امەريكا سەناتى دەنيەل روزەنبليۋمدى اقش-تىڭ قازاقستانداعى ەلشىسى ەتىپ بەكىتتى، دەپ حابارلادى اقش ەلشىلىگى. بۇعان دەيىن اقش-تىڭ قازاقستانداعى ەلشىسى قىزمەتىن دجۋدي كۋو اتقارىپ كەلگەن.

روزەنبليۋم 2019 جىلدان بەرى اقش-تىڭ وزبەكستانداعى ەلشىسى بولعان. سەنات وزبەكستان ەلشىسى قىزمەتىنە دجوناتان حەنيكتىڭ كانديداتۋراسىن ماقۇلداعان.

ەلشى قىزمەتىنە دەيىن روزەنبليۋم اقش مەملەكەتتىك دەپارتامەنتىنىڭ وڭتۇستىك جانە ورتالىق ازيا ىستەرى جونىندەگى بيۋرودا مەملەكەتتىك حاتشى كومەكشىسىنىڭ ورىنباسارى بولعان. ونىڭ مىندەتىنە اقش ساياساتىن باسقارۋ مەن ورتالىق ازيا ەلدەرىمەن ديپلوماتيالىق قاتىناس ورناتۋ كىرگەن.

اقش مەملەكەتتىك دەپارتامەنتىنە دەيىن روزەنبليۋم ەركىن كاسىپوداق ينستيتۋتى باعدارلاماسىنىڭ (FTUI) اعا ۇيلەستىرۋشىسى بولعان. روزەنبليۋم FTUI-ءدىڭ ماسكەۋ، كيەۆ، الماتى مەن ۆارشاۆاداعى كەڭسەلەرىندە جۇمىس ىستەگەن.

يەل ۋنيۆەرسيتەتىنىڭ تۇلەگى دجون حوپكينس اتىنداعى حالىقارالىق زەرتتەۋلەر مەكتەبىندە سوۆەتتىك زەرتتەۋلەر جانە حالىقارالىق ەكونوميكا سالاسىندا ماگيستر دارەجەسىن العان.

Abai.kz