مارقۇم ديسسيدەنت اقىن ارون اتابەكتى اقتاۋ تۋرالى پەتيتسياعا پرەزيدەنت اكىمشىلىگى جاۋاپ بەرمەي وتىر. بۇل تۋرالى مارقۇمنىڭ قىزى الما نۇتىشەۆا الماتىدا وتكەن ءباسپاسوز جيىنىندا حابارلادى.

ونىڭ ايتۋىنشا، پەتيتسيانىڭ حات تۇرىندەگى نۇسقاسىن اقوردا قابىلداپ العان. بىراق ازىرگە ءۇنسىز.

«بۇل حات جوعالىپ كەتكەن جوق. كىرىس ءنومىرىن الدىم. 3 ماۋسىمعا دەيىن پرەزيدەنت اكىمشىلىگى شاڭىراق وقيعاسى مەن اقتاۋ ءىسى بويىنشا جاۋاپ بەرۋى كەرەك. اكەمنىڭ قولىن سىندىردى، ۇرىپ-سوقتى. قاماۋدا دۇرىس تاماق بەرمەدى. وسى مازاقتىڭ ءبارى جاڭادان شىعاتىن كىتاپتا باياندالادى»،-دەدى الما نۇتىشەۆا.

جاقىندا ارون اتابەكتىڭ قاماۋدا وتىرعاندا جازعان شىعارمالارى كىتاپ بولىپ باسىلىپ شىعادى. Egov.press سايتىندا پرەزيدەنتتىڭ اتىنا جاريالانعان ارون اتابەكتى اقتاۋ تۋرالى پەتيتسياعا 2395 ادام قولداۋ ءبىلدىرىپ، قول قويعان. قوعام بەلسەندىلەرى بۇل ماسەلەنى جەكەلەگەن تۇلعالار عانا ەمەس، قوعام بولىپ كوتەرۋ قاجەتىن ايتتى. ولار پرەزيدەنت توقاەۆ باستاعان بيلىك «كىنالىلەردى تاۋىپ، جازاعا تارتسىن»، دەپ تالاپ ەتىپ وتىر.

ارون اتابەك 15 جىلدان استام ۋاقىت تۇرمەدە وتىردى. ول 2006 جىلعى "شاڭىراق" وقيعاسىنان كەيىن 18 جىلعا سوتتالعان. سوت اتابەكتى "شاڭىراق" وقيعاسى كەزىندە قازا تاپقان پوليتسيا قىزمەتكەرىنىڭ ولىمىنە ايىپتى دەپ تانىعان.

Abai.kz