«اق ءۇيدىڭ پايىمداۋىنشا، رەسەي شىعىس جانە وڭتۇستىك قىتاي تەڭىزدەرىندەگى كورشىلەرىمەن اۋماقتىق داۋلاردا قىتايدى قولدايدى،-دەپ جازدى golosameriki.com سايتى.

«رەسەيلىك جانە قىتايلىق ستراتەگيالىق بومبالاۋشىلاردىڭ شىعىس ازياعا بىرىككەن ۇشۋ جاتتىعۋلارىن وتكىزۋى ەكى ەلدىڭ قارىم— قاتىناسىنىڭ قانشالىقتى بەرىك ەكەنىن كورسەتەدى", - دەدى اقش اكىمشىلىگىنىڭ وكىلى.

Reuters اگەنتتىگىنىڭ حابارلاۋىنشا، رەسەي قورعانىس مينيسترلىگى 13 ساعات بويى جاپون جانە شىعىس قىتاي تەڭىزدەرىنىڭ ۇستىنەن قىتايمەن بىرلەسكەن اسپان پاترۋلدەرىن ۇشىرعان. پاترۋلگە رەسەيلىك ستراتەگيالىق تۋ-95 جانە قىتايلىق Xian H-6 بومبالاۋشى ۇشاقتارى قاتىستى. جاپون جانە وڭتۇستىك كورەيا اۋە كۇشتەرىنىڭ ۇشاقتارى ولاردىڭ سوڭىنان ەرە ۇشتى.

رەسەي مەن قىتايدىڭ ستراتەگيالىق اۆياتسياسىنىڭ بىرلەسكەن مۇمكىندىكتەرىن كورسەتۋ اقش پرەزيدەنتى دجو بايدەننىڭ وسى ايماققا ساپارىمەن تۇسپا-تۇس كەلدى. سەيسەنبىدە ول توكيودا جاپونيانىڭ، اۆستراليانىڭ جانە ءۇندىستاننىڭ كوشباسشىلارىمەن ءتورت جاقتى قاۋىپسىزدىك ديالوگى (the Quadrilateral Security Dialogue) اياسىندا كەزدەستى، ونىڭ ماقساتتارىنىڭ ءبىرى - قىتايدىڭ ايماقتاعى ءوسىپ كەلە جاتقان كۇشىنە قارسى تۇرۋ.

بۇل بايدەننىڭ ازياعا پرەزيدەنت رەتىندەگى العاشقى ساپارى. پرەزيدەنت وڭتۇستىك كورەيا مەن جاپونياعا باردى. ساپار بارىسىندا اق ءۇي باسشىسى اقش وداقتاستارىمەن جانە سەرىكتەستەرىمەن بىرگە  ۇندى-تىنىق مۇحيتى ايماعىن قۇرۋعا ۇمتىلاتىنىن ايتتى. قىتاي مەن رەسەي بۇعان دەيىن ستراتەگيالىق بومبالاۋشىلاردىڭ بىرلەسكەن جاتتىعۋلارىن وتكىزگەن بولاتىن. ال، بۇل جولعىسى رەسەيدىڭ ۋكرايناعا شابۋىلىنان كەيىن العاش رەت وتكىزىلىپ تۇر.

"بۇل قىتاي مەن رەسەيدىڭ اسكەري سالادا دا بىرگە تىعىز جۇمىس ىستەۋگە ىنتالى ەكەنىن بىلدىرەدى. قىتاي رەسەيدەن الشاقتاعان ەمەس. قىتايدىڭ رەسەيگە شىعىس جاعىنان كومەكتەسۋگە دايىن ەكەنىن كورۋگە بولادى",-دەدى اقش وكىلى.  سونىمەن بىرگە، ول بومبالاۋشى جاتتىعۋلار رەسەيدىڭ شىعىس جانە وڭتۇستىك قىتاي تەڭىزدەرىندەگى كورشىلەرىمەن اۋماقتىق داۋلارىندا قىتايدى قولدايتىنىن كورسەتتى دەپ سانايدى.

بەيجىڭ مەن ماسكەۋ پۋتين ۋكرايناعا قارسى سوعىستى باستاعانعا دەيىن بىرنەشە اپتا بۇرىن "شەكسىز" سەرىكتەستىككە كەلىسكەندەرى تۋرالى جاريالادى. ال، قىتاي رەسەيدىڭ اگرەسسياسىن ايىپتاۋدان باس تارتتى.

تامىز ايىندا رەسەي فەدەراتسياسى مەن قحر 10 000-نان استام اسكەري قىزمەتشىلەردىڭ قاتىسۋىمەن اۋقىمدى اسكەري جاتتىعۋلار وتكىزدى.

اقش شەنەۋنىكتەرى ازىرگە قىتايدىڭ ۋكرايناداعى سوعىستا رەسەيگە ماتەريالدىق قولداۋ كورسەتىپ جاتقاندىعى تۋرالى اقپارات جوق ەكەنىن ايتادى. اقش رەسمي بەيجىڭگە بۇل قادامى ارقىلى قىتايعا قارسى ۇلكەن سانكتسيالارعا جول اشاتىنىن بىرنەشە رەت ەسكەرتكەن بولاتىن.

Abai.kz