رەسەي قورعانىس مينيسترلىگى ۋكرايناداعى سوعىسقا اسكەري مىندەتىن وتەۋگە شاقىرىلعان قاتارداعى سولداتتار دا قاتىسقانىن مويىندادى.

«وكىنىشكە قاراي، اسكەرگە شاقىرىلعان قاتارداعى سولداتتاردىڭ ۋكرايناداعى اسكەري وپەراتسياعا قاتىسقانى جايلى بىرنەشە فاكت انىقتالدى. قازىر قاتارداعى سولداتتاردىڭ ءبارى رەسەي اۋماعىنا قايتارىلدى» دەپ مالىمدەدى رەسەي قورعانىس مينيسترلىگى.

ال پۋتين بۇدان بۇرىن ۋكرايناداعى سوعىستا قاتارداعى سولداتتار جوق، وندا تەك قانا كاسىبي اسكەريلەر سوعىسىپ جاتىر دەگەن ەدى. وسىلايشا، رەسەي قورعانىس ءمينيسترى سەرگەي شويگۋ پۋتينگە وتىرىك اقپارات بەرگەن بولىپ تۇر. مۇنى ءپۋتيننىڭ ءباسپاسوز حاتشىسى پەسكوۆتىڭ ءسوزى دە ايقىنداي تۇسەدى.

«ۋكراينادا ارنايى وپەراتسيا باستالعانعا دەيىن پرەزيدەنت جانە جوعارعى قولباسشى ۆ.ءپۋتيننىڭ تاپسىرماسىمەن ۋكرايناداعى كەز كەلگەن تاپسىرماعا قاتارداعى ساربازداردى قاتىستىرماۋ تۋرالى نۇسقاۋ بەرىلگەن»، – دەدى پەسكوۆ.

رەسەي پرەزيدەنتى پۋتين بۇل وقيعانىڭ انىق-قانىعىن زەرتتەپ، كىنالىلەردى جاۋاپقا تارتۋدى اسكەري پروكۋراتۋراعا تاپسىردى.

Abai.kz