كەز كەلگەن مەملەكەت ءۇشىن ءبىلىم اسا ماڭىزدى. بۇل ەڭ كوپ قارجى بولىنەتىن سالا جانە مەكتەپ وقۋشىلارىنىڭ جەتىستىگى، بولاشاق ستۋدەنت پەن قىزمەتكەردىڭ قانداي بولاتىنىن ايقىندايدى. قازاقستان ءبىلىم بەرۋگە بارىنشا ءمان بەرىپ كەلەدى. الماتى قالاسى قازاقستان بويىنشا وقۋشىلار سانى بويىنشا ءبىرىنشى ورىندا جانە ءبىلىم دەڭگەيى بويىنشا دا كوش باسىندا. وتكەن وقۋ جىلىندا دا الماتى وقۋشىلارى تولاعاي تابىستارعا قول جەتكىزدى. بۇل ارتىق ايتقانىمىز ەمەس.

قالادا 230 مىڭنان استام بالانى قامتيتىن 20 اۋقىمدى شىعارماشىلىق فەستيۆال، فورۋمدار، كونكۋرستار، سلەتتەر مەن كورمەلەر وتكىزىلدى.

2021-2022 وقۋ جىلىندا الماتى قالاسى مەكتەپتەرىنىڭ 30 مىڭنان استام وقۋشىسى 85 قالالىق، 57 رەسپۋبليكالىق، 18 حالىقارالىق زياتكەرلىك وليمپيادا مەن كونكۋرسقا قاتىستى، ونىڭ قورىتىندىسى بويىنشا 4 045 وقۋشى جەڭىمپاز جانە جۇلدەگەر اتاندى.

16 ءپان بويىنشا جبب جىل سايىنعى ەڭ باستى رەسپۋبليكالىق وليمپيادانىڭ قورىتىندىسى بويىنشا الماتى قالاسىنىڭ كومانداسى 1 ورىندى يەلەنىپ، «ۇزدىك وليمپيادالىق كوماندا-2022» اتاندى، جالپى ءبىزدىڭ وقۋشىلار 88 جۇلدەلى ورىنعا: 16 التىن، 27 كۇمىس جانە 45 قولا مەدالعا يەم بولدى.

الماتى قالاسىنىڭ قۇراما كومانداسى عىلىمي جارىستاردىڭ قورىتىندىسى بويىنشا دا الدا كەلەدى. بيىل رەسپۋبليكالىق عىلىمي جوبالار بايقاۋىندا وقۋشىلار 51 مەدال جەڭىپ الدى، ونىڭ ىشىندە 7 التىن، 12 كۇمىس جانە 31 قولا، ناتيجەسىندە رەسپۋبليكا بويىنشا جالپى كوماندالىق ەسەپتە 1 ورىن الدى.

اعىمداعى جىلى الماتى قالاسىندا سپورتتىڭ 10 ءتۇرى بويىنشا ۇلتتىق مەكتەپ ليگاسىنىڭ ىرىكتەۋ كەزەڭدەرى ءوتتى، وندا 5-11 سىنىپتىڭ 97 مىڭنان استام وقۋشىسى قاتىستى.

2022 جىلدىڭ مامىر-شىلدە ايلارى ارالىعىندا ۇلتتىق مەكتەپ ليگاسىنىڭ رەسپۋبليكالىق كەزەڭى وتكىزىلەدى. بۇگىندە الماتى مەكتەپتەرىنىڭ وقۋشىلارىنىڭ قورجىنىندا جالپى كوماندالىق ەسەپتە 2 ءبىرىنشى، 1 ءۇشىنشى ورىن بار.

فرانتسۋز نورماندياسىندا 2022 جىلدىڭ 14-22 مامىر ارالىعىندا سپورتتىڭ 20 ءتۇرى بويىنشا بۇكىلالەمدىك گيمنازيادا ءوتتى. بۇل 16-18 جاستاعى مەكتەپ وقۋشىلارى ءۇشىن ۇلكەن مۋلتيسپورتتىق وقيعا. قازاقستان رەسپۋبليكاسىنىڭ قۇراماسى العاش رەت قاتىسىپ، 85 مەدالعا يە بولدى، ونىڭ ىشىندە 32 التىن، 32 كۇمىس جانە 21 قولا. ەل قۇراماسى جالپىكوماندالىق ءۇشىنشى ورىنعا يە بولىپ، كوشباسشىلار ۇشەندى. قازاقستان رەسپۋبليكاسى قۇراماسىنىڭ ىشىندەگى 25 سپورتشى الماتى قالاسىنىڭ وقۋشىلارى، ولار دۇنيەجۇزىلىك گيمنازيادانىڭ چەمپيوندارى مەن جۇلدەگەرلەرى اتاندى.

بيىلعى وقۋ جىلىندا حالىقارالىق دەڭگەيدەگى ءتۇرلى شىعارماشىلىق فەستيۆال مەن بايقاۋعا الماتى قالاسىنان 4 مىڭنان استام وقۋشى قاتىسىپ، ولاردىڭ قورىتىندىسى بويىنشا بارلىعى 137 جۇلدەلى ورىنعا يە بولدى: گران پري - 33, 1 ورىن - 31, 2 ورىن - 42, 3 ورىن - 31. 13 رەسپۋبليكالىق شىعارماشىلىق بايقاۋلار مەن فەستيۆالدەرگە 2 مىڭنان استام بالا قاتىسىپ، 1 ورىن - 12, 2 ورىن - 18, 3 ورىن - 15 يەلەندى.

الماتى وقۋ جىلىن وسىنداي تابىستارمەن اياقتادى. كەلەر جىلدان ءۇمىت كوپ. وقۋشىلاردى دايىنداۋ مەن ولارعا تاربيە مەن ءبىلىم بەرۋدە قالا تاعى دا العا شىعۋدى جوسپارلاپ وتىر.

Abai.kz