EGov پورتالىندا شەتەلدىكتەرگە جسن بەرۋ قىزمەتى توقتاتىلدى. قىزمەتتىڭ قولجەتىمدىلىگىن قالپىنا كەلتىرۋدىڭ جوسپارلانعان مەرزىمى – 1 قازان. قىزمەتتىڭ توقتاتىلۋ سەبەپتەرى كورسەتىلمەگەن. ىشكى ىستەر مينيسترلىگىنىڭ مالىمەتىنشە، ناۋرىزدان باستاپ 35 782 رەسەي ازاماتى جسن الدى، بۇل وتكەن جىلدىڭ سايكەس كەزەڭىمەن سالىستىرعاندا 16 ەسە كوپ (2230 رەسەيلىك). سونداي-اق، 637 ۋكراينا ازاماتىنا جسن بەرىلگەن، بۇل وتكەن جىلمەن سالىستىرعاندا ءۇش ەسە كوپ (213 ۋكراين).

رەسەي ۋكراينا جەرىنە باسىپ كىرگەننەن كەيىن، باتىستىڭ سانكتسياسىنان جاعدايى كەتە باستاعان نەمەسە ءپۋتيننىڭ سوعىسىن قولدامايتىن رەسەيلىكتەر بۇرىنعى كەڭەستىك ەلدەرگە كوشە باستادى. ۋكراينالىقتار سوعىستان باس ساۋعالاپ، ەلدەن كەتە باستادى. 2022 جىلدىڭ ءبىرىنشى توقسانىندا ەلىمىزگە رەسەيدەن 204 947 ادام كەلگەن. بۇل دەرەكتەر رەسەي فەدەراتسياسىنىڭ بارلىق ۆەدومستۆوارالىق ستاتيستيكاسى جينالاتىن EMISS بۇكىل رەسەيلىك پلاتفورماسىندا جاريالاندى.

EMISS مالىمەتتەرى بويىنشا، بيىلعى جىلدىڭ العاشقى ءۇش ايىندا رەسەيدەن 3 ميلليون 880 مىڭ 679 ازامات كوشىپ كەتتى. بۇل سوڭعى 21 جىلداعى كوشكەن ادامدار سانىنان ءسال عانا از. مىسالى 2000-2021 ارالىعىندا 5 ميلليون رەسەيلىك وزگە ەلگە قونىس اۋدارعان.

2022 جىلدىڭ ءبىرىنشى توقسانىندا رەسەيدەن گرۋزياعا - 38 281 ادام، ارمەنياعا - 134 129 ادام، وزبەكستانعا - 53 084 ادام، تاجىكستانعا - 40 054 ادام كەتتى. ال، قازاقستانعا كەلگەندەر سانى 205 مىڭعا جۋىق.

رەسەي الەمدە اگرەسسيا وشاعى رەتىندە قابىلدانىپ تۇرعان ۋاقىتتا رەسەيلىكتەردىڭ ەلىمىزگە اعىلا كەلۋى «ەڭبەك نارىعىنداعى باسەكەلەستىكتى ارتتىرا ما؟» دەپ، ەل-جۇرتتى الاڭداتىپ قويدى. بۇل تۋرالى سۇراققا ناۋرىز ايىندا بۇرىنعى ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ جاۋاپ بەرگەن بولاتىن. ول الاڭدايتىن دانەڭە جوعىنا سەندىرە سويلەدى.

"بۇگىنگى تاڭدا ءبىز رەسەي تاراپىنان ەڭبەك ميگرانتتارىنىڭ سونشالىقتى ۇلكەن اعىمىن كورىپ وتىرعان جوقپىز. قازىر قازاقستاندا رەسەيدىڭ 100 مىڭعا جۋىق ازاماتى بار. ونىڭ 6 مىڭى 2022 جىلدىڭ باسىنان باستاپ جۇمىسقا كەلگەندەر. كەرىسىنشە جىل وتكەن سايىن قازاقستانعا كەلەتىندەردەن كەتەتىندەر كوپ", - دەگەن ەدى شاپكەنوۆ.

ونىڭ سوزىنشە، قازاقستاندا شەتەلدىك جۇمىس كۇشىنە كۆوتا بەرۋ رەسەي مەن ەاەو-نىڭ باسقا دا ەلدەرىنىڭ ازاماتتارىنا قاراستىرىلمايدى.

"رەسەيلىكتەر جاپپاي كوشىپ كەلگەن جاعدايدا ءبىز نە ىستەيمىز؟ ءبىرىنشى كەزەكتە، ءبىز جۇمىسپەن قامتۋ ورتالىقتارى ارقىلى ءوز ازاماتتارىمىزدى جۇمىسقا ورنالاستىرامىز. ەكىنشىدەن، ازاماتتاردىڭ جەكەلەگەن ساناتتارى - مۇگەدەكتىگى بار ادامدار، كوپ بالالى انالار، جاستاردى جۇمىسقا ورنالاسۋ ءۇشىن جەكە باعدارلامالار بار", - دەدى مينيستر.

كوشىپ كەلۋشىلەردىڭ ايتۋىنشا، رەسەيلىكتەر قازاقستاندى قونىس اۋدارۋعا قولايلى ايماق سانايدى. ونىڭ بىرنەشە سەبەبى بار: ەلدىڭ قاجەتتى دەڭگەيدە دامىعان ەكونوميكاسى، جۇمىس ىستەۋگە قولايلى جاعداي بار، كوشى-قون قاعيدالارىنىڭ ىڭعايلىلىعى ەكەن.

ايتا كەتەيىك، جاقىندا رەسەيلىك ەسترادا ءانشىسى لەۆ لەششەنكونىڭ الماتىداعى حالىققا قىزمەت كورسەتۋ عيماراتىندا جۇرگەن سۋرەتى الەۋمەتتىك جەلىدە تارادى. باسقا وتانداستارى سياقتى ول دە وزىنە قازاقستاندىق جسن جاساتۋعا كەلگەن بولار دەگەن سىبىس پايدا بولدى. الايدا ازاماتتارعا ارنالعان ۇكىمەتتىڭ ءباسپاسوز قىزمەتى دە، لەششەنكونىڭ ءوزى دە قازاقستاننىڭ ازاماتتىعىن الۋ تۋرالى اقپاراتتى راستامادى نە تەرىستەمەدى.

"مەن بۇرىن پرەمەر-مينيستر بولعان دوسىمنىڭ تۋعان كۇنىنە كەلدىم. بىرگە داستارحانعا وتىردىق، بولدى. رەتى كەلگەن سوڭ، حقكو-عا بەلگىلى ءبىر وپەراتسيانى راسىمدەۋگە باردىم. قازىر ءبارى مەنى وسى جەردە قالادى دەپ جاتىر. ولاي ەمەس، مەن بايقوڭىردان مارسقا ۇشۋعا قۇجات دايىنداتىپ جاتىرمىن. قازاقتار كەلىسىپ قويدى»،- دەپ حقكو-عا  نە ءۇشىن بارعانىن جاسىرىپ، ەكىۇشتى جاۋاپ بەرگەن بولاتىن.

قازتاي جانەركە جاندوسقىزى

Abai.kz