ءماجىلىس دەپۋتاتى، «اق جول» پارتياسىنىڭ جەتەكشىسى ازات پەرۋاشەۆ رەسەي سىرتقى ىستەر مينيسترلىگىنىڭ مالىمدەمەسى مەن ءىس-ارەكەتىنە قاتىستى پىكىر ءبىلدىردى.

«رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆانىڭ قازاقستانعا جانە ءبىزدىڭ ەلشىمىزگە قاتىستى پىكىرى ورىنسىز. بۇنداي مالىمدەمەلەر ەكى ەل اراسىنداعى ءوزارا ارىپتەستىك قاعيدالارىنا قايشى.

قازاقستان رەسەيلىك وكىلدەردىڭ، رەسەي مەملەكەتىنىڭ پوزيتسيالارىنا قۇرمەتپەن قارايدى. ءدال سونداي قۇرمەت بىزگە دە كورسەتىلۋى كەرەك. رەسەي قازاقستاننىڭ پوزيتسيالارىنا، قازاقستاننىڭ ەلشىسىنە قۇرمەتپەن قاراۋى ءتيىس! ءبىزدىڭ رەسەيدەشى ەلشىمىز قازاقستاننىڭ رەسمي وكىلى.

بۇگىن قر سىرتقى ىستەر مينيسترلىگى قازاقستانداعى رەسەي ەلشىسىنە دە ءدال سونداي ەسكەرتۋ جاساعان. سوعىس ءجۇرىپ جاتىر. سوندىقتان، ءسوزدىڭ ەكپىنىن ءبىز تۇسىنەمىز. رەسەيلىك جانە ۋكراينالىق ساياساتكەرلەردىڭ سوزدەرىندەگى ەموتسيالاردى تۇسىنۋگە بولادى. بىراق، قازاقستان ەشكىممەن سوعىسىپ جاتقان جوق. سوندىقتان، بىزگە، ءبىزدىڭ ەلشىمىزگە قۇرمەت بولۋىن تالاپ ەتەمىز!»، - دەدى پەرۋاشەۆ مىرزا.

وسىعان دەيىن ۋكراينانىڭ قازاقستانداعى ەلشىسى پەتر ۆرۋبلەۆسكي ورىستارعا قاتىستى بەيساياسي سوزدەر ايتقان ەدى. كەيىن قازاقستان حالقى اسسامبلەياسى «ەلشىنى ەلدەن شىعارۋ» تۋرالى باستاما كوتەرگەن. ونان سوڭ قر سىرتقى ىستەر مينيسترلىگى ەلشى پەتر ۆرۋبلەۆسكيگە ەسكەرتۋ جاساعان. ارتىنشا ەلشى ۆرۋبلەۆسكي ءوز سوزدەرى ءۇشىن كەشىرىم سۇراعان.

4 قازان كۇنى رەسەي سىرتقى ىستەر مينيسترلىگى قازاقستاننىڭ رەسەيدەشى توتەنشە جانە وكىلەتتى ەلشىسى ەرمەك كوشەرباەۆتى شاقىرتىپ، ەسكەرتۋ جاساعانى ءمالىم بولدى. بۇعان قاتىستى قر سىرتقى ىستەر مينيسترلىگى جاۋاپ رەتىندە، قازاقستانداعى رەسەي ەلشىسىن شاقىرتىپ، ەسكەرتۋ جاسايتىنى ايتتى.

Abai.kz