رەسەي مەن ۋكراينا 200 اسكەري تۇتقىن الماسۋعا كەلىستى، دەپ حابارلادى تۇركيا پرەزيدەنتى رەجەپ تايپ ەردوعان PBS باسىلىمىنا.

"تاراپتاردىڭ كەلىسىمىمەن ەكى ءجۇز تۇتقىن الماستىرىلادى. ماڭىزدى قادام بولادى دەپ ويلايمىن", - دەيدى تۇرىك پرەزيدەنتى. ول تۇتقىن الماسۋعا قاتىستى باسقا ەشتەڭە ايتقان جوق. ۋكراينا مەن رەسەي 200 تۇتقىندى الماستىرعان-الماستىرماعانى ازىرگە بەلگىسىز.

ەردوعاننىڭ مالىمدەۋىنشە، رەسەي ۋكرايناداعى سوعىستى تەزىرەك اياقتاۋعا ۇمتىلىپ وتىر. وزبەكستاندا رەسەي پرەزيدەنتى ۆلاديمير پۋتينمەن كەزدەسكەن سوڭ تۇركيا پرەزيدەنتى وسىنداي تۇجىرىم جاساعان.

"وزبەكستاندا مەن پۋتينمەن اۋقىمدى كەزدەسۋ وتكىزدىم. ولار مۇنى تەزىرەك اياقتاعىسى كەلەتىنىن ءتۇسىندىم. قالىپتاسقان جاعداي - ۇلكەن پروبلەما", - دەيدى ەردوعان.

ماسكەۋ سوڭعى مارتە كيەۆپەن تۇتقىن الماسقانىن ماۋسىم ايىنىڭ اياعىندا حابارلاعان. سول كەزدە تاراپتار اسكەري تۇتقىنداردى ""144-كە 144" فورماتىنا ساي الماستىرعانىن راستاعان.

بۇۇ باس حاتشىسى انتونيۋ گۋتەرريش قىركۇيەكتە تاراپتاردى "بارلىعىن بارلىعىنا" فورماتىندا تۇتقىن الماستىرۋعا شاقىرعان.

ۋكراينا مەن رەسەي اراسىندا بەيبىت كەلىسسوز ءجۇرىپ جاتقان جوق. جانجالدى ديپلوماتيا كومەگىمەن رەتتەۋ جونىندەگى كەلىسسوزدەردىڭ العاشقى راۋندى بەلارۋس اۋماعىندا وتكەن. كەيىن كەلىسسوزدەر ۆيدەوبايلانىس كومەگىمەن جالعاسقان. ۋكراينا مەن رەسەي دەلەگاتسيالارىنىڭ سوڭعى كەزدەسۋى بيىل 29 ناۋرىزدا ستامبۇلدا ءوتتى.

Abai.kz