وزبەكستان سىرتقى ميگراتسيا جونىندەگى اگەنتتىگى وزبەك ەڭبەك ميگرانتتارىنا رەسەيدە جۇمىس تاڭداعان ۋاقىتتا ساق بولۋعا كەڭەس بەردى.

"بىرقاتار جاڭالىق ارنالارى وزبەكستان مەن قىرعىزستان ازاماتتارىن جالاقىسى جوعارى جۇمىسقا رەسەيگە شاقىرعان. مۇنداي جارنامالاردىڭ باستى ماقساتى - ازاماتتاردى رەسەي مەن ۋكراينا اراسىنداعى جانجال اۋماعىنا تارتۋ. سول سەبەپتى وتانداستارىمىزدان شەتەلگە جۇمىسقا شاقىراتىن رەسمي ەمەس جارنامالارعا سەنبەۋىن سۇرايمىز", - دەلىنگەن اگەنتتىك حابارلاماسىندا.

بۇعان قوسا، اگەنتتىك شەتەل اۋماعىندا قارۋلى جانجالدارعا نەمەسە اسكەري ارەكەتتەرگە ماتەريالدىق تابىس ءۇشىن جالدانعاندار قىلمىستىق جاۋاپقا تارتىلاتىنىن ەسكەرتتى.

بۇنىڭ الدىندا MediaHub جۋرناليستىك زەرتتەۋ ورتالىعى وزبەك جانە قىرعىز ازاماتتارىن رەسەيدىڭ "ۆاگنەر" جەكەمەنشىك اسكەري كومپانياسىنا تارتىپ جاتقانى تۋرالى ماتەريال جاريالادى. زەرتتەۋ اۆتورلارىنىڭ مالىمەتىنشە، وزبەكستان مەن قىرعىزستان ازاماتتارىنا ۋكرايناداعى سوعىسقا قاتىسقانى ءۇشىن 240 مىڭ رۋبل ايلىق ۇسىنعان.

Abai.kz