بۇگىن ءماجىلىس توراعاسى ەرلان قوشانوۆتىڭ توراعالىق ەتۋىمەن پارلامەنت ءماجىلىسىنىڭ VII شاقىرىلىمى III سەسسياسىنىڭ العاشقى جالپى وتىرىسى ءوتتى. كۇن تارتىبىنە كىرىسپەس بۇرىن پالاتا توراعاسى مەملەكەت باسشىسى ق.ك.توقاەۆتىڭ حالىققا جولداعان جولداۋىنىڭ باسىم باعىتتارىنا توقتالدى.   

«جولداۋ بۇرىن باستالعان رەفورمالاردىڭ لوگيكالىق جالعاسى بولىپ تابىلادى. وتە ماڭىزدى، ەلىمىزدىڭ بولاشاق دامۋىنا، تاعدىرىنا قاتىستى اۋقىمدى ماسەلەلەر كوتەرىلدى. ەڭ باستىسى، مەملەكەت باسشىسى جولداۋدا العاش رەت بولاشاق سايلاۋ ناۋقاندارىنىڭ كەستەسىن جاريالاپ، ەلىمىزدىڭ بۇكىل ساياسي جۇيەسىنىڭ جاڭارىپ-جاڭعىرۋىنا جول اشىپ بەردى»، – ە.قوشانوۆ.

ءماجىلىس توراعاسىنىڭ پىكىرىنشە، جولداۋدا ايتقان بارلىق ماسەلەلەر قوعام سۇرانىسىنا ساي كەلەدى. قازىر قازاقستاندىقتاردى تولعاندىراتىن ەڭ باستى ماسەلە – ەكونوميكانىڭ دامۋى، حالىقتىڭ ءال-اۋقاتىن ارتتىرۋ. ەلدى باعا مەن تاريفتەردىڭ ءوسۋى الاڭداتىپ وتىر. پرەزيدەنت جولداۋدا كوپتىڭ كوكەيىندە جۇرگەن وسى سۇراقتارعا ناقتى جاۋاپ بەردى. ول «ازامات – بيزنەس – مەملەكەت» اراسىنداعى قاتىناستى تۇبەگەيلى وزگەرتۋدى ۇسىندى.

سونىمەن قاتار پالاتا سپيكەرى ەل پرەزيدەنتى پارلامەنت جۇمىسىنىڭ نەگىزگى باعىتتارىن ايقىنداپ بەرگەنىنە باسا نازار اۋداردى.

«اعىمداعى سەسسيادا دەپۋتاتتار جۇمىس ىستەيتىن زاڭ جوبالارىنىڭ ەرەكشە ماڭىزى بار جانە ونى قوعام دا كۇتىپ وتىر. سوندىقتان، ولاردى قاراۋ كەزىندە حالىقتىڭ، ازاماتتىق قوعام وكىلدەرى مەن ساراپشىلاردىڭ پىكىرى مەيلىنشە ەسكەرىلۋگە ءتيىس»، – دەدى ە.قوشانوۆ.

جالپى وتىرىس بارىسىندا دەپۋتاتتار بىرقاتار جاڭا زاڭ جوبالارىن جۇمىسقا

الدى. ولار: «قازاقستان رەسپۋبليكاسىنىڭ كونستيتۋتسيالىق سوتى تۋرالى»، «قازاقستان رەسپۋبليكاسىنداعى ادام قۇقىقتارى جونىندەگى ۋاكىل تۋرالى»، «پروكۋراتۋرا تۋرالى»،  «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا مەملەكەت باسشىسىنىڭ 2022 جىلعى  16 ناۋرىزداعى جولداۋىن ىسكە اسىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى»  كونستيتۋتسيالىق زاڭ جوبالارىن جۇمىسقا الدى.

سونىمەن قاتار پالاتا كوميتەتتەرى اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى، 2023 – 2025 جىلدارعا ارنالعان رەسپۋبليكالىق بيۋدجەت تۋرالى جانە دەنساۋلىق ساقتاۋ ماسەلەلەرى بويىنشا زاڭ جوبالارىن جۇمىسقا الدى.

سونداي-اق، جالپى وتىرىس بارىسىندا دەپۋتاتتار بىرقاتار حالىقارالىق  راتيفيكاتسيالىق زاڭ جوبالارىن جۇمىسقا الدى

جالپى وتىرىستا پالاتا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى  اندرەي  گريگورەۆيچ  ليننيكتىڭ وكىلەتتىگىن مەرزىمىنەن بۇرىن توقتاتۋ تۋرالى قاۋلى قابىلدادى.

Abai.kz