كەشە 2026 جىلى 13 مامىردا قازاقستان رەسپۋبليكاسى پرەزيدەنتى قاسىم-جومارت توقاەۆ ەلىمىزگە مەملەكەتتىك ساپارمەن كەلگەن تۇركيا پرەزيدەنتى رەجەپ تايپ ەردوعاندى ايرىقشا سالتاناتپەن قارسى الدى.

ەلىمىزدىڭ شەكاراسىنا ەنگەن ساتتەن استانا اۋەجايىنا دەيىن تۇركيا پرەزيدەنتىنىڭ بورتىنا قازاقستان رەسپۋبليكاسى اۋە قورعانىسى كۇشتەرىنىڭ ۇشاقتارى قاپتالداسا ۇشىپ وتىردى.

تۇركيا پرەزيدەنتىنىڭ كەلۋىنە وراي تراپ الدىندا قۇرمەت قاراۋىلى روتاسى ساپ تۇزەدى.

ەكى ەلدىڭ جالاۋشالارىن ۇستاعان بالالار رەجەپ تايپ ەردوعان باستاعان تۇركيا ەلىنىڭ رەسمي دەلەگاتسياسىنا «Ata yurda hoş geldiniz!» – «اتاجۇرتقا قوش كەلدىڭىز!» دەپ ەكى تىلدە قوشەمەت كورسەتتى.

سول ساتتە تۇركيا مەن قازاقستان تۋلارىن جەلبىرەتكەن تىكۇشاقتار الاڭ ۇستىمەن ۇشىپ ءوتتى.

اۋەجاي تەرمينالىندا جاس ونەرپازدار تۇرىك ەلىنىڭ كوشباسشىسىنا ارناپ «دومبىرا» كومپوزيتسياسىن ورىندادى.

مەملەكەت باسشىلارى ەكىجاقتى بايلانىستاردىڭ قازىرگى جاي-كۇيى مەن بولاشاعىن تالقىلايدى.

بۇعان قوسا پرەزيدەنتتەر قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ التىنشى وتىرىسىن وتكىزەدى.

ال 15 مامىردا تۇگەل تۇركىنىڭ رۋحاني ورداسى تۇركىستان قالاسىندا تۇركى مەملەكەتتەرى ۇيىمىنا مۇشە ەلدەر باسشىلارىنىڭ بەيرەسمي ءسامميتى وتەدى.

جيىندا «جاساندى ينتەللەكت جانە تسيفرلىق دامۋ» تاقىرىبى تالقىلانادى.

تۇركيا – تۋىسىمىز!

بىزگە ەڭ جاقىن، تۋىس ەل تۇرىك رەسپۋبليكاسى 1991 جىلى 16 جەلتوقساندا  قازاقستان تاۋەلسىزدىگىن جاريالاعاندا 45 مينۋتتان كەيىن  تاۋەلسىزدىگىمىزدى ەڭ العاش  تانىعان ەل.

تۇركيامەن ديپلوماتيالىق بايلانىستار 1992 جىلى 2 ناۋرىزدا ورنادى.

قازاقستاننىڭ العاشقى ەلشىلىگى 1992 جىلى قازاندا انكارادا اشىلدى.

قازاقستاندا اشىلعان العاشقى ەلشىلىك تە – 1992 جىلى 12 ساۋىردە جۇمىس باستاعان تۇركيا ەلشىلىگى بولدى.

تۇركيانىڭ باعىنا بىتكەن الەمگە ايگىلى بىرەگەي تۇلعا مۇستافا كەمال اتاتۇرىكتىڭ ەرەن ەرلىگىمەن 1923 جىلى 29 قازاندا تۇركيا رەسپۋبليكاسى قۇرىلدى.

تۇركيا حالقىنىڭ سانى وسىدان 3 جىل بۇرىن 82 ميلليوننان استى.

پرەزيدەنتى الەمگە ايگىلى ساڭلاق ساياساتكەر رەجەپ ەردوعان.

اينالاسىن ءتورت تەڭىز قورشاعان تۇركيا مەملەكەتى ءتورت قۇبىلاسى تۇگەل، تورتكۇل دۇنيە ساناساتىن قۋاتتى ەل.

«بايراقتار» درونىمەن الەمگە ايگىلى، اسكەرىنىڭ جالپى سانى 1 054 750 ادامعا جەتەتىن تۇركيا قارۋلى كۇشتەرى سانى جاعىنان ناتو-دا ەكىنشى، امەريكا قۇراما شتاتتارىنان كەيىنگى ورىندا تۇر.

تۇركيا ءبىزدىڭ تاۋەلسىزدىگىمىزدى 45 مينۋتتا-اق ءبىرىنشى بولىپ تانىعان، تۋىس ەل بولعاندىقتان دا حالقىمىزدىڭ قۇرمەتى الابوتەن ەرەكشە.

تۇرىك ەلدەرى بولاشاعىنا الاڭداعان اتاتۇرىك سوناۋ 1933 جىلى نە دەپ ەدى؟! «بۇگىن كەڭەس وداعى – ءبىزدىڭ دوسىمىز، كورشىمىز، وداقتاسىمىز. وسى دوستىققا مۇقتاجىمىز بار. الايدا، ونى ەرتەڭ نە كۇتىپ تۇرعانىن بۇگىن ەشكىم كەسىپ ايتا المايدى. قۇددى وسمان نەمەسە اۆستريا-ۆەنگريا يمپەريالارى سياقتى بولشەكتەنىپ، ۇساقتالۋى عاجاپ ەمەس. بۇرىن جۇدىرىعىنان جىبەرمەي ۇستاعان حالىقتار الاقانىنان شىعىپ كەتۋى ابدەن مۇمكىن. دۇنيە جاڭا تەپە-تەڭدىككە ۇلاسۋى كادىك. مىنە، سول كەزدە تۇركيا نە ىستەۋ كەرەكتىگىن ءبىلۋى ءتيىس. وسى دوسىمىزدىڭ قول استىندا ءتىلى، سەنىمى، تاعدىر-تاۋقىمەتى ءبىر باۋىرلارىمىز بار. ولارعا سول ساتتە قول سوزۋعا ءازىر وتىرۋىمىز قاجەت. ءازىر بولۋ – سول كۇندى ءۇنسىز كۇتۋ ەمەس. دايىندالعان ءجون. حالىقتار بۇعان قالاي ازىرلەنەدى؟ رۋحاني كوپىرلەردى ساقتاي وتىرىپ. ءتىل – ءبىر كوپىر... سەنىم – ءبىر كوپىر... تاريح – ءبىر كوپىر... تامىر-تەگىمىزگە ورالىپ، سان قيلى وقيعالارمەن سوگىلگەن تاريحىمىزدى تۇگەندەۋگە ءتيىسپىز. ولاردىڭ (سىرتتاعى تۇرىكتەر) بىزگە جاقىنداۋىن كۇتە المايمىز. ءبىز ولارعا جاقىنداۋىمىز .قاجەت»، – دەگەن ەدى اسىل تۋعان اتاتۇرىك وسىدان 93 جىل بۇرىن.

تۇركيانىڭ تۋىسقان قازاق ەلى ازاتتىعىن العاشقى بولىپ مويىنداۋى - اتاتۇرىكتىڭ سول 1933 جىلى تۇرىك حالقىنا ايتقان اسىل اماناتىن ادال ورىنداۋى.

تۇركيانىڭ قازاقستاننىڭ ەكونوميكاسىنا، ءبىلىمى مەن مادەنيەتىنە، رۋحانياتىنا قوسىپ جاتقان ۇلەسى زور.

وتكەن عاسىردىڭ 50-ءشى جىلدارى قىتايداعى شىعىس تۇركىستاننان قازاقتار گيمالاي اسىپ، تار جول، تايعاق كەشۋ ارقىلى اۋا كوشىپ، پاكىستان پەن ءۇندى ەلىنە بارىپ كىدىرگەنىن بىلەمىز.

ارتىنان ولارعا قول ۇشىن سوزىپ، باۋىرىنا العان تۇركيا ەدى.

Abai.kz