سىبايلاس جەمقورلىققا قارسى قىزمەت گۇلميرا ساتىبالدىعا، ونىڭ باقىلاۋىنداعى «اريا-جاڭا استانا» جشس كومپانياسىنىڭ باسشىلىعىنا جانە مەملەكەتتىك ورگانداردىڭ لاۋازىمدى تۇلعالارىنا قاتىستى وبەكتىلەردى سالۋعا بولىنگەن بيۋدجەت قاراجاتىن جىمقىرۋ فاكتىلەرى بويىنشا تەرگەۋدى جالعاستىرۋدا، دەپ حابارلايدى  انتيكور. 

بىرنەشە وبەكتىلەر بويىنشا ءىس جۇزىندە ورىندالماعان قۇرىلىس-مونتاجداۋ جۇمىستارىنا اقى تولەۋ ناتيجەسىندە مەملەكەتكە جالپى سوماسى 3,9 ميليارد تەڭگەگە اسا ءىرى مولشەردە زالال كەلتىرىلدى.

«تەرگەۋ ساتىسىندا قابىلدانعان شارالارمەن مەملەكەتكە كەلتىرىلگەن زالال تولىق وتەلدى. سونىمەن قاتار، گ.ساتىبالدى مەن ونىڭ سەنىمدى تۇلعالارىنا قاتىستى بىرقاتار كاسىپورىنداردىڭ قاتىسۋ ۇلەستەرى مەن اكتيۆتەرىن زاڭسىز يەلەنۋ، ادامدى ۇرلاۋ جانە باس بوستاندىعىنان زاڭسىز ايىرۋ فاكتىلەرى بويىنشا تەرگەۋ جۇرگىزىلۋدە»، - دەپ جازدى ۆەدومستۆودان.

ونداعى مالىمەتتەرگە قاراعاندا، جابىرلەنۋشىلەرگە كەلتىرىلگەن زالالدىڭ الدىن الا سوماسى 6,6 ميليارد تەڭگەدەن اسادى.

كۇدىكتى ادامدار كۇزەتپەن ۇستالۋدا. تەرگەۋ جالعاسۋدا.

Abai.kz