ۋكرايناعا جەتكىزىلەتىن قارۋ-جاراق اراسىندا 105-ميلليمەترلىك گاۋبيتسا (16 دانا), بارلاۋ ماقساتىندا قولدانىلاتىن Scan Eagle درونى (15 دانا), بروندى تەحنيكا، تانكىلەردى جوياتىن Javelin جۇيەسى (1000 دانا) مەن وعان قاجەت وق-دارىلەر بار.

وسىلايشا اقش-تىڭ رەسەي باسقىنشىلىعى باستالعالى بەرى ۋكرايناعا بەرگەن كومەگى 10,6 ملرد دوللارعا جەتتى.

رەسەيدىڭ ۋكرايناعا باسىپ كىرگەنىنە التى ايعا جۋىقتادى. قازىر رەسەي ارمياسى دونەتسك، لۋگانسك، حەرسون وبلىسىنىڭ ءبىر بولىگى سونىمەن بىرگە زاپوروجەنى باسىپ الدى. اسكەري ساراپشىلار قازىر مايداندا ۇرىس باسەڭدەگەنىن، شابۋىلعا شىعاتىنداي ەكى جاقتا دا دارمەن قالماعانىن ايتادى.

رەسەي بيلىگى "قاقتىعىستى ۋشىقتىرىپ جىبەرەدى" دەپ باتىستىڭ كيەۆكە قارۋ-جاراق بەرۋىن سىناعان. رەسەي سىرتقى ىستەر مينيسترلىگى باتىس ەلدەرى ۋكرايناعا شابۋىل جاسايتىن قارۋ-جاراقتار جەتكىزسە، رەسەي "ارنايى وپەراتسيانىڭ گەوگرافيالىق مىندەتتەرىن" ۇلعايتادى دەپ مالىمدەگەن.

Abai.kz