي تاۋەكەلدەر مەن ينفلياتسيالىق پروتسەستەردىڭ جىلدامداۋ قاۋپىنە بەرگەن جاۋابى" ەكەنى ايتىلعان. بۇعان قوسا، "ىشكى جانە سىرتقى ماكروەكونوميكالىق احۋال" ناشارلاعان جاعدايدا مونەتارلىق شارتتاردى قاتايتا تۇسۋگە مۇمكىندىك بار دەلىنگەن.

رەسەي اسكەرى ۋكرايناعا باسىپ كىرىپ، الەم ەلدەرى ماسكەۋگە سانكتسيا سالعان سوڭ ءرۋبلدىڭ قۇنى كۇرت ءتۇسىپ، بۇل تەڭگەنىڭ دوللارعا شاققانداعى باعامىنا دا قاتتى اسەر ەتتى. سوعىس باستالعالى تەڭگەنىڭ كۋرسى تومەندەپ جاتىر.

قازاقستان ۇلتتىق بانكى تەڭگەنى ۇستاپ تۇرۋ ءۇشىن ۆاليۋتا ينتەرۆەنتسياسىن جاساپ جاتىر. ۇلتتىق بانك تەڭگە كۋرسىن ساقتاۋ ماقساتىندا اقپاننىڭ سوڭىنداعى بىرنەشە كۇندە 137 ميلليون دوللار جۇمساعان. 1-5 ناۋرىز ارالىعىندا ۇلتتىق بانك 534,3 ميلليون دوللار ساتتى، رەسمي دەرەك بويىنشا ساۋداداعى ۇلتتىق بانك ۇلەسى 60 پايىز بولدى.

Abai.kz