رەسەي بايقوڭىردا پايدالانىلماعان مۇلىكتى قازاقستانعا بەرەدى، ءبىرىنشى بولىپ بەرىلگەنى - 1990-جىلدارى قۇراستىرىلىپ، وربيتاعا شىعارىلماي قالعان "ەكران-م" سپۋتنيگى مەن ونىڭ قۇرامداس بولىكتەرى. رەسەي ۇكىمەتىنىڭ ءتيىستى بۇيرىعى قۇقىقتىق اقپاراتتىڭ رەسمي ينتەرنەت-پورتالىندا جاريالاندى. بۇل تۋرالى Tengrinews.kzكە سىلتەمە جاساپ Abai.kz حابارلايدى. 

"روسكوسموس" عارىش قىزمەتى جونىندەگى مەملەكەتتىك كورپوراتسيانىڭ ۇسىنىسىنا سايكەس تىزبە بويىنشا جىلجىمالى مۇلىكتى فەدەرالدىق مەنشىكتەن قازاقستان رەسپۋبليكاسىنىڭ مەملەكەتتىك مەنشىگىنە وتەۋسىز بەرۋ تۋرالى ۇسىنىس قابىلدانسىن", - دەلىنگەن قۇجاتتا.

تىزىمدە ەكى پوزيتسيا بار - جيناقتارى جانە قۇرامداس بولىكتەرى بار "ەكران-م" سپۋتنيگىنىڭ ءوزى، سونداي-اق قۇراستىرۋ-قورعاۋ بلوگى، ونىڭ جيناقتارى مەن قۇرىلعىلارى. سپۋتنيكتىڭ دە، بلوكتىڭ دا قۇنى ءبىر رۋبلگە باعالانادى.

بۇل مۇلىكتى قازاقستانعا تاپسىرۋ فەدەرالدى مۇلىكتى باسقارۋ اگەنتتىگى مەن سىرتقى ىستەر مينيسترلىگىنە جۇكتەلگەن.

بۇعان دەيىن رەسەي "بايقوڭىر" عارىش ايلاعىنداعى 16 نىساندى جالعا بەرۋدەن الىپ، 2022 جىلدىڭ سوڭىنا قاراي قازاقستانعا بەرەتىنىن حابارلاعان. اتاپ ايتقاندا، 2022 جىلدىڭ ءبىرىنشى جارتىجىلدىعىندا بۇرىن پايدالانىلماعان "ەكران-م" تەلەكوممۋنيكاتسيالىق سپۋتنيگى جانە بايقوڭىرداعى ءۇش تەحنولوگيالىق جۇيە عارىش ايلاعى وبەكتىلەرىن جالعا بەرۋدەن شىعارۋ اياسىندا قازاقستانعا بەرىلۋى مۇمكىن.

زىمىران-عارىش سالاسىنداعى باسقا دەرەككوزدىڭ ايتۋىنشا، "ەكران-م" سپۋتنيگى عارىش ايلاعىنا جەتكىزىلگەن، بىراق ول ەشقاشان ىسكە قوسىلماعان، ويتكەنى ءدال وسىنداي قۇرىلعىلار جۇيەسى دۇرىس جۇمىس ىستەپ تۇرعان جانە وربيتالىق توپتامانى تولتىرۋدىڭ ءمانى بولماعان. ول ەگەر قۇرىلعى دۇرىس ساقتالسا، وندا ول ءالى دە وربيتادا جۇمىس ىستەۋگە جارامدى ەكەنىن ايتتى.

العاشقى "ەكران-م" سپۋتنيگى 1987 جىلى گەوستاتسيونارلىق وربيتاعا ۇشىرىلعان. قۇرىلعىنىڭ ماقساتى - ءسىبىر مەن قيىر شىعىس وڭىرلەرىنە تىكەلەي تەلەۆيزيالىق حابار تاراتۋدى ۇيىمداستىرۋ. وسىنداي قۇرىلعى كەيىنگى رەت 2001 جىلى عارىشقا جىبەرىلگەن.

Abai.kz