ۋكراينا اسكەرىنىڭ حاركوۆ وبلىسىنداعى ءساتتى قارىمتا شابۋىلى رەسەي بيلىگى مەن سەپاراتيستەر اراسىندا ۇرەي تۋدىردى. باسقىنشى قولىنداعى وبلىستىڭ باسىم بولىگىن جىلدام ازات ەتە بىلگەن ۋكراينا اسكەرى، ەندى لۋگانسك وبلىسىن ازات ەتۋگە كىرىستى. لۋگانسك وبلىسى 100 پايىز رەسەي قولىنا وتكەن جالعىز ايماق بولاتىن. 

رەسەي اسكەرى سەۆەرودونەتسك پەن ليسيچانسك قالالارى ءۇشىن قاندى شايقاس جۇرگىزىپ، ەكى قالانى باسىپ العاننان كەيىن، لۋگانسك وبلىسى شىلدە ايىنىڭ سوڭىندا تولىق رەسەيدىڭ قولىنا ءوتتى. كيەۆتىڭ حاركوۆ وبلىسىنداعى ءساتتى شابۋىلى وبلىستى ازات ەتۋ مۇمكىندىكتەرىن اشتى. ۋكراينا ساربازدارى لۋگانسك وبلىسىن ازات ەتۋ وپەراتسياسىن باستاپ، كەشە بەلوگوروۆكا قالاشىعىن ازات ەتتى. بۇل لۋگانسك وبلىسىنداعى سەپاراتيستەردى سەلك ەتكىزگەن جايت بولدى.

كيەۆ وڭتۇستىك باعىتتا شابۋىل جاساۋدى جالعاستىرۋدا. باسقىنشى قولىندا قالعان حەرسون جانە زاپوروجە وبلىستارىن ازات ەتۋ ارەكەتتەرى ءبىر ءسات توقتاعان ەمەس. زىمىران كەشەندەرىن قولدانۋ ارقىلى، ۋكراينا اسكەرى رەسەيدىڭ اسكەري قويمالارى مەن شتابتارىن جويۋدا. حەرسوننىڭ باتىسىنداعى رەسەي اسكەرى قورشاۋدا قالىپ، بەرىلۋدىڭ امالىن جاساۋدا.

لۋگانسك وبلىسىن ازات ەتۋ وپەراتسياسىنىڭ باستالۋى رەسەي مەن سەپاراتيستەردىڭ ۇرەيىن ارتتىرىپ، "رەفەرەندۋمدى جىلدام ارادا جاساۋعا ءتيىسپىز" دەگەن ۇندەۋدى جاساۋىنا اكەلدى. لۋگانسك جانە دونەتسك سەپاراتيستەرى رەفەرەندۋم جاساپ، سول ارقىلى ۋكراينا اسكەرىنە قارسى ارەكەتتى كۇشەيتۋگە بولادى دەپ سانايدى. لۋگانسك جانە دونەتسك سەپاراتيستەرى رەسەيگە قوسىلىپ، رەسەيدىڭ سۋبەكتىسى بولايىق دەپ وتىر. ساراپشىلار جالعان رەفەرەندۋم ناتيجەسىن ماسكەۋ ءاپ-ساتتە مويىنداپ، ارتىنشا رەسەيگە شابۋىل جاسالدى دەۋ ارقىلى، جاپپاي موبيليزاتسيا جاساۋى مۇمكىن دەپ سانايدى.

رەفەرەندۋم جاساۋدى رەسەيدىڭ بۇرىنعى پرەزيدەنتى مەدۆەدەۆ بىلاي دەپ سيپاتتايدى: "رەفەرەندۋم جاساۋ رەسەيدىڭ دامۋ ۆەكتورىن ونداعان جىلعا وزگەرتەدى. تەك قانا ءبىزدىڭ ەلدىڭ ەمەس. رەسەي قۇرامىنا جاڭا ايماقتاردى قوسۋ الەمدىك گەوساياساتتا ۇلكەن ترانسفورماتسيانى باستايدى. ال رەسەي اۋماعىنا قول سالۋ، ۇلكەن قىلمىس جانە ول ءۇشىن ءبىز بارلىق كۇشتى قولدانۋعا قۇقىلىمىز. ال ەڭ ماڭىزدىسى، ءبىز كونستيتۋتسيامىزعا بۇل شەشىمدەردى ەشكىم وزگەرتە المايدى دەپ بەكىتكەن بولاتىنبىز. مىنە، سول سەبەپتى باتىس تا، كيەۆ تە بۇل رەفەرەندۋمداردان ولەردەي قورقادى. رەفەرەندۋمدى جاساۋ كەرەك". 

ال رەسمي كيەۆ بولسا، ەشقانداي دا رەفەرەندۋم ۋكراينا اسكەرىن توقتاتا المايدى دەپ وتىر. ماسكەۋدەگى مەمدۋما بولسا، رەفەرەندۋم جاقىن ارالىقتا وتەدى دەگەن ويدا.

Abai.kz