رەسەي تەلەارنالارى جەكسەنبى كۇنى كەشكىسىن ءپۋتيننىڭ تەرگەۋ كوميتەتىنىڭ باسشىسى الەكساندر باسترىكينمەن كەزدەسۋىن كورسەتتى. وندا باسترىكين جارىلىسقا تەك ۋكراينانىڭ ارنايى قىزمەتى عانا ەمەس، رەسەي مەن شەتەل ازاماتتارىنىڭ قاتىسى بارىن مالىمدەدى.

باسترىكيننىڭ سوزىنشە، "تەرروريزم" بابى بويىنشا قىلمىستىق ءىس قوزعالدى. پۋتين بولسا، قىرىم كوپىرىندەگى جارىلىستى "ماڭىزدى ينفراقۇرىلىمدى بۇزۋعا باعىتتالعان تەراكت" دەپ اتادى.

"اۆتورى، ورىنداۋشىلار، تاپسىرىس بەرۋشىلەر ۋكراينا ارنايى قىزمەتى", - دەدى پۋتين.

8 قازاندا تاڭەرتەڭ قىرىم كوپىرىندە جارىلىس بولدى. رەسەي تەرگەۋ مالىمەتى بويىنشا، اننەكسيالانعان قىرىمعا قاراي ءوتىپ بارا جاتقان جۇك كولىگى جارىلعان. ودان كەيىن تەمىر جول قۇرامىنداعى جانارماي تسيستەرنالارى ورتەنگەن. ءۇش ادامنىڭ قازا تاپقانى ءمالىم بولدى. كوپىردىڭ كراسنوداردان قىرىمعا باراتىن كولىك جولى بۇزىلعان.

باسترىكين جۇك كولىگى بولگاريادان گرۋزيا مەن ارمەنيا ارقىلى سولتۇستىك وسەتياعا، ءارى قاراي كراسنودار ولكەسىنە بارا جاتقان دەيدى. ونىڭ پىكىرىنشە، مۇنداي باعىت تۇسىنىكسىز. وسىعان دەيىن باق جۇك كولىگىنىڭ يەسى كراسنودارلىق كاسىپكەر، جۇرگىزۋشى ونىڭ تۋىسى بولعانىن جازعان.

ۋكراينانىڭ رەسمي تۇلعالارى بۇل وقيعانى ء"پۋتيننىڭ تۋعان كۇنىنە سىيلىق" دەپ اتادى. بىراق رەسمي كيەۆ جاۋاپكەرشىلىكتى المادى. ۋكراينا پرەزيدەنتى كەڭسەسى كەڭەسشىسى ميحايل پودولياك بۇل رەسەي بيلىگىندەگى كۇرەستىڭ ناتيجەسى بولۋى مۇمكىن دەگەن پىكىرىن ءبىلدىردى. قۇراما شتاتتار پىكىر بىلدىرمەدى، تەك ۋكرايناداعى سوعىسقا جاۋاپتى رەسەي دەدى. امەريكانىڭ بەدەلدى باسىلىمدارى دەرەككوزىنە سىلتەمە جاساپ، جارىلىس ۋكراين ارنايى قىزمەتىنىڭ وپەراتسياسى بولۋى مۇمكىن دەگەندى جازدى.

10 قازاندا پۋتين قاۋىپسىزدىك كەڭەسىنىڭ وتىرىسىن وتكىزبەكشى.

Abai.kz