سوڭعى ۋاقىتتا قازاقستان مەن رەسەي اراسىنداعى قاتىناس كۇردەلى بولا ءتۇستى. ونى ءتۇرلى وقيعالاردان اڭعارۋ قيىن ەمەس. 

بىرنەشە كۇن بۇرىن قازاقستاننىڭ رەسەيدەگى ەلشىسى ەرمەك كوشەرباەۆتى رەسەيدىڭ ءسىم شاقىرتتى. رەسەي قازاقستانعا ۋكراينا ەلشىسىنىڭ قايتا ورالعانىنا نارازىلىق تانىتىپ، "ونىڭ ەلدەن كەتۋى دۇرىس بولادى" دەگەن مالىمدەمە جاسادى. ءتىپتى "174 باپقا ساي، سىزدەردىڭ زاڭدارىڭىزدى ورەسكەل بۇزۋدا" دەدى. بۇل رەسەيدىڭ اقورداعا جاساعان قىسىمى دەيدى ساراپشىلىر. سەبەبى تەلەفون ارقىلى عانا شەشۋگە بولاتىن ماسەلەنى، ولار دەمونستراتيۆتى تۇردە كورسەتتى.

كوپ ۇزاماي قازاقستان رەسەيدىڭ ەلشىسى الەكسەي بوروداۆكيندى شاقىرتىپ، قازاقستاننىڭ پوزيتسياسىنا قۇرمەتپەن قاراۋ كەرەكتىگىن ايتتى. وسىلايشا تاراپتار ەلشى شاقىرتىپ، نارازىلىق تانىتتى. بۇل ەكى ەل اراسىنداعى قاتىناستىڭ سۋىپ بارا جاتقانىن اڭعارتسا كەرەك.

رەسەي بيلىگى قازاقستاندى ۋكراينا سوعىسى باستالعالى بەرى قىسپاققا الۋدا. ونى باق ارقىلى، پروپاگانديستەر مەن ءتۇرلى شەنەۋنىكتەرىنىڭ مالىمدەمەلەرى ارقىلى كورسەتۋدە. مىسالى كوكتەمدە تيگران كەوسايان قازاقستانعا سەس كورسەتە سويلەدى. ارتىنشا رەسەي شەنەۋنىكتەرى "سانكتسيالاردى اينالىپ وتۋگە جول بەرمەدى، ساتقىندىق جاسادى" دەپ باجىلداي جونەلدى. بۇل تۋرالى بيىك مىنبەردە، ماڭىزدى جيىندا سيمونيان توقاەۆقا سۇراق قويىپ، تۇقىرتۋعا تىرىستى. الايدا پرەزيدەنت توقاەۆ پەتەربۋرگ فورۋمىندا رەسەيدىڭ اگرەسسياسىن ەش قولدامايتىنىن كورسەتىپ، ۋكراينانىڭ اۋماقتىق تۇتاستىعىن اشىق قولدادى.

23-27 قىركۇيەك اراسىندا ۋكراينانىڭ ءتورت وبلىسىندا رەسەي جالعان رەفەرەندۋم ۇيىمداستىردى. ول رەفەرەندۋمنىڭ ناتيجەسىن قازاقستان مويىندامايتىنىن رەسمي مالىمدەدى. بۇل مالىمدەمەگە رەسەي ساياساتكەرلەرى "وداقتاستىققا ساي ەمەس" دەپ كۇڭكىلدەپ جاتتى.

رەسەي قازاقستاندى ءوز پوزيتسياسىن قولداۋعا ماجبۇرلەۋ ءۇشىن ەكونوميكالىق قىسپاققا الۋدى دا ارتتىردى. مىسالى قازاقستان ەكونوميكاسىنىڭ نەگىزى بولىپ تابىلاتىن مۇنايدىڭ باسىم بولىگى رەسەي اۋماعى ارقىلى وتەتىن كتك قۇبىرىمەن تاسىمالدانادى. مىنە، سول قۇبىردىڭ جۇمىسىنا ۋكراينا سوعىسى باستالعالى 4 مارتە كەدەرگى جاساپ، اقورداعا سيگنال جىبەرۋمەن بولدى.

رەسەي ۋكرايناداعى سوعىستىڭ ناتيجەسىنە بايلانىستى وداقتاستارىنىڭ ماسكەۋدەن الىستاپ كەتۋى مۇمكىن دەپ قاۋىپتەنەدى.

Abai.kz