بۇگىندە قازاقستان كوپتەگەن دامىعان ەلدەن وزىپ، بۇۇ-نىڭ تسيفرلانعان مەملەكەتتەر رەيتينگىندە ۇزدىك وتىز ەلدىڭ قاتارىنا كىرەدى. بۇل تۋرالى مەملەكەت باسشىسى قاسىم-جومارت توقاەۆ Digital Bridge حالىقارالىق فورۋمىنىڭ پلەنارلىق وتىرىسىندا ايتتى.

بۇگىن استانادا "ورتالىق ەۋرازيا جاڭا تەحنولوگيالىق پلاتفورما رەتىندە" اتتى تاقىرىپتاعى Digital Bridge 2022 حالىقارالىق تەحنولوگيالىق فورۋمى ءوتىپ جاتىر.

"ادامدىق، زياتكەرلىك جانە عىلىمي الەۋەتى زور قازاقستان يننوۆاتسيالاردى، تسيفرلىق ءوندىرىستى جانە شىعارماشىلىقتى دامىتۋدىڭ بىرەگەي كەڭىستىگى بولىپ تابىلادى. بۇگىنگى تاڭدا تەك جەكەلەگەن كومپانيالاردىڭ عانا ەمەس، باسەكەگە قابىلەتتىلىگىن انىقتاۋشى فاكتور بولىپ تابىلاتىن تسيفرلىق ترانسفورماتسيا ەكەنى ەشكىمگە قۇپيا ەمەس.

ساراپشىلاردىڭ بولجامى بويىنشا، ون جىلدان كەيىن الەمدەگى ونىمدەر مەن قىزمەتتەردىڭ 70 پايىزى تسيفرلىق پلاتفورمالىق مودەلدەرگە نەگىزدەلەدى. وسىنداي جاعدايدا قازاقستان ءوز الدىنا ەۋرازيالىق كەڭىستىكتەگى ەڭ ءىرى تسيفرلىق حابتاردىڭ بىرىنە اينالۋ ستراتەگيالىق مىندەتىن قويدى. بۇل ءۇشىن بەرىك نەگىز بار”،-دەدى توقاەۆ.

مەملەكەت باسشىسى ءوز سوزىندە فورۋمنىڭ بۇگىنگى كۇن تارتىبىندە ەلدى دامىتۋدىڭ اۋقىمدى پەرسپەكتيۆالارى ايقىن كورىنىس تاپقانىن اتاپ ءوتتى.

Abai.kz