جاقىندا اتى-شۋلى ءبىر جۋرنالدىڭ «قاڭتار وقيعاسىنا» قاتىستى ساۋالنامادان مەملەكەتتىك ىشكى ساياسي توڭكەرىستىڭ ورىن الۋى 20%، شەتەلدىك لاڭكەستەردىڭ جوسپارلانعان ارەكەتى 12% دەگەن ساندارعا كوزىم شالدى. راسىندا اتالعان ساندار الدە-قايدا تومەندەتىلىپ كورسەتىلۋى مۇمكىن.

بەيبىت جۇرتتىڭ سۇراعانىن ارانداتىپ كەتكەن جىمىسقى توپتىڭ بولعانى انىق، جانە سول جاعدايدى پايدالانىپ ارانداتۋشىلار مەن مارودەرلاردىڭ دۇربەلەڭدى ۇيىمداسقان تۇردە جۇيەلى پايدالانىپ كەتكەنىن دە مويىنداۋ كەرەكپىز.

بۇندا كەز-كەلگەن ەلدە الەۋمەتتىك تولقۋدى بيلىككە قارسى ارەكەت ەتۋشى ساياسي بەيمالىم توپتىڭ پايدالانىپ كەتۋىن، 7-قاڭتاردان باستاپ جوعارعى دەڭگەيدە قامالا باستاعان لاۋازىمدى تۇلعالاردىڭ قاتىستىلىعى انىقتالىپ، كۇدىككە اينالعانىنان بايقاۋعا بولادى. ونى 16-ناۋرىزداعى جولداۋىندا پرەزيدەنت قاسىم-جومارت توقاەۆ تا ءوز سوزدەرىندە، تەرگەۋلەردىڭ العاشقى ناتيجەلەرىنەن «مەملەكەتتىك توڭكەرىستىڭ» ورىن العاندىعىن، جانە وعان لاۋازىمدى تۇلعالاردىڭ قاتىستىلىعىن رەسمي حابارلادى.

ايتسە دە، وسى قاڭتارداعى دۇربەلەڭدە بەيبىت حالىقتىڭ شەيت بولعانى ءالى دە جۇرەكتى اۋىرتادى. ول كەزدە كىم كىمنىڭ قولىنان قازا تاپتى، قاي قاڭعالاقتاعان وققا ۇشقانىن تاۋىپ، انىقتاۋ قيىن.

وسى رەتتە، پرەزيدەنت 6-قاڭتاردا جاريالاعان توتەنشە جاعدايلاردىڭ بىردەن-ءبىر سەبەبىنە، الگى مەملەكەتتىك توڭكەرىستى جاساۋعا سىرتتان جانە ىشتەن كوپتەن بەرى جوسپارلاپ جۇرگەن جالدامالى لاڭكەستىك توپتى ەندىرىپ، قوعامدا ءوز ىلاڭىن شىعارعانىن ويدان شىعاردى دەپ ايتۋعا كەلمەيدى. ويتكەنى، ءوز كوزىمىزبەن - تۇرقى وزگە ەلدىڭ تۇرپاتىندا، اسكەري-سپورتتىق كيىنىپ دايىندالعان جاساقتاردىڭ قولدارىندا سوڭعى ۇلگىدەگى بايلانىس قۇرالداردى قولدانىپ، بەتتەرىنە بەتپەردە تاعىنىپ، وتە دورەكى قارىم-قاتىناستا جۇرگەندەردەن سول 4-6 قاڭتار كۇندەرى تالايىن كوردىك قوي.

بۇلاردىڭ ۇرلانعان ەكى مىڭنان استام قارۋ-جاراعىنىڭ وڭدى-سولدى بەي-بەرەكەتسىز اتۋىنان، ءبىر ۋاقىتتا بەنزين تاسيتىن كامازداردى، پوگرۋزششيكتەر مەن ارنايى قورعانىس كولىكتەرىن يەمدەنىپ مەملەكەتتىك مەكەمەلەر مەن اكىمدىكتەرگە باعىتتاپ، جۇيەلى قيمىلداۋلارى كوپ نارسەنىڭ جايىن اڭعارتتى. ياعني، ون جەردەن بەيبىت ميتينگ بولىپ باستالعان دۇنيەنىڭ سوڭىن ۇيىمداسقان قارۋلى توپپەن مەملەكەتتىك بيلىكتى قورقىتىپ-ۇركىتىپ، توڭكەرىسكە ۇلاستىرعان قارانيەتتى پيعىلدى جوققا شىعارۋدى، تەك تۇيەنى كورمەس سوقىر عانا شىعار.

البەتتە، كەشەگى قاڭتاردا مەملەكەتتىك توڭكەرىسكە سەبەپكەر بولعان، وتانى مەن ادامي قۇندىلىعى جوق جالدانعان قانىپەزەرلەردىڭ قولىنان بەيبىت تۇرعىنداردىڭ، قۇقىققورعاۋ ورگاندارىنىڭ وتباسىلارىنىڭ دا قايعىعا جۇتىپ، قازالارىن شىعارۋى ءبارىمىزدى وكىندىرەدى. بۇل جايىندا پرەزيدەنت تە بىرنەشە مىنبەرلەردەن قىنجىلا حابارلاپ وتىردى. ەندىگى ماسەلە، سول ارەكەتتەرگە جاۋاپتى تەرگەلۋشىلەردىڭ العاشقى تەرگەۋ شەشىمدەرىنەن قوعامدى حاباردار ەتىپ تۇرۋى ابزال.

ەكىنشىدەن، اشىقتىق ءپرينتسيپىن دە بۇگىنگى قولعا الىنعان ساياسي رەفورمالاردىڭ ويداعىداي ورىندالۋىنا جۇمىلا كىرىسىپ، ەكىنشى قايتا مەملەكەتتىك توڭكەرىستەرگە ۇلاستىراتىن قاڭتار وقيعالارىن قايتالاتپاۋ ءلازىم. بيلىككە دەگەن سەنىمدىلىكتى قالىپتاستىرۋدا پرەزيدەنتتىڭ ۇنەمى كوتەرىپ جۇرگەن ادىلدىك پەن ادالدىق ۇعىمدارىنا جان بىتىرەتىن - كونستيتۋتسيالىق رەفورمالاردى ءىس-جۇزىندە ورىندايتىن حالىقپەن، ءوزارا ەستىپ تۇسىنىسەتىن، ارەكەتتەسەتىن قوعامدى قالىپتاستىرۋ. بۇعان كەشەگى مەملەكەتتىك توڭكەرىستىڭ زارداپتارىن بولدىرماۋعا قوعام مەن بيلىك مۇددەلى بولۋى شارت.

ماقسات جاقاۋ

Abai.kz