بۇگىن قر ۇلتتىق قاۋىپسىزدىك كوميتەتى «تىڭشىلىق، مەملەكەتكە وپاسىزدىق، مەملەكەتتىك قۇپيالاردى زاڭسىز جيناۋ جانە جاريا ەتۋ» بويىنشا كۇدىكتىلەردىڭ ۇستالعانى تۋرالى حابارلادى. ۇستالعانداردىڭ ىشىندە شەتەل ازاماتى دا بار.

«قر قك 175-بابىنىڭ 1-بولىگى (مەملەكەتكە وپاسىزدىق جاساۋ), 176-بابى (تىڭشىلىق) جانە 185-بابىنىڭ 3-بولىگى (مەملەكەتتىك قۇپيالاردى زاڭسىز جيناۋ جانە جاريا ەتۋ) بويىنشا قىلمىستىق ىستەر قوزعالدى. قىلمىستىق ىستەرگە «قۇپيا» دەگەن تاڭبا باسىلعان. تەرگەۋگە قاتىستى وزگە اقپاراتتار جاريا ەتىلمەيدى»، - دەلىنگەن قر ۇقك حابارلاماسىندا.

بۇعان دەيىن ۇلتتىق قاۋىپسىزدىك كوميتەتى پرەزيدەنت قاسىم-جومارت توقاەۆ پەن بىرقاتار جوعارى لاۋازىمدى مەملەكەتتىك قىزمەتشىلەرگە قاستاندىق جاساماق بولعان شەتەلدىك بارلاۋ اگەنتىنىڭ ۇستالعانى تۋرالى حابارلاعان بولاتىن. شەتەلدىك بارلاۋ اگەنتى بولىپ ىستەيتىن قازاقستان ازاماتىن ءتىنتۋ كەزىندە شەتەلدىك دىبىس وشىرگىشى بار سنايپەرلىك ۆينتوۆكا، ەسىرتكى زاتتارى جانە ءىرى اقشا سوماسى تاركىلەنگەن. قارۋ قازاقستانعا بولشەكتەلىپ جەتكىزىلگەن.

«الدىن الا تەرگەۋ بارىسىندا قر ازاماتى جوعارىدا كورسەتىلگەن ىستەردى شەتەل مەملەكەتىنىڭ تاپسىرماسى جانە مۇددەسىندە جاساعانىن مويىندادى»، - دەپ حابارلادى كوميتەتتىڭ تاراتقان حابارلاماسىندا.

ەستەرىڭىزگە سالا كەتەيىك، 2022 جىلى 6 قاڭتاردا قازاقستاننىڭ بۇرىنعى ۇقك توراعاسى كارىم ءماسىموۆ پەن ونىڭ ەكى ورىباسارى ۇستالىپ، «مەملەكەتكە وپاسىزدىق جاساۋ» بابى بويىنشا كۇدىككە ىلىنگەن بولاتىن. قازىر ولاردىڭ ۇستىنەن بەس قىلمىستىق ءىس قوزعالىپ جاتىر. ءبىر قىزىعى،  ماسىموۆتىڭ ىسىنە دە «اسا قۇپيا» ءمورى باسىلعان ەدى. ونى ۇقك «سوتقا دەيىنگى تەرگەپ-تەكسەرۋدىڭ باسقا دا دەرەكتەرى قىلمىستىق ءىس جۇرگىزۋ كودەكسىنىڭ 201-بابىنا سايكەس جاريا ەتۋگە جاتپايدى» دەپ تۇسىندىرگەن بولاتىن.

Abai.kz