ەكس-پرەزيدەنت پەن ونىڭ وتباسى مۇشەلەرى جەر، كولىك، باسقا دا مۇلىكتەرى ءۇشىن مەملەكەتكە سالىق تولەمەگەن. ءتىپتى، تولەۋگە مىندەتتى سالىقتى كەشىكتىرگەنى ءۇشىن ايىپپۇل مولشەرى دە ارتقان.

مەملەكەتتىك كىرىستەر كوميتەتىنىڭ حابارلاۋىنشا، نازارباەۆ وتباسىنىڭ مۇشەلەرى قازاقستان بيۋدجەتىنە 500 مىڭ تەڭگەدەي سالىق قارىزى بار. بۇل سومانىڭ ءبىر بولىگى ايىپپۇلدارعا ارنالعان.

نۇرسۇلتان نازارباەۆ الماتى قالاسى المالى اۋدانىنداعى جەر تەلىمىن پايدالانعانى ءۇشىن تولەمەگەن سالىق قۇنى - 4 437,85 تەڭگە.

بۇرىنعى پرەزيدەنتتىڭ جۇبايى سارا نازارباەۆا الماتىنىڭ بوستاندىق اۋدانىندا تىركەلگەن مۇلكىنە سالىق تولەمەي، مەملەكەت قازىناسىنا 40662,4 تەڭگە قارىز بولدى. ونىڭ 2419,43 تەڭگەسى ءوسىمپۇلى ەكەن. ول كەيىنگى كەزدە بۇكىل مۇلكىن قىز كەزىندەگى تەگىنە تىركەگەن.

ءاليا نازارباەۆانىڭ تولەمەگەن جەر سالىعى - 1597,2 تەڭگە، ونىڭ ءوسىمپۇلى 292,96 تەڭگە. سونداي-اق ول الماتى وبلىسى جامبىل اۋدانى سامسى  اۋىلدىق وكرۋگىنەن جەر تەلىمىن الۋ ءۇشىن 1890,16 تەڭگە قارىز بولىپتى.

ەلباسىنىڭ ءىنىسى بولات نازارباەۆ اقمولا وبلىسى بۋراباي اۋدانىنداعى ۋچاسكەسى ءۇشىن مەملەكەتكە 4327,21 تەڭگە قارىز.

ەكس-پرەزيدەنتىنىڭ قارىنداسى ءانيپا نازارباەۆا سالىقتى تولەمەۋدەن باسقا تۋىستارىنان وزىپ كەتىپتى. مەملەكەتتىك كىرىستەر كوميتەتىنىڭ مالىمەتىنشە، ول الماتى قالاسى بوستاندىق اۋدانى بويىنشا تىركەلگەن كولىگىنە سالىق تولەمەي، بيۋدجەتكە 439 621,25 تەڭگە قارىز بولىپ قالعان.

Abai.kz