"تسەليننىي" سايتىندا جاريالانعان حاتتا مالىمدەمە يەلەرى پرەزيدەنت قاسىم-جومارت توقاەۆتان "قازاقستان مادەنيەتى مەن سپورتى جانە وزگە دە الەۋمەتتىك سالالارعا ماڭىزدى ۇلەس قوسقان قايرات بورانباەۆتىڭ ءىسىن اشىق جۇرگىزۋدى" سۇراعان.
حاتتا قازاقستان مادەنيەتى مەن ونەرىن دامىتۋمەن اينالىساتىن اتالعان ورتالىقتى قايرات بورانباەۆتىڭ اشقانى دا جازىلعان.
"تسەليننىي" مالىمدەمەسى – بورانباەۆتىڭ تەرگەلىپ جاتقانىن دالەلدەيتىن العاشقى رەسمي حابارلاما. 15 ناۋرىزدا جەرگىلىكتى باق قايرات بورانباەۆتىڭ ۇستالىپ، ۋاقىتشا قاماۋ يزولياتورىنا قامالعانىن جازعان. اقپارات بويىنشا، ونى قارجى مونيتورينگ اگەنتتىگى ۇستاعان.
رەسمي ورىندار بورانباەۆتىڭ ۇستالۋىنا بايلانىستى اقپاراتتى تەرىستەگەن جوق، راستامادى دا.
قايرات بورانباەۆ - ەلدىڭ ەكس-پرەزيدەنتى نازارباەۆتىڭ قىزى داريعا نازارباەۆانىڭ بۇرىنعى قۇداسى. بورانباەۆتىڭ قىزى اليما بورانباەۆا داريعانىڭ ۇلى ايسۇلتان نازارباەۆقا (2020 جىلى قايتىس بولعان) تۇرمىسقا شىققان. كەيىن ايسۇلتان مەن اليما اجىراسىپ كەتكەن.
بورانباەۆ Forbes Kazakhstan رەيتينگى بويىنشا، قازاقستانداعى ەڭ باي ەلۋ بيزنەسمەننىڭ قاتارىنا كىرەدى. بايلىعى – 519 ميلليون دوللار. ول 2000-2002 جىلدارى "قازترانسگاز" كومپانياسىنىڭ اتقارۋشى ديرەكتورى جانە "Intergas Central Asia" كوممەرتسيالىق ديرەكتورى، 2006-2014 جىلدارى "قازروسگاز" كومپانياسىنىڭ باس ديرەكتورى بولدى.
بورانباەۆ – الماتىنىڭ "قايرات" فۋتبول كومانداسىنىڭ يەسى. Fitnation فيتنەس كلۋبىنىڭ، "راحات پالاس", Comfort Hotel Astana قوناق ۇيلەرىنىڭ يەسى، Esentai Mall, Esentai Tower بيزنەس ورتالىعىن، "المالى" ساۋدا ورتالىعىن، لاتۆياداعى Jurmala Golf Club & Hotel قوناقۇيىن سەرىكتەسىمەن ءبولىسىپ باسقارادى. McDonalds تاماقتانۋ ورنىنىڭ قازاقستانداعى جانە رەسەيدەگى فرانچايزينگ يەسى.
ونىڭ بريتانيا، چەحيا، رەسەيدە قىمبات ۇيلەرى بارى دا بەلگىلى بولعان.
بورانباەۆ قاراعاندىداعى فارماتسەۆتيكالىق كەشەنىن دە باقىلايدى. قازاقستان بيلىگى "سپۋتنيك V" ەكپەسىن قاراعاندى فارمكەشەنىندە شىعارۋ ءۇشىن 15 ميلليارد 175 مىڭ تەڭگە بولگەن.
بورانباەۆ جايلى حابار نازارباەۆتىڭ نەمەرە ءىنىسى قايرات ساتىبالدىۇلى ۇستالعاننان كەيىن ەكى كۇننەن كەيىن شىقتى. 13 ناۋرىزدا جەمقورلىققا قارسى اگەنتتىك ساتىبالدىۇلىن شەتەلگە ۇشپاق بولعان جەرىنەن ۇستاعانىن حابارلاعان. 15 ناۋرىزدا سوت قايرات ساتىبالدىۇلىن ەكى ايعا قاماعان. ول "قازاقتەلەكوم" كومپانياسىنان اسا ءىرى كولەمدە اقشا جىمقىردى دەگەن كۇدىككە ءىلىندى.
Abai.kz
