كيبەرشابۋىلداردى ارنايى جۇيەلەر جاساپ جاتقانىن اقپارات جانە قوعامدىق دامۋ ءمينيسترى دارحان قىدىرالى ايتتى. مينيستر بۇل تۋرالى Qazaqstan ۇلتتىق ارناسىنىڭ Apta باعدارلاماسىنا بەرگەن سۇحباتى بارىسىندا مالىمدەدى. 

ايتا كەتەيىك، اباي وبلىسىنا ساپارى كەزىندە مەملەكەت باسشىسى كيبەرشابۋىلدار كوبەيىپ كەتكەندىگى تۋرالى ايتا كەتكەن ەدى. ۆەدومستۆوعا كەلگەنىنە ءبىر اي بولعان مينيستر دارحان قىدىرالى دە وسىعان قاتىستى ءوز پىكىرىن ءبىلدىردى. 

“جالپى عالىمدار «پوستشىندىق» دەپ اتاعان وسى كەزەڭدە گيبريدتىك سوعىس الەمدە ءورشىپ تۇر. مۇنداي مىلتىقسىز مايدان كەزىندە دابىرا-دابىل، انىقتالماعان اقپارات، دايەكسىز دەرەكتەر كوپ جاعدايدا جۇرتتى شاتاستىرادى، وقىرماندى اداستىرادى. سوندىقتان وسىنداي اقپاراتتىق شابۋىلدىڭ قازىر ءبىز قازاقستانعا دا باعىتتالعانىن كورىپ وتىرمىز. بۇل تۋرالى پرەزيدەنت تە سەمەيدەگى سوزىندە اتاپ ءوتتى. شىن مانىندە بۇل اقپاراتتىق سوعىس كەزىندە ەلدەگى بىرلىكتى، بەرەكەنى، جالپى تاۋەلسىزدىكتى تۇعىرلى ەتۋ ءۇشىن تەك قانا جازارمان قاۋىمعا عانا ەمەس، تۇتىنۋشىعا دا ۇلكەن جاۋاپكەرشىلىك جۇكتەلەدى. ويتكەنى ءبىز سول اقپاراتتى تاراتۋ ارقىلى كەيدە زاڭ بۇزۋشىلىق جاساپ وتىرعانىمىزدى نەمەسە تەكسەرىلمەگەن دەرەكتى تاراتىپ وتىرعانىمىزدى اڭعارماي قالۋىمىز مۇمكىن، - دەدى ول.

ءمينيستردىڭ ايتۋىنشا، وسىعان بايلانىستى جالپى اقپاراتتىق سوعىس كەزەڭىندە كەز كەلگەن ازاماتقا ۇلكەن جاۋاپكەرشىلىك جۇكتەلەدى.

“وتكەندە DoS-شابۋىل دەپ تەحنيكالىق جاعى دا ايتىلدى. سودان كەيىن كيبەرشابۋىلداردىڭ دا ۇدەگەنىن كورىپ وتىرمىز. مىسالى، كەشە پاۆلوداردا ارنايى ءبىر فەيك-اقپارات تارادى. ونى دا شەتەلدىك ازامات تاراتقانىن بىلدىك. سوڭعى ءبىر ايدى الىپ قاراساق، وتىز كۇننىڭ ىشىندە دىندەر سەزى ءوتتى، ريم پاپاسى كەلدى. قازاقستان پرەزيدەنتىنىڭ نيۋ-يورككە، لوندونعا سىرتقى ساپارلارى وتە ۇلكەن رەزونانسقا يە بولدى. سوندىقتان قازاقستاندى بىرەۋلەر تۇراقسىزدىقتىڭ ارالىنا اينالدىرعىسى كەلەتىن سياقتى. مۇنىڭ سايلاۋالدى كەزەڭمەن تۇسپا-تۇس كەلۋى دە ويلاندىرماي قويمايدى. سول ءۇشىن مۇنى ارنايى جۇيەلەر جاساپ جاتقانىن بايقاۋ قيىن ەمەس”، - دەيدى دارحان قىدىرالى.

Abai.kz