ەكس-پرەزيدەنت نۇرسۇلتان نازارباەۆتىڭ تۋىسقانى، نەمەرە ءىنىسى سامات ءابىش «قاڭتار وقيعاسى» بويىنشا تەرگەلىپ جاتىر ەكەن. بۇل تۋرالى «ulysmedia.kz» سايتى جازدى.

قر ۇلتتىق قاۋىپسىزدىك كوميتەتى توراعاسىنىڭ ورىنباسارى اسقار ءامىرحانوۆتىڭ ايتۋىنشا، «قاڭتار وقيعاسى» بويىنشا تەرگەۋ امالدارى ءجۇرىپ جاتىر. سونىڭ ىشىندە سامات ابىشتەن دە جاۋاپ الىنىپ جاتىر. الايدا، ءامىرحانوۆ مىرزا سامات ءابىش كۇدىكتى مە، كۋاگەر مە، ول جاعىن ناقتىلاپ ايتپاپتى.

«سامات ءابىش تەرگەۋ وربيتاسىندا. ول جاۋاپ بەرىپ جاتىر. ونىڭ ستاتۋسىن بىلمەيمىن جانە ول ءدال قازىر قازاقستاندا ەكەنىن بىلەمىن. س. ءابىشتى ءوزىم كورمەدىم. مەنىڭ ويىمشا، تەرگەۋ امالدارى ءجۇرىپ جاتىر. وسى ورايدا ول سوندا بولۋى كەرەك»، - دەپتى اسقار ءامىرحانوۆ.

سامات ءابىش 43 جاستا. اسكەري شەنى – گەنەرال-لەيتەنانت. ساتىبالدى نازارباەۆتىڭ ۇلى. ەكس-پرەزيدەنت نۇرسۇلتان نازارباەۆ اۋلەتىندەگى بەدەلدى ساياسي فيگۋرالاردىڭ ءبىرى بولعان. 2015 جىلدان بەرى قر ۇقك توراعاسىنىڭ ورىنباسارى قىزمەتىندە جۇرگەن. 2022 جىلدىڭ 17 قاڭتارىندا قىزمەتىنەن الىنعان.

سامات ءابىش قاسىرەتتى قاڭتار وقيعاسىنان كەيىن ۇقك-نىڭ ەكس-توراعاسى كارىم ماسىموۆپەن بىرگە قىزمەتىنەن الىندى دەگەن اقپارات شىققان. كەيىن ۇقك بۇل اقپاراتتى اۋەلى تەرىستەپ، كەيىن سامات ءابىشدىڭ ەڭبەك دەمالىسىنا كەتكەنىن حابارلاعان.

ال تۇركيانىڭ «Türkiye» باسىلىمى سامات ءابىشتى «قاڭتارداعى الماتىداعى «جاپپاي تارتىپسىزدىكتەردى» ۇيىمداستىرۋشى» دەپ اتاعان.

قازىر ۇقك-ءنىڭ ەكس-توراعاسىنان بولەك، ءماسىموۆتىڭ ءۇش بىردەي ورىنباسارى دا قاماۋدا وتىر. ولار: مارات وسيپوۆ، داۋلەت ەرعوجين مەن ءانۋار سادىقۇلوۆ.

وسىعان دەيىن قر باس پروكۋرورى بەرىك اسىلوۆ «قاڭتار وقيعاسىنا» سامات ءابىشتىڭ قاتىسى جوق دەپ مالىمدەگەن.

Abai.kz