وسىعان دەيىن ۋكراينادان ەۆاكۋاتسيالانعان 587 قازاقستاندىق كاتوۆيتسا ارقىلى ءتورت رەيسپەن الماتىعا جەتكىزىلگەن.

قازاقستاننىڭ ءسىم 15 ناۋرىزداعى مالىمەتى بويىنشا، ۋكراينادان 822 قازاقستاندىقتىڭ شىعىپ كەتۋىنە كومەك كورسەتىلگەن. ولاردىڭ 726-سى پولشاعا، قالعانى مولدوۆا، رۋمىنيا، ۆەنگريا جانە سلوۆاكياعا بارعان.

قازىر كاتوۆيتسا قالاسىندا جانە ۋكراين-پولياك شەكاراسىندا قازاق ازاماتتارى جوق. ۋكراينانىڭ حاركوۆ قالاسىندا ءۇش، سۋمى قالاسىندا ءبىر قازاقستاندىق قالعان. ولار قازاقستان ەلشىلىگىمەن ۇنەمى بايلانىستا.

بۇدان بولەك ورىس اسكەرلەرىنىڭ قۇرساۋىندا قالعان ماريۋپول قالاسىندا قازاقستاننىڭ تاعى 18 ازاماتى بار. قالادا ەلەكتر ەنەرگياسى ءسوندىرىلىپ، تەلەفون بايلانىسى بولماعاندىقتان، ولارمەن قازىر بايلانىسۋ مۇمكىن ەمەس.

ءسىم مالىمەتىنە قاراعاندا، ۋكراينا ايماعىندا قالعان 57 جۇك كولىگىنىڭ 51-ءى ولكەدەن شىعىپ كەتكەن.

بۇۇ-نىڭ بوسقىندار ءىسىنىڭ 15 ناۋرىزداعى مالىمەتى بويىنشا، ۋكراينادان 3 ميلليوننان استام ادام بوسقىن رەتىندە شىعىپ كەتكەن.

Abai.kz