اقتاۋداعى "ArcelorMittal Tubular Products Aktau" اكتسيونەرلىك قوعامىنىڭ جەتپىستەن اسا جۇمىسشىسى جالاقى كوتەرۋدى تالاپ ەتىپ، بەس كۇننەن بەرى جۇمىستى توقتاتىپ، ەرەۋىلدە تۇر.

ولار 15 ساۋىردە قازاقستان پرەزيدەنتى قاسىم-جومارت توقاەۆ پەن ماڭعىستاۋ وبلىسىنىڭ اكىمى نۇرلان نوعاەۆقا ۆيدەوۇنداۋ جولداپ، ماسەلەگە ارالاسۋىن سۇراعان.

"مەكەمە باسشىلارى تالابىمىز بويىنشا وڭ شەشىم قابىلداماعاندىقتان بەس كۇننەن بەرى ەرەۋىلدە تۇرمىز. ءبىز جۇمىسشىلار اتىنان زاۋىت باسشىلارىنا حات جولدادىق. حاتقا جاۋاپ بەرمەگەندىكتەن ۇندەۋ جولداۋدى ءجون كوردىك. قازىر بارلىق زاتتىڭ باعاسى وسۋىنە بايلانىستى جالاقىمىزدى كوتەرۋىڭىزدى سۇرايمىز" دەيدى جۇمىسشىلار ۇندەۋىندە.

رەسمي سايتتاعى اقپاراتقا قاراعاندا، "ArcelorMittal Tubular Products Aktau" كومپانياسى – "ارسەلورميتتال" كومپانياسىنىڭ قۇبىر شىعاراتىن زاۋىتتارى قۇرامىنا كىرەدى. "بۇل – ديامەترى ۇلكەن بولات قۇبىر شىعاراتىن قازاقستانداعى جالعىز زاۋىت" دەپ جازىلعان سايتىنداعى اقپاراتتا. زاۋىت ونىمدەرى مۇناي مەن تاۋ-كەن ءوندىرىسى سالاسىندا، جول بويىمەن سۋ تاسىمالداۋعا قولدانىلادى. زاۋىت 250 ادامعا دەيىن جۇمىس ىستەيتىن ورتاشا كاسىپورىن سانالادى. 2020-2021 جىلدارى بيۋدجەتكە 1,7 ميلليارد تەڭگە سالىق تولەگەن.

Abai.kz