پرەزيدەنت توقاەۆتىڭ رەيتينگى جاريالانىپتى. ورتالىق كوممۋنيكاتسيالار قىزمەتى جاريالاعان ساۋالنامادا: «قازاقستان حالقىنىڭ 70 پايىزدان استامى پرەزيدەنت توقاەۆتىڭ قىزمەتىنە وڭ باعا بەردى»، - دەپ جازىلعان.

الەۋمەتتىك ساۋالناما بيىل ناۋرىز ايىندا (15-24 ناۋرىز ارالىعىندا) وتكىزىلىپتى. وعان 1863 ادام قاتىسقان (ىرىكتەلگەن). رەسپوندەنتتەر – 15-50 جاس ارالىعىنداعى قر ازاماتتارى.

قورىتىندى مىناداي: رەسپوندەنتتەردىڭ:

- 67,4%-ى پرەزيدەنت توقاەۆقا دەگەن كوزقاراسى ول پرەزيدەنتتىككە كىرىسكەننەن كەيىن عانا وزگەرگەن.

- 42,1%-ى توقاەۆ ەڭ الدىمەن، ازاماتتاردىڭ قۇقىقتارى مەن بوستاندىقتارىن قامتاماسىز ەتۋگە نازار اۋدارۋى كەرەك دەگەن پىكىر بىلدىرگەن.

- 41,4%-ى جالاقى، زەينەتاقى جانە جاردەماقى دەڭگەيىن كوتەرۋ ماسەلەسىن ايتقان.

- 35,3%-ى ازاماتتاردىڭ قاۋىپسىزدىگىن قامتاماسىز ەتۋدى ءسوز ەتكەن.

- 26,3%-ى پرەزيدەنتتىڭ سىبايلاس جەمقورلىققا قارسى كۇرەسكە كوبىرەك كوڭىل ءبولۋى كەرەكتىگىن ايتقان.

- 56,7%-ى پرەزيدەنت قىزمەتىنىڭ نەگىزىندە قاۋىپسىزدىك، الەۋمەتتىك ادىلەتتىلىك (35,9%), تۇراقتى ەكونوميكالىق دامۋ، ءاربىر وتباسىنىڭ اماندىعى، قوعامداعى دوستىق پەن كەلىسىم (26-28%) ماسەلەلەرى بولۋى ءتيىس دەپ ەسەپتەيتىندىكتەرىن بىلدىرگەن.

- 71,3%-ى وپتيميستىك پىكىر ءبىلدىرىپتى. ولار الداعى ەكى جىلدا ۇلكەن وزگەرىستەر ورىن الاتىنىنا سەنىم بىلدىرگەن.

ەندى وسى ساۋالنامانىڭ مىنا تۇسىنا نازار اۋدارىڭىز:

رەسپوندەنتتەرگە «ەڭ ماڭىزدى قۇندىلىق نە؟» دەگەن ساۋال قويىلعان ەكەن.

- 60,2%-ى قاۋىپسىزدىك،

- 34,3%-ى تاۋەلسىزدىك،

- 27,2%-ى مەملەكەت تاراپىنان كومەك،

- 23,1%-ى ادىلدىك،

- 22,5%-ى بوستاندىق،

- 19,6%-ى ءتارتىپ دەگەن جاۋاپتاردى تاڭداعان ەكەن.

سالىستىرۋ ءۇشىن:

ناۋرىز ايىنداعى زەلەنسكيدىڭ رەيتينگى: 93 پايىزدى قۇراپتى. ال ۆلاديمير ءپۋتيننىڭ ناۋرىزداعى رەيتينگى – 79,6 پايىزدى قۇراعان. بۇل ەكەۋىنىڭ جاعدايى تۇسىنىكتى. ءبىر جارىم ايدان اس ۋاقىت بولدى، سوعىس ءجۇرىپ جاتىر. سول سوعىستاعى ساتتىلىكتەر مەن ساتسىزدىكتەر، ەكى پرەزيدەنتتىڭ داعدارىستى كەزەڭدە قابىلداپ جاتقان شارالارى مەن شەشىمدەرى، مەملەكەتتىك مۇددە ت.ب. ەسكەرىلەدى.

ال ءبىزدىڭ رەيتينگ 70 پايىزدى كورسەتىپتى. 2019 جىلعى ۋى مەن ۋشى كوپ سايلاۋدا پرەزيدەنت توقاەۆ 70,96 پايىز داۋىس جيناپ، مەملەكەت تىزگىنىن قولىنا العان ەدى. ودان بەرى تۇپ-تۋرا 3 جىل. جىل باسىنداعى «قاڭتار وقيعاسى»، ودان كەيىنگى اۋىس-تۇيىستەر مەن جاسالعان وتكىر مالىمدەمەلەر، بىرنەشە لاۋازىمدى تۇلعالاردىڭ تۇتقىندالۋى، ەكس-پرەزيدەنتتىڭ اينالاسىنداعى شەندى-شەكپەندىنىڭ قىزمەتتەردەن قۋىلىپ، ەكس-پرەزيدەنتتىڭ وزىنە قاتىستى دا سىني پىكىرلەردىڭ ايتىلۋى، جولداۋداعى ايتىلعان ماسەلەلەر ت.ب. ءسوزسىز رەيتينگكە اسەر ەتەتىنى تۇسىنىكتى. سوندىقتان «قاڭتار وقيعاسىنان» كەيىن رەيتينگتىڭ ءوسۋى بولجامدى ماسەلە. ال ءسىز قالاي ويلايسىز؟

Abai.kz