قازنەتكە ءبىر اي ىشىندە 20 ميلليونعا جۋىق كيبەر شابۋىل جاسالدى. "كيبەرقالقان" قوعانىس كەشەنى قۇرالدارىمەن كيبەرشابۋىلدارعا تويتارىس بەرۋ بويىنشا جۇمىستار جۇرگىزىلىپ جاتىر”، دەپ حابارلادى "مەملەكەتتىك تەحنيكالىق قىزمەت" اق ("متق" اق).

«بۇگىنگى تاڭدا قاۋىپ-قاتەر دەڭگەيىن تومەندەتۋ ءۇشىن ناقتى ۋاقىت رەجيمىندە بارلىق جەلىلىك ترافيكتەرگە تالداۋ جۇرگىزىلىپ، ءاربىر پاكەت تەكسەرىلۋدە. "كيبەرقالقان" زياندى ترافيك پەن زياندى باعدارلامالىق جاساقتامانى ءسۇزۋ ارقىلى ىشكى جانە سىرتقى پەريمەترلىك شابۋىلدارعا تويتارىس بەرەدى»، - دەلىنگەن "متق" اق حابارلاماسىندا.

مەملەكەتتىك تەحنيكالىق قىزمەتتىڭ بولجاۋىنشا، كيبەر شابۋىلدار قازاقستانداعى پرەزيدەنت سايلاۋ كەزەڭىنىڭ باستالۋىنا بايلانىستى.

«مۇنداي شابۋىلداردىڭ نەگىزگى ماقساتى – قازنەت ينفراقۇرىلىمىنىڭ جۇمىسىن بۇزۋ بولۋى مۇمكىن ەكەنىن مەملەكەت باسشىسى قاسىم-جومارت توقاەۆ تا ايتقان بولاتىن»،-دەيدى "متق" اق،

توقاەۆتىڭ:  «بەلگىلى ءبىر سىرتقى كۇشتەر ەلىمىزگە قيىندىق تۋعىزۋعا نيەتتى. ولار قازاقستانداعى وڭ وزگەرىستەرگە كەدەرگى جاساعىسى كەلەدى. بىراق ءبىز تاڭداعان باعىتىمىزدان باس تارتپايمىز",-دەگەن ءسوزىن ەسكە الىپ.

مەملەكەتتىك تەحنيكالىق قىزمەت قازىرگى ۋاقىتتا «كيبەرقالقاننىڭ» كۇشەيتىلگەن رەجيمدە جۇمىس ىستەپ جاتقانىن مالىمدەدى.

ايتا كەتەيىك، قازنەتكە DDoS شابۋىلدار جاسالعانى تۋرالى 25 قىركۇيەكتە بەلگىلى بولدى.

تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين مينيسترلىكتە  DDoS شابۋىلداردىڭ قايدان جاسالىپ جاتقاندىعى، ونىڭ ارتىندا قانداي ۇيىم تۇرعانى تۋرالى اقپارات جوق ەكەنىن ايتقان بولاتىن، ويتكەنى بۇل ءۇشىن پروكسي جانە VPN سەرۆەرلەرى قولدانىلادى.

انىقتاما ءۇشىن: DDoS شابۋىلى – بۇل بەلگىلى ءبىر ينتەرنەت-رەسۋرسقا نەمەسە ينتەرنەت سەگمەنتىنە رەتسىز سۇرانىستار تۇرىندەگى ارنايى باعىتتالعان قۋاتتى ترافيك اعىنى. شابۋىل ناتيجەسىندە ينتەرنەتكە قول جەتكىزۋ قيىندايدى (ينتەرنەت قىزمەتتەرىنىڭ جۇمىسىندا كىدىرىس بولۋى مۇمكىن نەمەسە ول مۇلدەم جۇمىسىن توقتاتادى).

Abai.kz