رەسەي قاۋىرسىزدىك كەڭەسى توراعاسىنىڭ ورىنباسارى، رەسەيدىڭ ەكس-پرەزيدەنتى دميتري مەدۆەدەۆتىڭ «ۆكونتاكتە» جەلىسىندەگى پاراقشاسىندا: «قازاقستان «جاساندى مەملەكەت» دەگەن جازبا جاريالادى.

سونداي-اق: «سولتۇستىك پەن وڭتۇستىك وسەتيا، ابحازيا مەن گرۋزيانىڭ قازىرگى اۋماعى ءبىر مەملەكەتكە، رەسەي قۇرامىنا كىرگىزەلەدى»، - دەپتى.

«كەڭەس وداعى ىدىراعانعا دەيىن سولتۇستىك قازاقستان حالقىنىڭ 62.5%-ىن سلاۆياندار قۇرادى. قازاقستان - جاساندى مەملەكەت، بۇرىنعى ورىس تەرريتوريالارى. مىسالى گۋرەۆ، سەمەي، ءتىپتى الماتى قالالارى 1924 جىلعا دەيىن ۆەرنىي دەپ اتالدى. قازىرگى ۋاقىتتا قازاقستان بيلىگى رەسپۋبليكا ىشىندە ءتۇرلى ەتنوستىق توپتاردى كوشىرۋ جونىندەگى باستامالاردى ىسكە اسىرا باستادى، مۇنى ورىستارعا جاسالعان گەنوتسيد دەپ باعالاۋعا بولادى. ءبىز بۇعان كوز جۇما المايمىز. ورىستار كەلمەيىنشە، ءتارتىپ ورنامايدى…»، - دەپ جازدى مەدۆەدەۆ.

مەدۆەدەۆتىڭ اتىنان جاريالانعان جازبادا: «ءبىر كەزدەرى الپاۋىت، قۋاتتى كەڭەس وداعىندا ءومىر سۇرگەن بارلىق حالىق قايتادان دوستىق پەن ءوزارا بىرلىككە كەلىپ بىرگە ءومىر سۇرەدى» جانە «كيەۆ پەن كىشى رەسەيدىڭ بارلىق اۋماقتارى ازات ەتىلگەننەن كەيىن رەسەي مىڭ جىل بۇرىنعى ورىس مەملەكەتى سياقتى قايتادان جەڭىلمەيتىن، ءبىرتۇتاس، كۇشتى مەملەكەتكە اينالادى»، دەپ جازىلعان.

«سودان سوڭ ءبىر جەڭنەن قول شىعارىپ، سلاۆيان حالقى باستاعان ماسكەۋ وتانىمىزدىڭ شەكاراسىن قالپىنا كەلتىرۋ ءۇشىن كەلەسى جورىعىن باستايدى. بارىنە بەلگىلى، ءبىزدىڭ شەكارامىز شەكسىز»،  -دەلىنگەن جازبادا.

بىراق ارتىنشا يمپەرياليستىك يدەياعا ۋلانعان مەدۆەدەۆتىڭ بۇل جازباسى دەرەۋ ءوشىرىلىپتى.

سونداي-اق تەلەگرام ارناسىندا دا جازبامەن بولىسپەگەن. كەيبىر باق كوزدەرىنىڭ حابارلاۋىنشا، مەدۆەدەۆتىڭ اككاۋنتى بۇعاتتالىپ، وسىنداي جازبا پايدا بولعان. دميتري مەدۆەدەۆتىڭ ءوزى اككاۋنتىنىڭ بۇعاتتالعانى جايلى ءالى رەسمي مالىمدەمە جاسامادى. جازبانى ءوزى نە وزگەنىڭ جازعانى ازىرگە بەيمالىم.

ال قازاقستاننىڭ سىرتقى ىستەر مينيسترلىگى رەسەيلىك شەندىنىڭ بۇل سوزدەرىنە قاتىستى ازىرگە ەشقانداي مالىمدەمە جاساعان جوق.

Abai.kz