سوتقا كىرىپ بارا جاتقان قازاقستاننىڭ بۇرىنعى دەنساۋلىق ساقتاۋ ءمينيسترى ءبىرتانوۆ كوڭىل-كۇيىءنىڭ جاقسى ەكەنىن ايتىپتى. ول وزىنە سەنىمدى جانە سوڭىنا دەيىن كۇرەسەتىنىن مالىمدەگەن. ءبىرتانوۆ سوت وتىرىسى وتكەنگە دەيىن ءىستىڭ ءمان-جايىن اشۋعا رۇقسات جوق ەكەنىن جەتكىزدى.

بۇرىنعى دەنساۋلىق ساقتاۋ ءمينيسترى ەلجان ءبىرتانوۆتىڭ ۇستىنەن قىلمىستىق ءىس 2020 جىلدان باستاپ قوزعالدى. اۋەلى ونىڭ ورىنباسارى ولجاس ابىشەۆ 2020 جىلدىڭ تامىز ايىندا «اقپاراتتىق جۇيەلەردى قۇرۋعا بولىنگەن 500 ميلليون تەڭگەگە جۋىق اقشانى جىمقىردى» دەگەن كۇدىككە ءىلىنىپ، ۇستالدى. سول جىلدىڭ قاراشا ايىندا ەلجان ءبىرتانوۆ «اسا ءىرى مولشەردە بيۋدجەت قاراجاتىن جىمقىردى» دەگەن كۇدىكپەن ۇستالادى.

«ءبىرتانوۆ ءىسى» بويىنشا تەرگەۋ 2021 جىلدىڭ 7 شىلدەسىندە اياقتالدى. تەرگەۋ نۇسقاسى بويىنشا، ەكس-مينيستر ءبىرتانوۆ پەن ونىڭ ورىنباسارى ولجاس ابىشەۆ جۇمىس ىستەمەيتىن اقپاراتتىق پلاتفورمانى قابىلداپ العان. قازاقستاننىڭ قارجى مونيتورينگى اگەنتتىگىنىڭ دەرەكتەرى بويىنشا ولار مەملەكەتكە 1,5 ميلليارد تەڭگە زالال كەلتىرىلگەن.

ءبىرتانوۆ بارلىق ايىپتاۋلاردى جوققا شىعارعان ەدى. وزىنە تاعىلعان ايىپتاردى قازاقستان تاراپى حالىقتىڭ مۇقتاج بولىگىن ءدارى-دارمەكپەن تەگىن قامتاماسىز ەتۋ ءۇشىن ساتىپ الاتىن «دارىلىك پرەپاراتتاردى ۇرلاۋدىڭ» بولجامدى سحەماسىمەن بايلانىستىرعان. ول بۇل سحەماعا «شەكارا قىزمەتى مەن قۇقىق قورعاۋ ورگاندارىنىڭ رۇحساتىن پايدالانىپ» ءدارى-دارمەكتى شەتەلگە الىپ شىعاتىن ءىرى فارماتسەۆتيكالىق كومپانيالاردىڭ قاتىسى بار ەكەنىن ايتقان.

ەلجان ءبىرتانوۆ دەنساۋلىق ساقتاۋ ءمينيسترى قىزمەتىن 2017 جىلعى قاڭتاردان باستاپ 2020 جىلعى ماۋسىمنىڭ سوڭىنا دەيىن اتقاردى. ونىڭ باسشىلىعى كەزىندە كوروناۆيرۋس ينفەكتسياسى تارالىپ، وتە كۇردەلى ۋاقىتقا تاپ كەلدى. سول كەزدە ءبىرتانوۆ الەۋمەتتىك جەلىدەگى پاراقشاسىندا كوروناۆيرۋستىڭ اسقىنعان تۇرىمەن اۋىرعاندىقتان قىزمەتىنەن بوساتۋ تۋرالى ءوتىنىش بەرگەنىن جازدى.

«بۇگىن مەن مەملەكەت باسشىسىنا دەنساۋلىق ساقتاۋ ءمينيسترى قىزمەتىنەن بوساتۋ تۋرالى ءوتىنىش بەردىم. وكىنىشكە وراي، مەندە پنەۆمونيامەن اسقىنعان كوروناۆيرۋس ينفەكتسياسى بولعاندىقتان، قوسىمشا ەمدەۋ قاجەت. سونىمەن بىرگە، قازىرگى ۋاقىتتا ەلدەگى ەپيدەميولوگيالىق جاعدايدىڭ كۇردەلىلىگى مينيسترلىك دەڭگەيىندە دە، وڭىرلەردىڭ دەنساۋلىق ساقتاۋ سالاسىندا دا سالانىڭ تولىققاندى باسشىلىعى قاجەت دەپ سانايمىن»،- دەگەن ەدى.

Abai.kz