ەكولوگيا دەپارتامەنتى «قازفوسفات» زاۋىتىندا ورەسكەل زاڭبۇزۋشىلىقتى انىقتاپ، 5 ميلليون تەڭگە ايىپپۇل سالدى. زاۋىتتى ءماجىلىستىڭ بۇرىنعى سپيكەرى نۇرلان نىعماتۋلليننىڭ ۇلدارى قاداعالايدى.

بۇعان دەيىن تارازدا «مينەرالدى تىڭايتقىشتار» زاۋىتىنداعى كۇكىرت قىشقىلىن وندىرەتىن تسەحتا اپات بولىپ، سونىڭ سالدارىنان اۋاعا كۇكىرت تريوكسيدى تاراعان. ەكولوگتار اۋا سىناماسىن زەرتتەگەندە اۋاعا تاراعان فتورلى سۋتەگىنىڭ مولشەرى قالىپتى دەڭگەيدەن 7,5 ەسە ارتقانى انىقتالدى.

«تەكسەرۋ بارىسىندا ەكولوگيالىق زاڭنامانى بۇزۋدىڭ 5 فاكتىسى انىقتالدى. ەكولوگيالىق كودەكستىڭ تالاپتارى ساقتالماعان. زاڭبۇزۋشىلىقتاردى جويۋ تۋرالى نۇسقاما بەرىلدى. كاسىپورىنعا سالىنعان اكىمشىلىك ايىپپۇلداردىڭ كولەمى — 5 ملن تەڭگە»، - دەلىنگەن ەكولوگيا دەپارتامەنتى تاراتقان حابارلامادا.

بەرىلگەن نۇسقامالاردىڭ ورىندالۋى بويىنشا 2022 جىلدىڭ ەكىنشى جارتىجىلدىعىندا كاسىپورىندا جوسپاردان تىس تەكسەرۋ جۇرگىزىلەدى.

بۇدان بۇرىن ەكولوگيا دەپارتامەنتى تاراز ماڭىنداعى حيميا زاۋىتىنىڭ جۇمىسى توقتاتىلۋى مۇمكىن ەكەنىن مالىمدەگەن. كەيىننەن كومپانيا باسشىلىعى زاڭسىز پايدا تاپتى دەگەن كۇدىككە ءىلىندى. باس پروكۋراتۋرا «قازفوسفاتتى» 697 ملن تەڭگە كولەمىندە مونوپوليالىق تابىس تاپتى دەپ ايىپتاپ، تەرگەۋ باستالعانىن جاريالاعان بولاتىن.

Abai.kz