مەملەكەت باسشىسى قاسىم-جومارت توقاەۆ مەملەكەتتىك باعدارلامالاردى ۇلتتىق جوبالار فورماتىنا اۋىستىرۋدى تاپسىرعان بولاتىن. بۇل ءوز كەزەگىندە اتقارىلاتىن جۇمىستاردىڭ ساپاسىن ارتتىرىپ، قوعام تاراپىنان باقىلاۋدى كۇشەيتۋگە مۇمكىندىك بەرەدى.

پرەزيدەنتىمىزدىڭ اتالعان تاپسىرماسىنان كەيىن قولعا الىنعان ۇلتتىق جوبالاردىڭ ءبىرى – «ءبىلىمدى ۇلت» ساپالى ءبىلىم بەرۋ» جوباسى بولىپ تابىلادى.

مەملەكەت باسشىسىنىڭ تاپسىرماسى بويىنشا مەملەكەتتىك باعدارلامالاردان ۇلتتىق جوبالار فورماتىنا كوشۋ جۇزەگە اسىرىلدى. «ءبىلىمدى ۇلت» ساپالى ءبىلىم بەرۋ» ۇلتتىق جوباسىندا جەدەل شەشىمدەردى تالاپ ەتەتىن جانە حالىقتىڭ قاجەتتىلىگىن قامتاماسىز ەتۋگە باعىتتالعان ماسەلەلەر بويىنشا مەملەكەتتىك باعدارلامامەن ساباقتاستىق ساقتالعان.

ۇلتتىق جوبانىڭ كوزدەگەنى بالالاردى مەكتەپكە دەيىنگى تاربيەمەن 100% قامتۋعا، اۋىلداعى ءبىلىم بەرۋ ساپاسىن ارتتىرۋعا، بالالاردىڭ قاۋىپسىزدىگىنە جانە جوو-نىڭ باسەكەگە قابىلەتتىلىگىن ارتتىرۋعا كۇش سالۋ بولىپ سانالادى. اتالعان ۇلتتىق جوبا 4 نەگىزگى باعىتتان، 5 مىندەتتەن، 15 كورسەتكىشتەن جانە 26 ءىس-شارادان تۇرادى. وعان 2025 جىلعا دەيىن بيۋجەتتەن 2 ترلن تەڭگەگە جۋىق قاراجات جۇمساماق.

مەكتەپكە دەيىنگى جانە ورتا ءبىلىم كوميتەتىنىڭ توراعاسى گۇلميرا كارىموۆا ۇلتتىق جوبانىڭ تۇپكى ماقساتىنا قاتىستى:

«پرەزيدەنتتىڭ تاپسىرماسىنا سايكەس مينيسترلىك «ءبىلىمدى ۇلت» ساپالى ءبىلىم بەرۋ» ۇلتتىق جوباسىن ازىرلەدى. بۇل – ءبىلىم بەرۋ مەن عىلىم سالاسىن دامىتۋدىڭ 2025 جىلعا دەيىنگى جوسپارىن ايقىندايتىن ماڭىزدى قۇجات. ۇلتتىق جوبا ءبىلىم بەرۋدىڭ بارلىق دەڭگەيىندەگى ءبىلىم الۋشىلاردىڭ وقۋ ساپاسىن ارتتىرۋدى كوزدەيدى. ۇلتتىق جوبانىڭ تۇپكىلىكتى ماقساتى ونىڭ مازمۇنىنان دا انىق كورىنەدى. ايتالىق، «ءبىلىمدى ۇلت» ساپالى ءبىلىم بەرۋ» ۇلتتىق جوباسى 4 باعىتتان تۇرادى: مەكتەپكە دەيىنگى تاربيە مەن وقىتۋ; ورتا ءبىلىم; تەحنيكالىق جانە كاسىپتىك ءبىلىم; جوعارى جانە جوعارى وقۋ ورنىنان كەيىنگى ءبىلىم. جالپى، ۇلتتىق جوبانى ىسكە اسىرۋ ساپالى ءبىلىم الۋعا قولجەتىمدىلىكتى كەڭەيتۋگە مۇمكىندىك بەرەدى. اتاپ ايتقاندا، مەكتەپكە دەيىنگى تاربيە جۇيەسىندە ۇسىنىلاتىن قىزمەتتەردىڭ قولجەتىمدىلىگى مەن ساپاسىن قامتاماسىز ەتەدى. ەكىنشىدەن، وڭىرلەر، اۋىل مەن قالا اراسىنداعى ءبىلىم ساپاسى بويىنشا الشاقتىق قىسقارادى. سونىمەن قاتار ۇلتتىق جوبانى ىسكە اسىرۋ مەكتەپتەردىڭ ينفراقۇرىلىمىن جاقسارتۋعا، مەكتەپتەردى جايلى، قاۋىپسىز جانە زاماناۋي ءبىلىم بەرۋ ورتاسىمەن قامتاماسىز ەتۋگە مۇمكىندىك بەرەدى. اسىرەسە ۇلتتىق جوبانىڭ ماقساتىنا قول جەتكىزۋ ارقىلى جاستاردى تەگىن تەحنيكالىق جانە كاسىپتىك بىلىممەن قامتاماسىز ەتىپ، NEET ساناتىنداعى جاستاردىڭ ۇلەسى قىسقارادى دەپ كۇتىلۋدە. ال جوعارى وقۋ ورىندارىندا زەرتتەۋ ەكوجۇيەسىنىڭ جۇمىس ىستەۋى ءۇشىن جاعداي جاسالادى»، - دەپ باق جۋرناليستەرىنە جاۋاپ بەرگەن ەدى.

«ءبىلىمدى ۇلت» ساپالى ءبىلىم بەرۋ» جوباسى اياسىندا كوپتەگەن كەلەلى ىستەر قولعا الىنىپ جاتىر. الماتى قالالىق قۇرىلىس باسقارماسى باسشىسىنىڭ ورىنباسارى ۇلان وڭالباەۆ وڭىرلىك كوممۋنيكاتسيالار قىزمەتىنىڭ بريفينگىندە بيىل زەردەلى شاعىن اۋدانىندا 380 ورىندى جاتاقحاناسى بار 720 ورىندى كاسىبي تەحنيكالىق ۋچيليششەنىڭ قۇرىلىسىن باستالاتىندىعىن ايتتى. بۇدان بولەك  №2 الماتى مەملەكەتتىك پەداگوگيكالىق كوللەدجى ءۇشىن 450 ورىندى قوسىمشا قۇرىلىس سالۋ جوباسى ازىرلەنۋ ۇستىندە.

ستۋدەنتتەردىڭ جاتاقحانالارداعى ورىن تاپشىلىعى ماسەلەسىن شەشۋ ءۇشىن 600 ورىندى 2 جاتاقحانا سالۋ جوباسى ازىرلەنۋدە. ولار الماتى اۆتومەحانيكالىق كوللەدجى مەن يننوۆاتسيالىق تەحنولوگيالار كوللەدجى ءۇشىن سالىنادى. بۇل نىسانداردىڭ قۇرىلىسى 2023-2024 جىلدارعا جوسپارلانىپ وتىر.

بۇل قالا باسشىلىعىنىڭ بولاشاق ماماندارعا دەگەن اكەلىك قامقورلىقتارى دەسەك ارتىق ايتپايمىز.

Abai.kz