قاردىڭ ەرۋىنەن بولعان سۋ تاسقىنىنان باتىس قازاقستان وبىلىسىندا بىرنەشە ەلدى مەكەن سۋ استىندا قالدى.

قر توتەنشە جاعدايلار مينيسترلىگى: «بقو جانىبەك اۋدانى جاقسىباي ەلدى مەكەنىندە سۋ باسۋ سالدارىنان 108 باس مال قىرىلدى»، -دەپ اقپارات بەردى. ۆەدومستۆو مالىمەتىنشە، سۋ تاسقىنى باستالعاننان بەرى 8 ەلدى مەكەندە 184 تۇرعىن جانە 15 ساياجاي ۇيلەرى، 2 الەۋمەتتىك نىسان ەرىگەن قار سۋىنىڭ استىندا قالدى. پاۆلودار جانە اقتوبە وبلىستارىنداعى 43 ۇيدەن سۋ بۇرىلدى.

«841 ادام الدىن الا ەۆاكۋاتسيالاندى، ونىڭ ىشىندە 430-ى ۋاقىتشا ەۆاكۋاتسيالاۋ پۋنكتتەرىندە، 411-ءى تۋىسقاندارىندا ورنالاستىرىلدى. سۋ باسقان 141 تۇرعىن جانە 15 ساياجاي ۇيلەرى باقىلاۋدا»، - دەدى مينيسترلىك.

بۇعان دەيىن 3 ساۋىردە وتكەن بريفينگتە، بقو اكىمىنىڭ ورىنباسارى تەمىرحان مەڭدىعاليەۆ: «باتىس قازاقستان وبلىسى اۋماعىندا 140 ءۇيدى، 2 الەۋمەتتىك نىساندى سۋ باسسا، 67 كىشى مال تۇلىگىنىڭ شىعىنى بولدى. سۋ باسقان ۇيلەردەن 749 ادام كوشىرىلدى، ونىڭ ىشىندە 215-ءى بالا. قازىرگى ۋاقىتتا 2 رەسپۋبليكالىق ماڭىزداعى جولدى سۋ شايىپ ءوتتى.   ەكەۋى دە ءبىر تاۋلىك ىشىندە توقتادى. سونىمەن قاتار، وبلىستىق جانە اۋداندىق ماڭىزداعى جولداردى دا  سۋ باسىپ قالدى. ەلدى مەكەندەرگە قاۋىپ ءتونىپ تۇرعان جوق. اۋداندا 267 ادام، 51 بىرلىك تەحنيكا، 6 ءجۇزۋ قۇرالدارى، 13 موتوپومپا جۇمىس جاساۋدا. قالىپتاسقان توتەنشە جاعدايعا بايلانىستى وبلىسىمىزدىڭ 4 اۋدانىندا توتەنشە جاعداي رەجيمى جاريالاندى»، - دەگەن بولاتىن.

بقو بويىنشا توتەنشە جاعدايلار دەپارتامەنتىنىڭ باسشىسى ەرنۇر وتەگەنوۆتىڭ ايتۋىنشا، سۋ تاسقىنى سىرتتان كەلگەن، جاقسىباي اۋىلىنىڭ قاسىندا ەشقانداي قاۋىپ توندىرەتىن وزەن جوق. جاعداي كورشىلەس جاتقان رەسەي فەدەراتسياسىنداعى كۇننىڭ قاتتى جىلىنۋىنان بولىپ وتىر.

«جاقسىباي اۋىلىندا مال شىعىنى بولدى، بىراق سۋ باسۋعا بايلانىستى تولىق ەسەپتەۋلەر وتكىزىلەدى. ەڭ باستىسى، سۋ كەتپەي تۇرعاندا ادام ءومىرىن ساقتاپ قالۋ جانە سۋدى اۋىلدان شىعارۋ بويىنشا جۇمىستار جۇرگىزىلۋدە. اۋدان تاراپىنان كوميسسيا قۇرىلدى، كەلتىرىلگەن زالالدىڭ شىعىندارىن ەسەپتەۋ، الەۋمەتتىك سۇراقتار بويىنشا اۋدان اكىمشىلىگى ءوز تاراپىنان جۇمىستاردى جۇرگىزۋدە»، - دەدى ول.

جەرگىلىكتى بيلىك وكىلدەرى اۋىلان كوشىرىلگەن تۇرعىندار ءۇشىن بارلىق جاعداي جاسالعانىن، ادامدارعا ەش قاۋىپ تۇرماعانىن جەتكىزگەن. قازىرگى ساتتە تۇرعىندارعا كومەك كورسەتۋ ءۇشىن ەرىكتىلەر توبى قۇرىلىپ، كومەك قولىن سوزۋشىلار ءۇشىن ەسەپشوت اشىلعان.

2 ساۋىردە باتىس قازاقستان وبلىسىنىڭ 3 اۋدانىندا سۋ تاسقىنىنا بايلانىستى توتەنشە جاعداي جاريالانعان. قازىر ءبورىلى، قاراتوبە جانە شىڭعىرلاۋ اۋداندارىندا توتەنشە جاعداي بولىپ تۇر. ءساۋىر باستالعالى اقتوبە وبلىسىندا دا سۋ كوتەرىلىپ جاتقانى تۋرالى حابارلار كەلىپ جاتىر. ەرىگەن قار مەن تاسىعان وزەننەن اقتوبە ماڭىنداعى بىرنەشە ەلدىمەكەندى سۋ باسىپ قالعان.

Abai.kz